星期日

星期日，本來想訓到好晏好晏(咪就因為寫solomon個篇野寫到好鬼夜lor)，點知十一點，就俾個電話嘈醒左，起左身，本來計劃早d落全港最窮人士集中地買番個router同埋tv box，然後早d搞掂個架部，可以重新打番機，點知o向屋企搞下呢樣搞下果樣，望下部電視，見到成龍大哥，唔小心睇到埋尾，已經成二點幾三點。
落到深記，在黃金行左個圈，下唔到主意買邊隻model，咪去維記食個蛋牛麵先啦。食完就再揀過，本來揀好左架tv box架，點知同個sell屎哥仔講個陣時，佢又介紹我買另一隻，果一隻我本身覺得麻麻地，因為佢個牌子係中文字(祟洋~~)，其實有個中文名都唔緊要，因為我都只不過有個中文名，但係果名真係太過有型，講出黎可能會俾d街坊街理笑......無論如何，我幾唔喜愛個牌子名都好，我都接受左個sell屎的意見，講到尾，我都係一個著重內在美既人。

除左買左個tv box，我都換埋個router，皆因本來的那一個實在令人太唔開心喇。咁都唔只，我仲買左一個講左好耐都未買既野......我一年前，都寫過話要買過個鬧鐘，用緊果個太過斯文勒，講左成年，終於成事，講到尾，我都係一個言出必行既人。今次買左個有大大隻字，有齊晒日期溫度濕度呢d咁資訊性既野，佢有漸進式大聲的招數，都唔只，佢最強係有「七重響」既絕技，即係你好鬼懶訓噤熄佢繼續訓，佢五分鐘之後會再響，相當之有耐性。之不過.....今朝，我真係等佢響最後一次果陣之識醒......佢都叫做盡晒力架勒.....起身呢家野，我最希望都係每朝有人聲線溫柔的morning call啦！真係發夢都冇咁早呀！

買完野就返屋企安裝左d野，搞到8點幾，做左一件好耐都冇做既野......開爐煮野食，煎左伯母果半底蘿蔔糕，本來係諗住食埋d桂花糕同埋馬蹄糕，但係半底蘿蔔糕，食完已經好飽.....咁耐冇煮野食，估唔到仲保留到當年代阿廖老師煮飯既水平，食得下架...當然唔好要求咁高啦，我地當年唔駛食自殺快餐，已經好好架勒！

就係咁，只過左個星期日。