燎原誌

XBOX Live早兩星期進行系統大更新，整個介面都唔同左，其實功能都冇乜分別，主要係可以load D game入隻Harddisk度，同埋可以整個Avator來代表自己。 呢個就係我喇！ 呢個月來都係打呢個月出既Gear of War 2，呢個遊戲既賣點就係可以用把有電鋸功能既機關槍鋸開D PK，仲有係今集新加可以脅持人質，叫佢做人質唔係咁啱...因為你脅持住隻野時，敵人係唔會投鼠忌器停止攻擊，人可以將個人做肉盾，唔鍾意仲可以扭斷佢條頸，實在係好痛快，如果你平日受左好大王壓力或者冤屈，咁玩下就可以疏導到喇！

有很多嘢想講，但太少時間... 雖然要做的都大致上完成了，但應該還有些手尾要跟... 近來連讀朋友們的BLOG也少了，何況自己寫.... 留待過兩天再來。 祝大家生活愉快。

其實，早在我做無業遊民日日晌屋企做二少爺其間，我已經在機緣巧合同埋鬼使神差既情況下，報讀一個有關所謂資訊科技系統保安既短期課程。 老老實實，講有興趣其實我真係冇乜，不過試問細個讀書果陣有幾多科係有興趣吖...揀呢個課程黎讀其實有幾個原因... 第一，我做人既宗旨係晌邊度跌，只晌邊度爬起身，當日俾人叉能廚我公司D Security做得唔好之後，就被一連串事件追擊，沒有反撲餘地，依家真真正正有呢d course上，叫做補番自己不足之處，又可以滿足下自己果個意氣用事唔服輸既心。 第二，聽講呢一個course個認證考試，攞到個資格之後，人工就唔會再係依家呢個level，咁...既然好似好有錢途咁，一讀無妨，識多d野又無壞既。不過個試係超難考，我其實都冇乜信心~~ 第三，個course唔算貴，雖然成日話想轉行，不過都唔係今日話轉聽日就轉到，搵d同之前做既野有少少關係，但又有d唔同既，一來可以習慣返讀書，二來學d少少跨domain既野，都叫做拓寬下自己，有多幾把刀用。到第時讀個堅d既course都唔會話一時之間讀唔到吖~~ (不過我發覺呢個course都已經好堅，好多野讀囉) 講到尾，呢一年來發覺唔攞d認證呀，資格呀真係唔掂，幾年前仲有人同我講「駛乜讀書丫，跟住我做野咁多野學，咁咪得囉」，而當年就因為跟住佢做野好鬼忙而放棄左讀左一個學期既學位課程，雖然呢幾年做野都真係好多野學，但出來搵野做，唔買d證書來呃神騙鬼，就真係做鬼都唔靈囉！真係後悔也來不及。 希望讀左個course，將來真係會有用啦！

用左全日星期日都仲未搞掂畫室畫展果D邀請咭海報場刊之類果D野。 同埋，發覺自己用緊果部電腦，做多少少野就唔夠快...好慢... 唉...淨返時間唔係咁多，不如食住老本，先渣住流灘，交行野先，如果唔係又會過忙碌既生活。 雖然話做多D呢類野可以吸收經驗，其實又唔係唔鍾意做，仲幾有興趣，不過...，都係唔好不過啦，自己都識講，做所有野都要付出既。

話慢唔慢，話快唔快，就係咁，我呢個唔想做又要做既偽富家子又開始左打工生涯第二章已經一個月了。 基本上我適應力強，都冇話乜野慣唔慣，同以前比較，真係好多唔同，不過我就係想唔同，如果同以前一樣就仆街了，唔係我諗住轉工把托呀？ 呢間公司，返工放工時間準時，呢度全個DEPT依家最早返多數係我，走既時間一定唔會過六點半；以前間公司，返工放工時間我極唔準時，果度全公司基本上我早返果日一定係因為有好大鑊既事要處理，如果唔係我返到去都會落街食個早餐先再返上去，每日走既時間平均唔會早得過八點半。 呢間公司食飯準時，我最欣賞佢SET左SCHEDULE SCAN VIRUS就正正係食飯時，人人見到開始SCAN VIRUS就知道要去食飯，進食定時，很健康；以前公司，食飯時間極唔準時，到左食飯時間唔會有人起身行動，一D比較有勇氣既同事起身提議大家不如去食晏係在面子上冒了很大的風險，因為如果到時冇人SO佢咁就真係好冇面了！ 呢度公司香港人數係近三百人，IT DEPT連我在內有三個人，即係三個人SERVE三百人，不過都叫做應付得到；以前公司連珠海OFFICE都係約二百多三百人，IT DEPT有四至五人，不過IT有多少人都唔係咁重要，因為事實上，情況係全公司二三百人既存在，都係為左SERVE緊兩位老闆，感覺上公司經營得好唔好同D同事都好似冇關係咁... 呢度公司走出走入唔係咁自由咁...落一落街要FORMALLY講聲，其實都唔算好麻煩，不過我都決定左，OFFICE HOUR入左OFFICE就唔落街，因為連些少手續我都唔想做；以前公司，我走左去邊都唔會有人理，工作自己安排，其實都真係FREE。 呢度公司個直屬上司係IT MANAGER，凡是我都REPORT俾佢知，乜都會請示下佢先，由於係IN HOUSE野，一D雞毛蒜皮既事我都會即時REPORT俾佢知，初初其實真係覺得好怪，又有D唔知點咁，但好在，呢度D工作範圍實在簡單得很，又唔駛寫WORKING REPORT，又唔駛開會，唔駛開會自然唔駛寫MEETING MINUTES，超開心；以前公司，直屬上司係COO，的而且確我唔會果D芝麻綠豆既事都會REPORT佢知，不過我後來諗返先知原來佢都想我REPORT D芝麻綠豆既事，可惜當時我已經離左職，嘿嘿~~果度工作講得好聽叫做多元化有挑戰性，講得唔好聽係永無寧日，問題天天多，仲要新奇剌激鑊鑊甘，咁都唔緊要，但

渣打馬拉松，之前見人跑我跑，已經參加左兩年，跑10km，舊年改左路線，冇得跑西隧，不過唔知係咪東廊易跑，定係知道10km一定跑得晒唔駛留力，還是我真係勁左，舊年爭少少就可以一個鐘內完成。 我舊年睇過d成績，如果跑快多幾分鐘，個排名就會高好鬼多！ 所以，今天定個target為55分鐘內完成，另外，對於舊年阻狗住晒既跑手，我勸佢地最好~~~躝開！ 之前連右膝都有少少痛(左膝一向都會痛)，咁就要慢慢練強返對腳先至得，所以，要快D開始練跑了~~ 零七馬拉松 零七馬拉松(結果) 零八馬拉松 零八馬拉松(結果)

突然...很掛念... 那一間叫 樂意 ...食粉麵的舖子.. 在前公司加上未搬辦公室時常常吃...因為就在公司樓下...從前工作得比較夜, 放工後就跟大哥一起吃過粉麵...他教我吃沙嗲肥牛撈河...沙嗲很香,肥牛很有口感~~記著一定要撈河...那才會發揮沙嗲的香味~~~

當日，辭工百般原因之一，因為覺得自己其實不是自己，休息一下和改變環境理應可當做實驗咁，睇下會有乜反應。算是當係認識自己既過程，我常覺得，有些事你平時唔做，咁應該有D野你係唔會知道的。 我最近諗，其實一直以來果個我，係一個乜野既人，咁，個果自己，又有幾自己？ 點解會有D咁既諗法？我諗係因為最近的工作上的體會。 呢份工，老實講，點樣比較，講辛苦程度都同之前果份無得比，實在係游刃有餘，而且工作量算係很適度，唔會太忙又唔會太無聊。不過，總覺得，欠了些什麼，還未是一份完美既崗位。 當然，我唔會咁唔知足咁仲晌度嫌三嫌四，而我亦暫時覺得很不錯，亦會在工作時間內放入投入度，不過講唔上會有火囉！講到尾，就係覺得做唔到自己囉。我自問做事很獨立思考，做事算很妥當，連上司也是認為他可以很放心。不過，佢放心還放心，有時都有些工作上的意見，其實這樣亦實在很平常，不過，以我今時今日，又會覺得有些少不爽。始終，我這份人，算係「好唔話得」，又唔管得！ 當然，其實好多人都應該係好唔話得，不過由於要開飯，所以就算好唔話得，都要變得任話都得。 我諗，暫時我會咁做：我將自己分出來，返工時要做返一個唔係咁自己既自己，放左工就做返自己，以前果份工，工作就是生活的大部份，唔可以用時間來分割得好清楚，依家果份，時間算係穩定，咁應該可以做得到。咁，我返工都係正正經經，搵果份糧，來養果一個胡鬧又古怪既自己，係呀，我成日覺得我依家都仲係做唔到一個百份百既自己，成日扮人地想我做果個自己，我諗，真係要慢慢調節返。 不過，其實，我仲發掘緊，被抑壓左好耐果個自己。 P.S. 我又諗....我其實咁既性格，之前點解可以晌前公司生活近七年呢？