燎原誌

今年既渣打馬拉松，報名果陣，我是有想過應不應報名，因我實在能做計我沒太多時間練跑。 但基於我自己常對自己說：很多事都是有心就會做，事在人為而已～～ 嗱～就係咁，又昆左自己報名～～ 跟去年一樣，報半馬，事關去年練完半馬後，十公里其實真的沒什麼挑戰性，而且跑十公里多人到好似行旺角咁多人，我咁怕多人，好自然抗拒再同D跑十公里的街坊一起散步（我沒有看不起他們的意思啊～～） 一如所料，我這半年是忙得連咒罵各界柒頭的時間也沒有，邊得咁多時間練跑？這半年練的日子很少，有機會練時的路線也不夠長，最多也只有十公里，是相當不足的，而我忙的程度是，連去拿馬拉松個號碼紙同袋紀念品都要朋友代勞．．．． 唉～～就係咁，便出事了～～ 出發前一晚，我很早便睡，往年，我不是在打XBOX便是睇戲，基本上都冇瞓既，今年，一瞓落床便瞓著了～仲要SET左電話響都嘈唔醒，最後我的朋友打來我才醒，但換衫梳洗一下都已經夠鐘，唔夠時間食野了，最後只好去樓下間些粉買左難吃的麵包來吃。此乃其中一個影響今次馬拉松結果的事。 今年天氣很不錯，不太熱，也沒有早前那種凍，想起去年那濕熱天氣，很想死掉～ 天氣很不錯的情況下，我開跑很快便調節好呼吸，跑得很順，個心仲諗，吖～～今年狀態唔錯喎～～ 點知，跑左6﹣7公里，竟然開始肚餓～為免自己跑跑下餓得滯暈低，我過左十公里後見到果D健康飲品，就補充返D糖份，免得眼花花～然後很順利跑到西隧，仲諗今年冇好似舊年咁晌度散步睇風景～應該早過舊年少少返終點～～ 過西隧出口，我照例走路不跑，免得太累跑不下，誰知道行完上斜想再起跑時，竟發現雙大腿的四頭肌都有少少抽筋，然後我拉一拉再走一段，諗住再跑，之後再起跑，SHIT～～～～連小腿都抽了，應該是心理上驚大腿再抽而用左小腿肌肉．．．． 就晌咁既情況，我只好全部港島段，都是用走路的．．．鳴鳴～～～ 其間．．．仲有有線電視訪問我（只因我是在散步，記者知道我可以詳談吧．．．（膠）） 好不容易走到皇室堡外，嘩～～身邊好多人同你打氣喎～～為左不要辜負群眾對自己的熱烈支持，同埋不失半馬選手的覇氣，只好再度提步向還有二百米的終點進發～～～一個轉彎．．．．小腿又抽～～而且仲係真抽～咁只好又慢慢跛下跛下咁行返去了～～ 今年成績嘛～～三個鐘多少少吧～～大會時間唔知．．．因為不在列上～～ 照舊，又係冇乜點練既小安迪又...

 承上篇，今年跑之前冇打XBOX，但係想早瞓都瞓唔著，真一件折墮的事。然後懶係浪漫感性咁趁自己生日零晨放左套情書出來睇，睇完勉強地瞓30分鐘，就去左沖涼同食超早餐！唔係超值早晨全餐。跟住落地鐵站會合小安迪出發到尖沙咀去！ 跑半馬晌尖沙咀為起點，而且冇跑十公里咁多人，地鐵唔太迫，好容易就去到目的地，仲係咁多年來最得閒，可以影相添！ 強烈聲明：我對跑鞋係橙色，你最多可以話係橙紅色，但絕對唔係紅色。 我唔想有日被打人打斷雙腿！ 是日攝氏24度，相對濕度93%，好可怕！ 半馬路線由尖沙咀開始，由西九龍走廊跑到荔景咁上下，然後回頭，向西隧一直逃跑，過了西隧後，經中上環金鐘灣仔銅鑼灣跑到維園完成這個長跑，我睇新聞有人仲有情人終成眷屬，實在可口可樂，好得幾耐。 呢條路線我當年跑10公里時跑過西隧同埋過海之後果段，改路線後都冇再跑過，今年可以再戰西隧真係好鬼興奮！ 10公里多人跑唔出奇，原來半馬都比我想像的多，仲遇到一D多年冇見既舊同學，例如志偉，同埋本網誌名人小勤勤。小勤勤仲係跑挑戰組，比我早半小時出發果組，我跑左3-4km果時見到佢，當時佢已經過左10km果個位，咁佢都跑得好鬼快，我冇叫佢或揮手，費時阻住佢啦，同埋我之前都有提過，佢大個仔喇，唔再放我在眼內，一陣佢唔應我，咪好自討沒趣？唔制~~我知道有跑半馬的仲有中學同學咸濕律師，同埋消防隊目傑王，當然仲有幸福寶寶小安迪。 是日天氣好熱，是的，一般來說24度我已經覺得好熱！而且仲要跑21公里，我一開始已經比平練跑時再跑慢一點，即係留力，事關成條路我唔係好清楚D高低起伏，如果後段不慎老抽，咁就唔係咁好了，雖然抽筋我細個時日日都抽，抽到當係正常大小二便既事情，但一來太耐冇做運動做到超出肌肉上限，二來是日本人牛一，我想減低見報風險，一個唔小心仲上埋A1「青年生日參加半馬，練習不足不支命危」，你話幾咁大吉利是呢！ 我慢慢來，跑到某些地方甚至只係行路，例如供水站，因為果d地方好多垃圾(紙杯)晌地下，仲成地水，一個唔小心仆街點算，留住蚊飯跑步一D都唔有型，我唔做呢D事！又例如上斜，留力吖嘛！又例如塞人既地方，的確，我見到好多地方會有大量既人突然係行路唔跑，咁...我呢D隨波逐流既人，見大家都行，咪又陪大家行囉！就係咁，我本來目標係2小時20分內完成，點知2小時50分先完成。我留力留到終點，跑完比練習...

之前一直沒有打算跑半馬，都係諗住跑10km就算，唔知點解有人話跑又會報。 跑半馬唔係跑10km咁可以係咁倚，咋咋帝帝間中練下跑就可以完成賽事。 首先，要搵下資料，睇下真長跑係點練先至啱，然後，就要搵返相關既工具幫手，keep track 住練習時既資料，再之後就要擬定練習計劃，同埋要認真練跑。 中間最令人頭痛既係，搵工具來keep track住跑步時既資料，跑既時間，跑左幾遠等等，另外就係練習路線。 工具方面，本來想搵隻polar或者sunnto之類既錶，但係有基本我想要既分脣都真係好很貴，並非我呢d過氣&落難偽富家子所能負擔。看到ipod sport kit，可以有一個sensor放係對nike 跑鞋度，ipod就可以接收，開頭以為一定要用nike跑鞋，所以一直覺得唔好，後來發覺好多人原來都自己改裝自己對波鞋(?)，令到個sensor都可以放入對鞋度，最後都上apple store度買了來用。呢個solution已經係最便宜的了。 路線方面，本來一直跑大坑東運動場外圍，但係真係好鬼悶，所以就諗左一條近似半馬既其中一段，我由太子一直跑到荔枝角，再返轉頭到太子，點知原來咁樣一圈都只係7km左右，咁點夠跑？我計劃練習時最後階段會加埋回程時最後會跑出西九海濱長廊先再轉頭返太子，咁先至夠遠。 其實到左今日為止，尋晚跑果程係太子到長沙灣運動場，然後晌運動場入面跑track跑左11個圈再跑返太子，全程12km有多冇少，已經過左10km，keep住咁跑進度應該唔錯。 剛收到apple 送過來的sport kit，用埋可以更有系統咁練！ 希望到跑時可以輕鬆完成全程半馬。 零七馬拉松 零七馬拉松(結果) 零八馬拉松 零八馬拉松(結果) 零九馬拉松 零九馬拉松(結果)

有朋友問什麼是蘿蔔仔，嗯~~這就是蘿蔔仔了！carrot oil~~~ 包裝寫住：可加速古銅膚色的效果之餘，亦有效保護皮膚免受灼傷，亦可提供滋潤及保護皮膚令色澤持久。 幾勁呀！ 本來，我都唔知道世界有支咁既產品，多謝介紹這個的朋友。睇下支野，又係一件歷史文物，原來，又是幾年前的事了。

地球天氣反常，五六月已經熱爆，魚始終要濕下水，如果唔係會死。 出門口時陽光普照，還提自己要帶支蘿蔔仔搽，等可以曬黑同時唔會曬傷。 點知落車時已經烏雲敝日。可能難得出海落水但係都只係棍仔團，連個天都戥我地灰。 今年唔可以成日落水了，因為窮。當了半天富家子，元氣立即大傷。 所以當日我落水便唔想上水，霸住來玩。 唔知係好彩定唔好彩，當日風太大，水唔平，唔可以做好用氣力既跳wake動作，咁改為練180，360呢d平時少做既野，用少d力，如果唔係呢幾日唔使旨意扎扎跳~~ 果日一個人入去食午飯，試左想試既生菜墨魚肉，食落唔知點解覺得同食開果d魚肉冇分別，定係平時果d都有少少墨魚肉呢？唔考究了，反正都ok就可以了，另外見佢有一隻叫皇后多士既野，話係失傳美食，唔知係咩又叫來試，原來係兩片奶油多夾埋好似飛碟咁整，唔明有幾特別又唔明係咪我從來未聽過而今日有人識整就當係曾經失傳，算啦，一向我都好多野唔明。 仲有....當日去果一程行去旺角坐車，途中見到.... 原來陳先生係識九陰白骨爪的~~~ (設計對白) 陳：用九陰白骨爪重點係唔剪指甲~~~

晌繼續寫決戰鳳凰山之前，先來個插敍法，打尖寫決戰馬拉松先！ 去年，去跑之前個晚冇訓到，同二公子消滅完D恐怖份子就換衫出去了。今年，冇消滅恐怖份子喇，不過係連線玩UNO，我仲(被批評為)好賤格咁羸左幾舖，但係我都冇好囂張咁大叫大嚷，因為玩玩下我年中時既痛症又發作。咁晌出發之前...我都仲可以訓近一個鐘...我以為訓一陣會唔痛，當然呢D又係我一廂情願既想法。 不過經過大半年來間歇性發作，發作起來每次都死去活來，雖然次次面青口唇白，手腳冰冷，同埋覺得與死神很親近，但係我每次居然都在數小時後繼續好好做人，仲更加談笑風生，實在自己都吹自己唔脹(咁係當然的)~~所以，我冇理到我有幾痛，我都係出左門口去參加。 我呢D其實唔係咁跑得既人，今年當然繼續跑10KM。帶痛之下，我速度好似冇乜慢到，跑跑下仲冇咁痛，前面依然有D大姐大哥唔夠兩公里就開始踱步，可能...佢地人生仲有大把時間，所以可以「慢」步人生跑，我呢D命不久矣既人渣，冇乜時間剩，只有搏命跑。 可能舊年寫DBS學生阻住本少爺既發財路，今年唔見佢地聯群結隊組成一字長蛇陣了，寫BLOG威力真係大，實在可喜可賀！ 我跑到終點，計過，應該係一個鐘左右，仲以為會快過舊年少少，但係今日出左成績喇，我係以個人時間一個鐘一分鐘廿二秒完成，性別名次係1793，總名次係2116。比舊年慢左5秒，唉...可能因為我中間甩左腳帶，用左10零秒來綁鞋帶...不過名次好似跌左好多，舊年明明係1000頭的...可能呢D就係跑馬拉松有如逆水行舟，不進則退。

渣打馬拉松，之前見人跑我跑，已經參加左兩年，跑10km，舊年改左路線，冇得跑西隧，不過唔知係咪東廊易跑，定係知道10km一定跑得晒唔駛留力，還是我真係勁左，舊年爭少少就可以一個鐘內完成。 我舊年睇過d成績，如果跑快多幾分鐘，個排名就會高好鬼多！ 所以，今天定個target為55分鐘內完成，另外，對於舊年阻狗住晒既跑手，我勸佢地最好~~~躝開！ 之前連右膝都有少少痛(左膝一向都會痛)，咁就要慢慢練強返對腳先至得，所以，要快D開始練跑了~~ 零七馬拉松 零七馬拉松(結果) 零八馬拉松 零八馬拉松(結果)

好了，奧運結束。 依家先至寫有關奧運既野，實在很配合我遲鈍既性格~~ 基本上...奧運，我都不是在家中看的，因為我屋企收得好利害，一個運動員佢會SHOW三個出來，所以那些萬人參與的浩瀚場面，會更加浩瀚的變了三萬人既場面，我一向怕人多，尤其對三呢個數目敏感，所以在家看，免了。 我沒有專登為了那一場比賽去看...賽程表看也沒看過，但不代表我沒興趣睇，實在，也是配會我順其自然的隨緣態度~~ 比賽都很好看，我最喜歡大家都全力以赴地去做一件事，不論那國家選手勝出都感覺很positive好熱血。有些比賽，還看到參賽對手們即使別人嬴了自己，都祝賀對方，相當識英雄重英雄。 其間出現了幾個話題： 1. 開幕的煙花有大部份是電腦效果，呢個我覺得相當好喎...因為很環保，又唔浪費金錢和資源，而且以假亂真的確係騙過了我(可能我真係很好騙~)，我係覺得佩服的！有D人可能覺得咁樣係欺騙，我諗因為大部份人唔鍾意俾人呃之剩，亦因為中國太多假貨記錄，俾人印象唔好(我係睇過有D人的批評係有些類觀點)。我又覺得咁喎，你當係魔術表演咁睇，感覺會唔會好D呢？都係表演啫！另外有D人又話唔拆穿咁就唔會破壞左佢心目中完美既一幕，我又覺得，唔拆穿就真係有欺騙民眾之嫌了...... 2. 代唱事件，呢個我都覺得有些少問題...但係，表演果兩位小朋友都唔係咁介意(可能唔識介意吧)，咁又有乜所謂呢？又係果句，D人又係覺得俾人欺騙左感情卦~~ 3. 劉翔退賽，我果日咁啱出畫室做野，可以清楚睇到個過程。又係兩方面意見，不過支持劉翔D好似比較多，我亦都係覺得佢好慘，出唔到賽佢都唔想，只係睇四年一度，世界大賽，練左咁耐，作為一個運動員，跑得到邊個唔想跑？果D什麼背負十幾億人的期望什麼的問題，我諗佢都真係有壓力，但係會唔會影響到因為怕輸而退出？我認為咁樣諗實在係侮辱緊一個負出血汗去挑戰極限既運動員。 從各媒介睇到果D話對劉翔好失望的人，我只係對人性又再一次失望。呢種情況就即係有D曾經為群眾謀利益的人，之後有一次的令人失望後，群眾隨即反轉豬肚，簡直萬試萬靈。請問果班曾經受過著數的人，佢地做過D咩呢？你估真係人地欠佢既咩？算了，我一向對果類人既態度都係唔怪佢地仲會深表同情，因為我一向都同情弱者的。我自己，都唔係叻，人地俾著數我我都好厚面皮唔知個醜字點寫咁照單全收，但係我唔會覺得人地俾唔到著算我唔係人地錯囉。 我覺得劉翔對腳係屬於佢自己...

其實天陰陰可還可以的，但有雷暴就太過份，小弟比較易過電，唔小心玩WAKE時俾雷劈死一定有一貨櫃的民眾會覺得這就是報應，所以經開會後又決定取消早上清晨的節目。 近來因為天氣關係，很多活動都眼白白地看著錯過。 多麼的讓人難過。

http://www.buywake.com/ 雖然，還是一個初心者，但居然已經在看一些私家裝備的資料。 沒想到，WAKEBOARD這運動會讓我玩到要看這些資料的程度！ 不過，應該看看就算好了，畢竟這是我所有嗜好中比較燒錢的活動，攝影貴也只是器材，而且可以借人的，WAKEBOARD是每次玩也所費不菲... 嗯...還是想想怎樣讓我其中幾樣嗜好讓變成賺錢的工具，還好至少畫畫已經算是一途！

今天晚上，突然有機會跟有「自稱」維園費達拿的Rai打網球，作為我在這公司臨別揪波儀式，相當夠意思，夠意思。 我在這公司工作近七年，一直沒甚麼機會跟同事們打波，而今天晚上居然在沒有預約而我又很得閒的情況下(前閒人俱樂部會長可不是浪得虛名)，又打一類我近十八年沒有打過的球類，實在有如九星連珠，百年才一遇。最厲害係我居然在唔會預放工後有波打的情況下而袋中有運動衣，一切就好像命中注定一樣。 當年曾經打過網球，約在中一的時候，其實只不過係一段很短的時間，而且我根本像是在打棒球多過在打網球，更好彩的是學校不算是飛機航道，如果唔係我一定會有飛機王子此類嘔心外號。 由於打得太差，又沒有錢買兵器，所以就走左去網球場隔離既足球場踢波，踢到對腳好粗同埋個人唔識高，令人好生後悔。 不過今日再次拿起球拍，居然覺得算係咁，可能因為之前太差，以致沒有期望之下喜出望外！ 其實究竟維園費達拿打得如何？嗯，還是給他保留些神秘感比較好。 明天就是本人逃出生天之日。 新之章開始。

我其中一樣覺得很慚愧的事，我總是很失落的時候，才很勤力地去師傅處練功。 由細到大，每一次，師傅總是好像知道我發生了甚麼事似的，我想是因為我用表情的表達能力很不錯又師傅的閱讀能力又相當出色之致。而他總是會有意無意之間說一些道理給我這個弟子聽，例如：唔好糾纏，千祈唔好糾纏。(教我們過手時手法要俐落一些)；不過我就是會聽到弦外之音，所以後來就是比從前撇脫了很多很多。 我自小到現在，教我各式各樣文武技藝的師傅有不少，每一個我都是一百二十個尊敬，但這個師傅就是特別地尊敬，可能因為他是特別聰明博學有智慧，在我心目中厲害得無話可說。所以即使我有好一段時間荒廢了所學的...但我在唔知自己想點的時候就會探下師傅，但求突然有一句半句話會被我聽出了只有我才能領悟的說話，好讓迷津得以被指點。 從數星期前開始，我又開始有規律地返師傅度，數來我沒有正式上去都有一年多了，發覺這一年多來沒有練過什麼的情況不是退步了，而是徹底廢功，這一年多的時間，居然有人令我徹底地廢去了武功，實在始料未及。還好師傅現在因要正式收生的原固，由最基本的都有一套全新又有系統的教程，結合其他體能上的訓練，我功力應該會回復得很快，甚至比從前更進一步。 師傅終於知道小弟已經辭退了工作，更看出了我是在鬥氣，雖然我極力否認我是在鬥氣，但師傅江湖閱歷深就真是無話可說，後來我想一想也真的知道自己也有賭氣成份。他說很多人功力突飛猛進都是因為辭了工，好得閒；但我上次經驗告訴我，我最功力大增的那一次是七年前給人一掌連人帶車打落山崖後，突然領悟得掌握了多種殺人的招式，事關我那時一心一意要找江湖上聲名狼藉的人物「義氣幾錢両」報仇說恨，唔學多兩招殘忍的殺人技倆，怎說得過去，不過現在回想起來，覺得自己是相當天真幼稚，因為殺了「義氣幾錢両」我也是沒有任何好處的，也得不到報仇的快感，不過，我還是苦練了專門對付姦淫之徒的人間絕技「噹噹踢」，事關我這個俠義之仕認為拆人祠堂，讓他一生沒用，每年要去泌尿科醫生處覆診，是一件令人相當賞心樂事的項目，係So Interesting & Amazing, Super fun。 這幾次上師傅度都見到小勤勤，小勤勤唔知點解依家鬼死咁勤力，同埋大隻左，由鋼條勤進化為超級鋼條勤或粗身鋼條勤，而且為人極COOL，問一句答一句，令到我這個師兄很沒趣，而且是自討的。不過看到從前一個傻頭傻腦的人會變成咁，即係令我諗起Adid...

在沒有太多準備及睡眠不足及心情仆街的情況下參加今年的渣打馬拉松...... 結果...造成個人時間一個鐘頭零一分十七秒。 比昨年的成績。一個鐘頭零八分多快了七分多鐘...... 明年目標：55分鐘內完成，因為我發覺如果在55分鐘內完成...排名已經可以在300以內(今年我排1013) 今年見到好多DBS既學生跑...佢地一字排開...攔住條路...阻卵住晒！

搬了過來新屋之後，其實我都跑了幾次，但都都試路性質。 今年再報十公里，改了跑東區走廊，用車跑得多，人未跑過，行路倒有試過...那年六四遊行... 離真正跑的日子不是很遠，只餘下二個月，要多跑才行。

自從跑又十K之後，都停了冇落樓下球場跑步，因為唔知點解，每晚都好唔得閒。 尋晚，終於下定決心，再次著起對跑鞋，落街跑步。 今次開始，會再由二十分鐘開始跑，但係會加快跑速，上年用的跑速，也實在有點閒。 跑完，終於開始有累的感覺。 訓練，從新開始。

星期日，跟朋友們去了行山。 一條導盲太帶著五個人，走了很高。很大霧，仿如置身雲萊仙景，很特別！ 到後來才知道當時行山的路線，這種行了才知道的經驗，相當好！ 認識了那麼久，終於拍了一張合照，很有意義！

今年係第一年參加渣打馬拉松，一早起身沖左個涼就出尖沙咀集合，見到果然有好多人，有好多人在地鐵站熱身同拉筋，你當地鐵站係乜野地方！ 放完行李同埋排隊去個廁所已經遲左開跑，我差唔多係最後跑果幾個人，不過無所謂，咁樣反而好，在後面追上前感覺總比俾後面成棚人過你頭好，的而且確，逢人過人是很爽的，比我用粗口問候別人的家人還要爽！ 而俾我過左既人我冇見佢地過番我，超越我既人又唔係好多，我發覺我都幾有實力，最後我用了一小時八分鐘跑畢十公里賽事，比目標快！因為目標定得太低了吧！ 我一直唔知十公里有幾遠，原來都唔係好遠，亦唔算好辛苦，可能多人一齊跑會唔同D，D人話有D地方會好辛苦，例如臨出西隧，出左西隧上橋，可能一早聽聽埋埋有心理準備，跑到又唔覺得係乜野一回事，不知不覺，就跑到終點。 全程都跑了很多平時行路行唔到既地方，的確相當過癮，難怪好多人當係嘉年華會咁一家大細或三五知己咁一齊步行全程，沿途欣賞風景風光如畫，有講有笑，拍照留念，阻鳩住晒。 跑完其實唔累，所以應原約去行山，由西貢行到馬安山。突然覺得自己體力都幾唔錯。 下年都會參加，因為想跑快D，同埋仲係未減到肥，想再鍛鍊下自己，我仍然係會報跑十公里，除左因為我冇信心跑半馬或全馬之外，主要原因係十公里比較多美少女參加，半馬和全馬很少，跑步都係為左開心O者，同美少女們一齊跑梗係好過同成班馬蘭路跑啦！ 美少女們，明年見。

目標：以均速跑畢全程，以一小時十五分內。

經過個多月的訓練， 除左跑得耐左快左之外，腿筋亦開始鬆了，咁樣，就可以開始練番最華麗的招式了。 首先要繼續拉筋，練好腰力來發動腿招，然後係出腿的速度，接著就係準確度。 就係咁，好快就應該有番出外撩是鬥非的本錢的，咁就隨時隨地教訓痛毆人渣的準備。 參考圖片

跑了一粒鐘。圈速又快。 心情差反而跑得勁。 keep住這樣就可以了。