燎原誌

到左2006年最後的一天，又是總結過去一年的時候了。 感覺上，過去一年，過得快，也沒有什麼大起大落的事和情。 番看了這一年來記了下來的說，做個總結。 年頭，由所羅門鬧哄哄地開始了這一年，在這騷擾事件，我本來由「想幫下朋友」，到「連笑佢都嫌浪費時間」，我其實很難接受自己這樣對待朋友，但我時間有限，而佢無限地發神經，正所謂「以有涯隨無涯，殆矣」，我只可以將這個人用我這年的時間減至最低，而我用的方法是放棄了本身對他的循循善誘，改為直接攻擊傷口，即把事實的真相告之，將他那自構的完美空間...他媽的拆掉，多麼的大快人心，而成效顯著，他真的很少找我，真係好。 如果你覺得我為人冷血，我也沒有辦法，姑且就當我是，就是了，我敢擔保，如果你也被所羅門找上，你大概會同意我所講的說話。又如果，你的工作的忙碌程度，跟我不惶多讓。 正當我對所羅門邊戰邊擺脫，我其實一方面又要應付公司的工作，搬office加負責大金額基建(所謂大金額只是對我公司而言)，經驗讓我知道，做這些幫公司花金錢，而回報不知何年何月才能報，再加上隨時隨地在你雖然已經太小心的時候也會爆鑊的豬骨assigment，如果不投入十二分精神，有甚麼厄運降臨的時候，會死得很難看。而今次籌備四五個月，戰戰兢兢地完成的項目，大問題有備而預防，小問題總算解決了，最後也沒有死得很難看的事件發生，算是一件成就。 殘兵組織仍然是一團糟，至少老闆是這樣覺得，我其實不斷有認真地檢討，我亦成功地給殘兵們洗了底，當然還有很大的進步空間，但常覺得沒有老闆們口中的差吧，那樣對我的團隊不很公平，當然殘兵們亦明白中間的矛盾，令我也不至太難做人，而我亦開始了改造計劃，希望就算不能號令三軍，也要好好地保護自己，常常給人家擺上枱，真的不行。有時候，想做個默默做事的人，也是很難的。 雖然生活的壓力大，但生活總括來說，也不算很難過，這是多得幾方面： 1. 朋友--小弟有幸能有一班好朋友，一些是新識的，年頭才識，一些識了很久，識了幾年至十幾年，無論是新識或識了很久的，交情淺或深，我其實都很少跟他們說自己的事，但有他們在，大家間中聚聚，這幾年也總算熬過來。 2. 虎bi--朋友之中，特別要提一提龍哥同娜姐，昨年開始，他們的虎bi就給了我照顧，說是我幫他們養虎bi，其實是虎bi令我這年來可以在工作很大壓力下還可以笑著過日子。 3. 郊遊活動--今天某天，開始被邀去行山到郊外走走

這幾年出了來工作過的平安夜，要返工，但早放，通常會搭巴士塞車返屋企，然後訓覺，平安到死，最好仲播首ekin的「夜還未深」！攞景兼贈慶！ 跟往年有些不同，今年聖誕的位處星期六日一，最加上有同事來香港玩兩天，又有人平安夜玩結婚，今年想平安靜靜過都不由得你。 十二月廿三日，早午帶了同事跟廖老師飲茶之後，我帶了他們出旺角然後就賣甩他們然後返畫室教畫。下課後再找他們吃飯，跟住又再用瞬間看壽頭的速度，帶他們從上環行到中環，再由中環行去冬季嘉年華....個門口，影幾幅相...好老實講，冬季嘉年華好似搞左好多年，我一次都冇入過去，犯不著因為幾個同事來香港過聖誕而「破戒」！哈哈~~~ 影完個摩天輪之後，我地再去prc必去的金紫荊廣場，再去cwb行下和去翠華食個麵，咁就消磨一個晚上。 十二月廿四日，朝早跟同事們食個粥之後就送佢地去搭車去碼頭同佢地講拜拜，我隨即回家倒頭大睡，訓夠後落街食少少野就返去換衫去飲小魔怪個餐，我個日其實唔知點著衫好，太隨便又唔好，太隆重又怪怪地，最後決定扮ocean eleven/twelve斑麻甩佬咁，formal dressing 減條tie...著到好似爛仔咁，出奇地，成斑同學都係咁著，真係有默契。去完飲，見尖沙咀咁多人，唔係咁想同佢地所謂分享節日的喜悅，因為我覺得好假，咁拿拿聲番屋企諗住早些訓，點知二公子在我歸家途中叫我食松記，why not...之後咁巧龍哥龍嫂打來，咁我又叫埋佢地食糖水，多d人，氣勢壯，食野食個勢，食糖水都唔會例外！食完佢地上來探虎bi，搞到虎bi掛住玩唔訓覺，細路女咁樣唔健康，不過聖誕節，算啦，俾佢放肆下啦。而二公子就仲係對佢個blue tooth handfree只係聽到三十秒而耿耿於懷，不停上網搵資料，當然最後無功而還。 十二月廿五日，我要有咁晏訓咁晏，但係都十一點就起身，只不過食完飯又好眼訓，又訓左一陣，咁之後就按原定計劃，接載jessie，二公子同vicki入龍哥屋企打邊爐，我又可以表現住家男人的一面，洗下d配料，切下豆腐蕃茄之類；同場原來龍哥個舊同事vito都好喜愛洗野，我諗男人到左某個地步就會 sell呢d family man feel...不過我唔係，我仲未到果d地步，我係諗住幫娜姐的...！飲飲食食熱熱鬧鬧玩左好多好玩既野，分別有層層疊，原來大家都好利害...仲有猜拳呀，非洲話事啤咁樣。玩到好夜就走，渣架車由南送到

今天traccy生日，祝佢生日快樂，同埋聖誕快樂，在今天早晨，她已和三陪兄到台灣過生日同過聖誕了，真係開心。 今朝爆鑊，碰巧我請了半天sick leave，咁就更大鑊，我後來想，這些年來少了出來對客做project，多數做in house野，搞到個人做野唔夠以前嚴謹，所以間中都俾人丙到七彩，這個要改善。 夜晚同祖母食飯，她出了院，精神算唔錯，不過食完飯又要入急症室，仲要留醫。 食完飯我有幾個同事來香港玩，由於只留兩晚，又book唔到酒店，所以會在我家留宿兩晚。我接左佢地來我家落腳後，就同佢地出去以極速走了個西九龍油尖旺，再去青馬觀景台看看。食個來鐘做咁多野實在係高效率！

經過個多月的訓練， 除左跑得耐左快左之外，腿筋亦開始鬆了，咁樣，就可以開始練番最華麗的招式了。 首先要繼續拉筋，練好腰力來發動腿招，然後係出腿的速度，接著就係準確度。 就係咁，好快就應該有番出外撩是鬥非的本錢的，咁就隨時隨地教訓痛毆人渣的準備。 參考圖片

Xbox360入手已個多星期， 一直都在玩gear of war戰爭機器 ，聽個名就知強勁，仲有就係玩download 落黎的lost planet online demo，兩隻都係d第三身射擊動作遊戲，可上網對戰。 基本上成部XBOX360既靈魂就係佢個online平台xbox live，d遊戲唔係上網同其他人打，就沒有意思了，我用了micro$oft既product十九幾年，xbox live 既design係我到目前為止最欣賞的。 xbox live唔只可以即時同一大班人打，仲有幾個特點： 1. 統一平台 -- 一個account就可以玩晒所有上網遊戲，唔似ps2，連上網都有困難，仲逐隻game計錢，又唔似電腦game，上網係好易，但係隻隻game都要記一個login同password，相當煩。 2. gametag-- 有一個統一account既好處係，上網add左d game友，佢有玩d乜野game，你都可知道，咁你如果又有果隻game，又可以叫佢一齊玩。個gametag又可以post出來，俾人地見到而佢又有興趣同你玩咪又可以add你，好易就可以識到game友... 3. 即時對話--Xbox個手制可以駁住個headset，xbox live又support你一路打機一路同人傾計喎，呢個真係相當有趣，除左打機時可以溝通增強合作性，得閒仲可以吹水，好似我同二公子咁，咪一路保世界和平，一路講是講非，好似佢同我講，話傻佬文話我大鼻，成日在言論上教訓佢，個情況就好似我從前上佢屋企玩一樣。個咪仲有個用途就係俾我地在果d醜陋既怪獸撲埋來時驚叫同講粗口，嘩...你話，娛樂性係幾咁幾何級數地提昇呢！誇張d講，爛game都可以好好玩呀...... 講番隻game，真係幾有趣，仲有大量西洋粗話學，玩得多學多幾句，真係同外國人嘈交都完全唔會處下風，真係相當有實用性。d怪獸又樣衰非常，所以我地打爆佢個頭同用電鋸切碎佢地果陣係好有爽快的感覺，將平日受左果d冤屈氣發洩出來。 而隻lost planet係demo，隻game都ok啦，反正都係拎住枝槍成個悍匪咁四周咁射，但係我唔係咁在意呢d野，反而我要多謝xbox live給我見識了一樣野，由於xbox live會同你match一班來目世界各地既gamer一齊玩對戰，同你一齊玩既有很多外國人，英美法意德日成個八國聯軍咁，咁其實我很樂

祖母得了重病，這個星期在檢驗身體後都在北區醫院留醫。 今天去了醫院探她。 我由細到大都覺得祖母是相當健康的，走路分分鐘仲快過我......今天看見的祖母，是我沒見過的憔悴，畢竟這不是普通傷風感冒。希望祖母早日康復吧。 探完病後，突然發覺了一些問題...... 我跟祖母，以及其他親戚，嚴格來說，其實沒有溝通可言。 由小到大，除了自己一房的家人外，我與其他親戚的關係都比較疏離，連年紀差不多的表弟妹也不會怎麼連絡，我也不知道是甚麼原因，可能是我性格太異類，令其他人難以理解，要數對我比較了解的，應該只有娘親大人同阿姨而已。其他人也不是不疼我，但就是溝通不來，所以除了每年各大小節日性活動見面講講些日常生活，知道大家大概是在做些什麼以外，我對各親戚都不十分了解，而我也覺得，他們之中絕大部份，對我也是完全不了解的(當然他們應該有一些會覺得他很了解我。) 我其實也跟過祖母生活過，也不記得是三二天，還是一個星期，也一同到過北京旅行，但也是不多溝通，可能佢覺得我呢個木木訥訥既孫仔很無趣，都費鬼事同我講野。雖然係咁，但祖母是很疼我們的。 希望佢快些好番。 p.s. 1. 孖仔細佬還沒有出現過。 2.聽朝上珠海要通知老爸。

正所謂光陰似箭，好快咁，又到左十二月十四號。 今年很出奇地，在這日子的破曉時份，(我因為要跟二公子合作保護世界和平而好「早」訓)，居然在臨訓前在網絡看到她。難得咁巧合，咪講左兩行字然後訓覺囉，冇講其他多餘野，表現相當唔錯，簡直稱得上大方同埋得體。 睇番這年來，因為那件事都叫做告一段落，我也沒有再自欺地過日子，但是那件事仍對自己有一定的影響力，有輕度的條件反射，都唔係話完全可以擺脫過去，不過我會盡量改變。好多野唔想重蹈覆轍，要對自己老實些，唔可以重覆犯錯。

跑了一粒鐘。圈速又快。 心情差反而跑得勁。 keep住這樣就可以了。

得到家姐通知，收到了壞消息，希望一切平安。

日期：2006年12月04日 中 文 大 學 開 新 書 院 ， 因 為 選 址 稍 為 偏 僻 了 一 點 （ 由 火 車 站 步 行 約 十 分 鐘 ） ， 遭 中 大 學 生 會 會 長 施 城 威 批 評 ， 他 說 校 方 興 建 新 書 院 沒 有 問 過 學 生 意 見 ： 「 如 果 冇 配 套 交 通 措 施 ， 走 讀 生 會 唔 會 有 興 趣 走 返 去 參 加 活 動 呢 ？ 咁 樣 無 法 發 揮 書 院 功 能 。 」 中 大 新 亞 書 院 創 辦 人 錢 穆 先 生 在 《 我 和 新 亞 》 一 文 （ 刊 於 一 九 六 二 年 《 新 時 代 雜 誌 》 ） 中 講 過 一 個 新 亞 學 生 的 故 事 。 那 時 候 新 亞 書 院 還 在 深 水 桂 林 街 ， 共 有 三 間 校 室 。 錢 先 生 憶 述 那 位 學 生 ： 「 他 起 初 申 請 入 學 的 時 候 ， 已 經 年 過 四 十 ， 是 一 位 兩 腿 帶 六 七 處 傷 疤 的 退 役 軍 人 ， 住 在 調 景 嶺 難 民 營 ， 擔 任 日 夜 輪 流 守 衞 的 工 作 ， 有 一 點 低 微 報 酬 ， 可 以 維 持 生 活 。 為 了 想 到 新 亞 來 讀 書 ， 就 向 營 方 的 負 責 人 要 求 全 部 改 調 守 夜 的 職 務 ， 竟 沒 有 得 到 允 許 。 他 說 ： 『 如 果 我 的 志 向 遷 就 了 現 實 ， 一 天 也 不 能 生 活 了 ； 寧 可 失 掉 吃 飯 的 工 作 ， 而 決 不 失 卻 求 學 的 機 會 。 』 後 來 他 的 難 友 們 同 情 他 這 種 刻 苦 好 學 的 精 神 ， 有 意 成 全 他 ， 就 聯 合 起 來 要 求 把 各 人 的 夜 班 都 和 他 的 日 班 互 換 ， 主 管 也 感 動 地 讓 步 了 。 從 此 以 後 ， 他 就 夜 間 守 衞 ， 白 天 上 課 。 自 調 景 嶺 到 學 校 ， 快 步 跑 一 趟 要 費 兩 個 小 時

上月定下的目標： 45mins 超額完成--50mins，比預期理想。 希望其他方面都係咁。

淫詹結婚，我同二公子做兄弟，要好早起身，我地都遲左起身，好彩良好駕駛技術同駕駛態度為我們爭取番些時間。 我地有好多時間佈置花車，同影相，仲拍video，好鬼多花款，但係影完一大輪，我地仲有好多時間俾人玩...... 花車，搵架舊車(比較來說)來做主花車，突顯新郎樸實無華的高尚情操！ 我做過幾次兄弟，都未試過接新娘要接咁耐......足九十分鐘，係一套港產片既時間，玩既都冇乜野，不外乎係食d好難食既野同埋做d好嘔心既野，不過做蝕卓兄弟，算啦，詳細情況唔好講，我亦都唔係好想記起。 其實接完新娘番男家都冇乜野做，見悶就同二公子作孖車對決。或者戴住個handfree 扮G4...，相當幼稚同無聊。 行禮在酒樓舉行，呢一點我好欣賞，因為唔駛周圍去，我架花車行得好少路，時間又唔迫，賓客又唔駛走兩場，太好了！ 宴會OK啦，反正我一向覺得去飲好悶，不過淫詹有一班好幫佢手既朋友，他們的情緒都好高漲，搞氣氛很好。全晚高潮所在，係佢地俾左個驚喜詹太，唔單止新娘感動到喊，連d姊妹甚至果個冷笑話ｍｃ兄弟都流下眼淚，認真眼淺，淫詹冧人確係有一手。 你睇下淫詹果樣真係好淫 搞左地晚，車埋佢地連同佢地ｄ家當返去，都兩點了。 雖然好攰，不過做兄弟無所謂。有一樣野要讚下淫詹，佢的確係一個好識做既人。

早年，我同一個同事許下承諾，如果佢搵到女朋友，我就會買xbox ... 當時，xb360都未出。 詳情請看： 呢篇！ 你睇完上面果篇野都知道，佢超額完成。 雖然我仲未買xbox，但係我呢個人一向牙齒當金使，絕對唔係信口開河既人，我講得出，就一定做得到，除非你首先背信棄義，所以，xbox360，我係會買既！ 呢一排，加上康哥同二公子推波助瀾放晒毒，又send d promotion girl既相(當然呢個唔足以成為理由，除非個promotion girl會陪我一齊玩既o者)，gears of war又的確好似好好玩，而且又臨近我唔係咁喜歡既聖誕節，而我有好幾年都會在聖誕節前去買野俾自己玩以解寂寥：dreamcast，ps2個軚盤(冇乜用過)，改ps2直讀 老馮呢d成部8088pc(廿年前的電腦)的速度既人都立即上網買左，我地全部人估都估唔到佢會最快行動。 我相信呢種種環境配合會加速了這個計劃。

我其實有認真地問淫詹一個問題叫做請教下佢。 佢話：其實呢d野係睜在confirm既o者！ 我話：如果咁，會有其他人都可以同佢confirm喎。 所以話，佢其實個世界好簡單，而我，就至少我自己會諗得好複雜。 以一般常理來諗，的確係會好混亂。 雖然話係就係唔係就唔係但係真係費事要唱一場誤會。 判斷力下降， 防守能力等如零。

講完人間之慘劇，不如講下幸福的典範。 淫詹，係姓詹的，我不知道佢係咪真係好淫，不過個名係二公子改的，一直以來，我們改人外號都唔會錯得去邊，如果論外型個名的確係相當入型入格。淫詹係二公子的同學，細個讀書時我間中會同佢地出下去吹下水，所以識佢。 淫詹星期日就結婚了，我同二公子會去做蝕桌兄弟，我仲出埋架歌路娜俾去做主花車，佢認真識諗，唔嫌棄我架車唔夠冠冕堂皇，仲話架車好，佢咁講我都真係唔好意思。 淫詹出來做野也不過三至四年(都唔知有冇...)，但係已經撈得唔錯，兩年前已經計劃今年的結婚，真係深謀遠慮，又買樓又盛，好不巴閉。 根據二公子講，當年佢讀書時成日話佢十八歲開始計要追十二個女朋友，一年一個，到三十歲結婚，估唔到佢講得出做唔到，只係追左一個女仔，仲提早做左結婚，好冇口齒。 我話晒都年長過淫詹兩年，加上我覺得佢成日講野好無聊好幼稚(其實我地大家都係)，我成日都覺得佢好細個，佢一話結婚，我真係打個突，然後立即檢討自己，態度好積極。 星期一淫詹拿著大雄同靜兒要擺o向我部車度(結婚車頭公仔)，又試下綁落個車頭度，之後又好有心機咁收番對公仔同卷好d絲帶，我即刻讚佢個人好認真好企理，不過我又隨即知道係佢老婆叫既，佢話：「係呀師兄，好似我呢d咁打「撈較」既人，唔搵個咁識打埋野既老婆，咁就會世界大亂。」世界大亂，實在太睇得起自己！ 之後我同佢順便食餐飯吹吹水，因為淫詹講野同我一樣好無聊，所以我可以成晚亂up一通，但係大家又可以知道大家講緊乜，又好好笑！ 傾到十點幾，佢睇下隻錶，同我講：「師兄，我同你傾多三個字啦，你知唔知，我以前都會出去出到好夜，但係宜家唔會lor...我十二點前一定會番到屋企架，呢d咪叫回塘lor...」頂...俾佢吹漲... 佢同我講：「我覺得你係會三十歲人，突然會識左個女仔二個月之後會同佢結婚果d人，因為到時候你又好成熟佢又好成熟，又有經濟能力，最重要係你會覺得：『係佢架喇』」我當時淨係反駁：「我好早已經好成熟啦！」我估唔到佢會再反駁：「但係你識d女仔唔成熟嘛，你成日識d靚妹...」嗯，係好野喎！ 唔知點解，成日都識到d咁有趣既朋友。

我有一個朋友，係小學同學，雖然佢三四年班已經轉左校，但係我同佢仲一直有聯絡。 他這些年來的生活，大概係我所認識的人之中最慘的。 一切，就從IT呢一行變成夕陽工業開始。那一年科網爆破，那位朋友，就叫他K先生吧，就開始失業，正職，freelance都冇。他早婚，老婆台灣人，育有一子，正所謂貧賤夫妻百事哀，生活出現了問題，精神亦出了狀況，要看醫生。幸好屋企還有點錢，生活還可以過，但是這只不過是個序幕。 在這段其間，夫妻關係不好，佢老婆成日上網打online game，一日到黑對住部電腦，家頭細務唔做都算，又唔理個仔，就係咁，夫妻關係出現好大問題。 在經濟上，K先生總算渡過左最難過的時期，最後仲可以搵到份工，在輕鐵工作，人工唔高，不過有份野做下叫做好好，佢唔算好識得理財，所以生活只不過係緊緊夠，有拖欠信用卡數，早一年前都同我講話用低息貸款還了卡數，仲剪埋張卡，咁還幾年就可以還晒。 誰不知，現在才是地獄的開始。日前佢打電話俾我傾計，其實佢兩個月前打過俾我，但係因為車仔結婚我當時唔得閒聽，後來又冇打電話問候下佢。講番原來佢當日打俾我想同我傾計，因為又係屋企有事，仲好鬼大鑊，佢老婆原來o向出面借左大額金錢，所謂大額，係廿萬，但係現在要還三十六萬，即係淨係利息要十六萬，仲係今年內的事，咁鬼高息，即係同吸血貴利王借啦。但係佢老婆又唔肯講發生過乜野事，為乜借咁多錢。最後仲要K先生個爸爸拿錢出來幫手還，但係都唔係還晒... 這就是大概的背景交待同事件經過，時歷四五年，很多細節省略。 先不作評論，只是如果那些遭遇發生在自己身上，真的會受不了，撐唔到落去，K先生算是堅強硬錚的了。 當然，成件事K先生也不可以說全無責任，有些位置如果及早溝通處理，可能無咁嚴重，但係客觀環境因素亦係太多，經濟唔好，無錢的確好惆悵，老婆面對這個環境所採取的態度，也不是老生常談和她好好地溝通就搞掂，講就乜野都易，實際上要處理的就完全同講係兩回事。 成件事，由佢話結婚到今日，我都係果句，佢當時太早結婚，好多野未有基礎，日子唔會易過。第一步已經錯，之後可以選擇既路好有限，想東山再起咩？有發展事業的大計嗎？呢d野，通常過程好大風險，要放棄好多野，要挨，要搏，並唔係每一個有頭家既人可以承擔的，仲要身邊果個人唔係你人生中的助力，相反係渡有落地獄的加速劑。 現在，只有給他多些鼓勵，支持下佢。

一年多前，燎原火美食團曾組織過一次元朗大榮華，不過當年太夜入到去，好多人輪隊不特止之餘伙記亦太臭串，所以冇食到，變左蹲大排檔，野食一般就算，其實仲好有風味添，但係在一年得幾日冬季的香港咁樣，唔係個個朋友頂得順。 九月大榮華在九龍灣開業，我地借亨少牛一出師之名，再試。 因為娜姐寫得好精采，我又冇影相，所以慳番，大家睇娜姐的好了。 萬眾期待–九龍灣大榮華 by貝拉夫人

http://www.whobirdyou.com/whobirdyou/thought_action.asp 燎原火 的 思想體檢報告 魅力（Charisma）： 5 待人氣度與手腕 理性（Senses）： 8 歸納與推論的邏輯概念 感性（Sensibility）： 6 情感與美感的靈敏度 深度（Sophistication）： 5 思考的深度與透徹度 社交（Socialization）： 8 對於社交活動的接受度 熱情（Passion）： 5 自動自發的執行力 知識（Intellectual）： 8 學習與知識的駕馭潛能 樂觀（Optimism）： 8 積極與進取的思維 悲觀（Pessimism）： 5 消極與保守的思維 責任（Responsibility）： 7 規劃與受託的潛能 領導能量： 67 你領導才能普普，屬大將型人才。 社交能量： 66 你喜歡社交活動，但對其也不是非常重視。 思考能量： 71 喜歡動腦，只是思維深度還有進步的空間。 鬥志能量： 64 不嘗試怎麼知道自己不行，對不對？ 藝術能量： 53 你的藝術才能並不差，應繼續進修培養。 科學能量： 74 注意自己，不要被意識形態牽著鼻子走。 創意能量： 63 想要有創意，先從建立自己的觀點開始。 靈感能量： 66 靈感來自於敏銳的觀察力，多觀察社會現象。 戀愛能量： 60 雖不是大情聖，但是也是有自己的一番浪漫情懷。 優點： 重義氣，對朋友全心全意的付出不會佔別人便宜。 充滿鬥志、自動自發、不認輸的性格，做人處事積極主動。 對現況接受度高，不多對人做質疑。 有強烈的道德感、為人付出不遺餘力。 中規中矩，盼望過無憂無慮的平凡生活。 缺點： 容易受到感情生活而突然變了一個人，傻傻地受感情支配。 做事缺乏長遠的計畫，難以站在指揮的位置上。 性格較剛烈、自尊心強、難以接受批評，應學習控制自己的脾氣、別意氣用事。 剛愎自用。 容易因為太專注於工作而