燎原誌

話說上個月24號，係我請左一個星期假既最後一日，趁著我仲有一日空閒，而咁巧合地我已經完成左手頭上個幅油畫，即係話...又要買畫布...之前聽講話深圳有個地方賣油畫材料工具好平，咁上網search左一輪搵到資料之後，就於當日下晝出發... 果個地方叫大芬村，晌布吉附近，出左羅湖火車站據說係有巴士坐既，本來我最近由一個偽富家子降級為「真‧死窮鬼」後，理應係坐巴士既，但係我真係等左成廿九幾分鐘都等唔到有車，心情真係好無奈。就係咁，我就帶著無奈截左架的士了..... 大約廿分鐘車程，見到呢隻大手，就知道到左了~~ 落車之後入村，好快我就搵左有一間賣畫布既，問左價錢，嚇左一跳，爽快地落ORDER，因為要一個鐘先整好，所以我就四圍咁參觀下。 基本上成條村都係畫廊，畫室，賣工具材料既店舖。賣油畫的，雖然只係畫行貨，但係都算唔錯架喎，至少快同埋抄得似。我覺得，如果晌呢度日日畫行貨，畫半年，至少技巧會係幾何級地進步的。 村內有部份有特色建築物外牆畫。 仲有個藝術館，開緊個畫展，D畫...有D唔錯...有D我唔識欣賞。 仲有一間叫燎原畫廊....我影左張相...俾入面既員工叫我唔好影...可惡，居然見到佢地老闆都唔認得，仲唔俾佢影相！ 一個鐘後，去返我落ORDER既舖頭，見佢仲未整好晒，我就揀左其他野，包括筆，顏色之類既野，之後搞掂晒，就走人返香港了。 呢一疊就係買返來既畫布，20"X24"布連框價值RMB10/塊，我一共買左10塊，我一年畫唔到三幅畫，呢度夠畫三年有多了。香港買同尺寸同質料畫布，承恵60元，仲係已經去D平既地方買仲打左折俾你。你話我問價時係咪嚇左一跳？所以我都係扮諗左一陣就落order了... 連埋車馬既錢除返開都係上面買平D...不過要自己搬10塊畫布都幾重...下次都係問埋有冇其他人一齊買，然後搵運輸送落來！ 不過呢D都應該係好多年後既事了，哈哈哈！

上回講到，經過三個小時既路程，終於都上到鳳凰山之顛，一廂情願以為可以安安樂樂等太陽伯伯躝出來，點知山上比想像中多人，而且仲開P，D電筒不停顏射本人，如果有個DJ晌度播歌捽碟及咆哮，我會以為我落左D。你睇我影張靈異照，幾咁迷幻......一定係有人晌呢個P場賣迷幻藥... 晌個D場...唔係，晌山上好寂寞咁呆等左兩小時四十五分鐘，見到D迷幻青年男女開始清醒返...開始SET返D架生影日出，可惜，是日多雲。剩係睇佢地個背影都感覺到佢地既無奈。其實，我感覺唔到佢地有幾無奈，我只係自己覺得有少少無奈。 不過既然無日出，唯有影下D雲，風無相，雲無常，千辛萬苦之下無得影日出的確係令人感到人生既無常。雖然只係得雲影，不過晌山上咁高影，角度層次都同地面望既好唔同！係，我只可以咁樣開解一下自己。 我影左好多張雲，係SET定左腳架，大概一分鐘影二張左右，所以連起來可以睇到D雲既移動，但係始終天灰灰，加上我攝影技巧實在係LIMITED COMPANY，D相可觀性並不高...唯獨，我喜歡呢張，個天出現個2字！2字，就好似說明左我條命咁...無論我幾咁努力做得最好，對人有幾好，永遠，地位都唔會係坐正，唔會係第一果個。經過咁多年，經歷咁多人，我差不多已經接受同習慣左咁。 影左十至十五分鐘，就落山了，上山容易落山難，落山其實真係仲累過上山，我成日都覺得自己會「鐘」落山，咁就真係......一了百了...但係，最後我都平安咁落到山！ 落山中途見到有耶穌光現像，又急急拿相機，急急咁影，又因為真係太急，我體力又到左極限，影得真係唔好！不過，算啦。 落到山，姐夫及他的同事，晌山腳等我地(佢地上左一半就落返去)，出返東涌，食完早餐，就搭車閃了。 我冇即時返屋企，我出左維園攞馬拉松既參賽號碼之類既野先返屋企！仲要只係瞓左一個鐘就又有地方要去了，不過呢個又係另一個故事了，搵日都會寫一寫呢個故事。 就係咁，就完成左登上鳳凰山呢一件挑戰了。今次影唔到日出，究竟仲會唔會上多一次呢？都係遲D先算啦。

年初二時，一家人在祖母家時，姐夫提起的鳳凰山影日出之行，昨天最終決定成行。 跟二公子及朋友們吃過宵夜(他們的晚飯)及糖水後，我十二點半前已抵達東涌，一點零五分已在伯公坳開始上山。 同行的有姐夫和他兩個同事，二姑姐一家三人，和我。 起程不久，姐夫之同事不太舒服，結果二姑姐一家和我先走，本身路程是三公里，路牌指示路程約二小時多，但其實山高路斜，難度是中高的(我覺得)，我們慢行加常休息，剛好三小時上到山頂，即零晨四點。其實當時我已經好累！ 上山時天氣還不錯，我仲看見滿天星斗，不過我一上到山頂，拿出相機的時候，就已經好多雲，看不到了！不過有一刻能看到咁多星星本身已經好賞心悅目，可惜，浪漫的事情只能一個人欣賞。 鳳凰山頂好多人，而且越臨近日出時間，就越來越多人，離天光仲有兩三小時，本來想恰一會，但實在太嘈，同埋很多電筒顏射過來，讓我訓唔到，相當可惡！ 冇錯，就係有好多人，好嘈，仲食杯麵，晌上面氣溫得十度八度或更低的情況下，格外可惡！ 由於我實在太累，寫住咁多先！

http://www.buywake.com/ 雖然，還是一個初心者，但居然已經在看一些私家裝備的資料。 沒想到，WAKEBOARD這運動會讓我玩到要看這些資料的程度！ 不過，應該看看就算好了，畢竟這是我所有嗜好中比較燒錢的活動，攝影貴也只是器材，而且可以借人的，WAKEBOARD是每次玩也所費不菲... 嗯...還是想想怎樣讓我其中幾樣嗜好讓變成賺錢的工具，還好至少畫畫已經算是一途！

這幾年出了來工作過的平安夜，要返工，但早放，通常會搭巴士塞車返屋企，然後訓覺，平安到死，最好仲播首ekin的「夜還未深」！攞景兼贈慶！ 跟往年有些不同，今年聖誕的位處星期六日一，最加上有同事來香港玩兩天，又有人平安夜玩結婚，今年想平安靜靜過都不由得你。 十二月廿三日，早午帶了同事跟廖老師飲茶之後，我帶了他們出旺角然後就賣甩他們然後返畫室教畫。下課後再找他們吃飯，跟住又再用瞬間看壽頭的速度，帶他們從上環行到中環，再由中環行去冬季嘉年華....個門口，影幾幅相...好老實講，冬季嘉年華好似搞左好多年，我一次都冇入過去，犯不著因為幾個同事來香港過聖誕而「破戒」！哈哈~~~ 影完個摩天輪之後，我地再去prc必去的金紫荊廣場，再去cwb行下和去翠華食個麵，咁就消磨一個晚上。 十二月廿四日，朝早跟同事們食個粥之後就送佢地去搭車去碼頭同佢地講拜拜，我隨即回家倒頭大睡，訓夠後落街食少少野就返去換衫去飲小魔怪個餐，我個日其實唔知點著衫好，太隨便又唔好，太隆重又怪怪地，最後決定扮ocean eleven/twelve斑麻甩佬咁，formal dressing 減條tie...著到好似爛仔咁，出奇地，成斑同學都係咁著，真係有默契。去完飲，見尖沙咀咁多人，唔係咁想同佢地所謂分享節日的喜悅，因為我覺得好假，咁拿拿聲番屋企諗住早些訓，點知二公子在我歸家途中叫我食松記，why not...之後咁巧龍哥龍嫂打來，咁我又叫埋佢地食糖水，多d人，氣勢壯，食野食個勢，食糖水都唔會例外！食完佢地上來探虎bi，搞到虎bi掛住玩唔訓覺，細路女咁樣唔健康，不過聖誕節，算啦，俾佢放肆下啦。而二公子就仲係對佢個blue tooth handfree只係聽到三十秒而耿耿於懷，不停上網搵資料，當然最後無功而還。 十二月廿五日，我要有咁晏訓咁晏，但係都十一點就起身，只不過食完飯又好眼訓，又訓左一陣，咁之後就按原定計劃，接載jessie，二公子同vicki入龍哥屋企打邊爐，我又可以表現住家男人的一面，洗下d配料，切下豆腐蕃茄之類；同場原來龍哥個舊同事vito都好喜愛洗野，我諗男人到左某個地步就會 sell呢d family man feel...不過我唔係，我仲未到果d地步，我係諗住幫娜姐的...！飲飲食食熱熱鬧鬧玩左好多好玩既野，分別有層層疊，原來大家都好利害...仲有猜拳呀，非洲話事啤咁樣。玩到好夜就走，渣架車由南送到...

Xbox360入手已個多星期， 一直都在玩gear of war戰爭機器 ，聽個名就知強勁，仲有就係玩download 落黎的lost planet online demo，兩隻都係d第三身射擊動作遊戲，可上網對戰。 基本上成部XBOX360既靈魂就係佢個online平台xbox live，d遊戲唔係上網同其他人打，就沒有意思了，我用了micro$oft既product十九幾年，xbox live 既design係我到目前為止最欣賞的。 xbox live唔只可以即時同一大班人打，仲有幾個特點： 1. 統一平台 -- 一個account就可以玩晒所有上網遊戲，唔似ps2，連上網都有困難，仲逐隻game計錢，又唔似電腦game，上網係好易，但係隻隻game都要記一個login同password，相當煩。 2. gametag-- 有一個統一account既好處係，上網add左d game友，佢有玩d乜野game，你都可知道，咁你如果又有果隻game，又可以叫佢一齊玩。個gametag又可以post出來，俾人地見到而佢又有興趣同你玩咪又可以add你，好易就可以識到game友... 3. 即時對話--Xbox個手制可以駁住個headset，xbox live又support你一路打機一路同人傾計喎，呢個真係相當有趣，除左打機時可以溝通增強合作性，得閒仲可以吹水，好似我同二公子咁，咪一路保世界和平，一路講是講非，好似佢同我講，話傻佬文話我大鼻，成日在言論上教訓佢，個情況就好似我從前上佢屋企玩一樣。個咪仲有個用途就係俾我地在果d醜陋既怪獸撲埋來時驚叫同講粗口，嘩...你話，娛樂性係幾咁幾何級數地提昇呢！誇張d講，爛game都可以好好玩呀...... 講番隻game，真係幾有趣，仲有大量西洋粗話學，玩得多學多幾句，真係同外國人嘈交都完全唔會處下風，真係相當有實用性。d怪獸又樣衰非常，所以我地打爆佢個頭同用電鋸切碎佢地果陣係好有爽快的感覺，將平日受左果d冤屈氣發洩出來。 而隻lost planet係demo，隻game都ok啦，反正都係拎住枝槍成個悍匪咁四周咁射，但係我唔係咁在意呢d野，反而我要多謝xbox live給我見識了一樣野，由於xbox live會同你match一班來目世界各地既gamer一齊玩對戰，同你一齊玩既有很多外國人，英美法意德日成個八國聯軍咁，咁其實我很樂...

早年，我同一個同事許下承諾，如果佢搵到女朋友，我就會買xbox ... 當時，xb360都未出。 詳情請看： 呢篇！ 你睇完上面果篇野都知道，佢超額完成。 雖然我仲未買xbox，但係我呢個人一向牙齒當金使，絕對唔係信口開河既人，我講得出，就一定做得到，除非你首先背信棄義，所以，xbox360，我係會買既！ 呢一排，加上康哥同二公子推波助瀾放晒毒，又send d promotion girl既相(當然呢個唔足以成為理由，除非個promotion girl會陪我一齊玩既o者)，gears of war又的確好似好好玩，而且又臨近我唔係咁喜歡既聖誕節，而我有好幾年都會在聖誕節前去買野俾自己玩以解寂寥：dreamcast，ps2個軚盤(冇乜用過)，改ps2直讀 老馮呢d成部8088pc(廿年前的電腦)的速度既人都立即上網買左，我地全部人估都估唔到佢會最快行動。 我相信呢種種環境配合會加速了這個計劃。

一年多前，燎原火美食團曾組織過一次元朗大榮華，不過當年太夜入到去，好多人輪隊不特止之餘伙記亦太臭串，所以冇食到，變左蹲大排檔，野食一般就算，其實仲好有風味添，但係在一年得幾日冬季的香港咁樣，唔係個個朋友頂得順。 九月大榮華在九龍灣開業，我地借亨少牛一出師之名，再試。 因為娜姐寫得好精采，我又冇影相，所以慳番，大家睇娜姐的好了。 萬眾期待–九龍灣大榮華 by貝拉夫人

星期五回到工作崗位，即刻周身唔舒服...真係唔知乜野事，心理問題定風水問題，一坐番落公司個位度即刻覺得好唔妥....最麻煩係，身體又唔會衰到要入醫院架喎...你話，如果突然要做到入醫院，入去休息一排，應該唔錯....我其實唔介意有乜野病，但求唔駛受苦就休息一頭半個月或者唔駛受苦就死左佢算罷啦。 很不情願地做左一日野，之後應二公子約去和富中心果頭食飯，除了二公子同埋陳小姐之外，仲有陳小姐的父母，組合相當奇怪，食飯算係為左慶祝二公子生日(生日快樂)，唔知點解叫埋我，其實唔計今次，我都係見過陳小姐父母一次，陳小姐話阿伯母成日講起我，真係唔知點解，二公子話我很受家長級年紀人仕歡迎，其實咁樣又有乜野用呢？唔好講呢d無謂野，講番餐飯，有好多美味佳餚，聖子大隻得來好好食，用XO醬煮的確未食過，龍蝦仔荷葉飯好香，龍蝦仔仲多過飯，豉油雞好滑，好香好甜，仲有其他的都相當ok。最重要係平均每人都係$140蚊，都係一個相宜的價錢。 飯後阿伯母已經約定下次的活動，我發覺近來好多人開始好關心我既事，會安排好多野來幫我...其實，我都唔知自己係咪需要......不過我係好多謝佢地的...呢類事件我都唔識講，可能搵日寫一篇講下自己的想法都未定... 由於個糖水好鬼象徵式，我同二公子返到長沙灣再食一個正式的...好鬼飽...又要勤做運動。 現在好多朋友都在香港島工作甚至居住，搵日可以組織去多次！

連埋星期日同埋重陽節假期，我總同放左五天假，明天又要返工了...今日被問我放假做過d乜，當時真係答唔出，因為我真係好似冇乜做過d乜....但係現在回番帶，又唔係喎... 星期日，同四爺去練跑之後幫龍哥搬家，有意義的一天。 星期一，一大早同廖老師入南丫島，途中影左今日已經收了皮的中環天星碼頭，去到南丫島試左果間上次經過但係冇幫趁，門口有隻好Q大的熊公仔既「士多」食野，食佢地即刻由塊田收割落來的白菜，難得我地有時間陪阿娘，她那天玩得好開心。 夜晚約左詹兄試下佢結婚果日條賽道，我其實對於佢搵我架車做花車好有保留...說到低也不過是一部爛鬼日本車...不過佢唔介意就算吧。佢為左報答我呢個師兄，請我食飯，席間都傾左好多野，應該話我問左佢好多野，因為我對佢遲我幾年出來做野，但係已經有樓呢件事好出奇...說到底是我太不濟了吧... 星期二，訓到十點幾十一點...唔知做左d乜，晏晝落左深水埗維記食蛋牛麵加映西多同埋凍檸茶，跟住出左太子俾d野阿廖老師，再去書屋睇左一陣書，然後返屋企訓左一陣。夜晚約左恒商的同學及中六的英文老師Mr. Neu食飯，原來我d英文算係ok的...當晚又學左幾句英文粗口....但係現在又唔記得左了... 星期三，訓醒之後又落深水埗食晏....行左一陣高登，因為受龍哥及二公子所托幫手買機，先睇下d價錢...其實我真係唔熟買機既野...一向買機都相當馬虎，尤其係買俾自己的時候... 夜晚就陪廖老師出席佢個靚女學生的婚禮，o向萬麗呢d地方擺確係一分錢一分貨，d野幾好食...其中最特別係有個環節係要幫佢地將來個bb改名(先旨聲明，佢地未有bb的)，我咁醒，呢d野當然交俾廖老師填埋佢啦(寫個名o向張紙度)，點知...被選中有獎品，好彩我之前雖然冇填但係都有睇過廖老師寫乜名，仲即刻o向台上胡亂吹左個點解改呢個名的理由出來，唔係就真係出洋相了，獎品係支紅酒。 星期四，訓醒之後去左ikea買左塊鏡，因為自從換左個衣櫃之後個房就冇鏡，買個鏡其實主要個原因係，對住來練功夫，會有成績d...同埋，如果日日見到自己個身型，就會好有決心地keep...當然，呢樣野唔係對個個人都有效...有d人心理質素差，會自暴自棄，甚至自殺，後果嚴重，唔好亂學。 夜晚traccy因為轉到工請食飯，我遲到，被鬧一鑊，好對唔住，其實遲到有幾個原因，第一因為我要幫佢地燒隻碟，跟住搭巴士遇到交通意外，不過呢d...

娘親大人居然叫我地星期一重陽節去南丫島行吓，佢老人家咁好興緻出到聲，我呢d孝義仔，第一時間答應，唔好叫我正日去拜山就得了。

對上一次有大規模好吃懶做遊樂團，已經係昨年六月，咁耐唔搞，因為真係好難約的，我個人又好鬼懶，實在又好鬼忙，所以到今時今日，先至有機會搞d野！ 呢個月頭，趁住有幾日假期，o向一個月前，已經開始約定d朋友，不過好唔好彩，因為在約人時又考慮究竟星期日去好定星期一去好，但係又冇通知澤少，搞到期間澤少約左人，最後去唔到，相當遺憾，下次真係要約得好些，安排好些！ 今次既行程係先唱K，後食飯，再品嚐糖水，都幾行~~ 唱K的朋友有龍哥，龍嫂，亨少，大華，愛麗斯，今次難得唔係百日咳病發期，唱歌冇credit limit，唔駛辛苦身邊的朋友全程有咳聲伴奏...，我最驚嘆現在K房有機打有網上，真係利害，我咁都驚嘆，可想而知我幾落伍！ 唱夠之後二公子同vicki同大妹 join下場到東涌食海鮮。今次由亨少架車帶頭，我一味死跟就到左馬灣村一間村屋度食飯，呢度d野食都相當美味，而且價錢便宜，圍起上來每人百五蚊有找，食海鮮來講去邊度搵，真係要特別鳴謝有「算死草」之稱，「寸草不生」陳大華。 食完再死跟亨少架烈火戰車入大埔食糖水，其間龍哥同大華大談屎尿屁，研究排洪工程，佢地係講到停唔到的，不能自控。笑鬼死！ 呢種活動其實相當開心的，今次澤少join唔到，遲d再搞！ coming soon: - 九龍灣新開張大榮華 - 燒野食 不過唔知幾時得閒！ 二公子的海鮮團