燎原誌

 沒有更新下這個網誌很久，不如寫一下： - 2020年不知不覺已經來到9月，香港的情況越來越差； - 差的是整個港共政府，死差佬，議會代議士，仲有香港人......； - 政制方面不要存有希望，經濟一直也不健康，所謂疫情都是被人撚化的； - 有些朋友已經離開香港了，快到呢....... - 畫室呢年來都清閑了很多......生活全靠有份穩定受薪工作...... - 這份工作已經做了5年多...... - 是份很輕鬆的工，薪金不算很高但總算夠用，只要不揮霍； - 如果生活習慣好一點自律一點還應該可以好好善用時間； - 不過好像沒什麼動力呢......... (下回再寫.......)

隔咗咁耐，終於睇咗呢套早輪大熱的新海誠作品。 簡單劇情：男女主角發現自己間中發夢變咗另一個人生活，實情係兩個唔知點解間中交換了靈魂(!?)，互換時大家代替對方打工，媾女，織繩(女主角係地方神社家族族人，而繩在故事有特別意義)，直至某天再沒有互換，而男主角憑佢記憶畫的畫找到女主角生活的地方，發覺原來一切事都是扣扣相連...... 有睇部份新海誠之前的作品，都是滲透著超寂寞的感覺，直到故事結束；但你的名字居然故事中已有不少輕鬆的情節，而且居然是Happy Ending，其實臨結局前一段仍是覺得又是擦身而過，然後心想做新海誠作品的男女主角真係慘，好彩最後所有角色都有好結局。 畫面跟前作比較更加悅目，故事吸引了，輕鬆了，沒有了那種命犯天煞孤，無伴終老，孤獨一生的感覺，係好睇的。 IMDB： http://www.imdb.com/title/tt5311514/ #你的名字 #yourname #kiminonawa #新海誠

幫朋友訂碟訂的片，自己睇咗先至俾佢...... 劇情交待：蠢姐妹去墨西哥旅行，膽生毛地跟當地麻甩佬去近距離睇鯊魚，結果成個鐵籠跌落47米深，海底黑媽媽，氧氣又快用晒，仲有鯊魚添，點算好呢？ 後感：睇完覺得其實坐定定等人救其實生存機會應是最大，劇情安排既情況未至於造成咁大危機，不過算啦，唔好駁故；而唔駁故的情況下，娛樂性不算太豐富，女主角姐妹演的蠢過隻豬姐妹花很入型入格，完全感受到果種令人生厭的白痴性格和行為。 鯊魚反而很少出場，可能片酬有限。 IIMDB: http://www.imdb.com/title/tt2932536/?ref_=rvi_tt

去年年尾，買了一套兩個來回行程的機票，可一段時間選兩個地方，所以今年前半年已在四月及六月走了兩轉。 四月去東京，六月去沖繩。 而去年六月去過大阪，十二月台北。 再上年去過美國參加朋友婚禮。 去來去去都係呢啲地方。 來緊嘅wishlist： -- 巴黎 (因為之前去香港果個羅浮宮展覽) -- 德國 -- 英國 -- 青島 -- 冰島 -- 北海道 差不多，暫時係咁。

Shut In (冰鎮房客) 集合所有驚慄片元素，心理醫生女人仔加行動不便繼子，住偏遠地區，有一日佢一個病人(小朋友)响佢屋企失蹤後，由不安到開始疑神疑鬼，再適逢暴風雪來臨，可怖(可笑)事件發生！ 套戲個戲本...睇咗半個鐘就可以斷定很九流....雖然很故弄玄虛但很易一眼看穿，倒是有一個位係俾佢嚇一嚇，用的是典型的配樂加突如其來的聲效，係囉，其實要被嚇也是很簡單的。但成套戲故事很一般，說來說去也不覺得入正題，原來已經入了......從個小朋友病人突然唔見咗，到阿女人仔主角成日發惡夢(或其實係現實)，都唔覺得舖排咗啲乜，突然呢就到咗暴風雪，突然呢幕後黑手就出，綁起咗阿女人仔，呢一刻，所有所謂迷團已經解開晒了，而黑手就走咗去捉小朋友了；雖然綁女人仔綁得好鬆，鬆到睇緊戲果個都覺得可以輕鬆地一邊飲杯凍奶茶一邊解結都得，但個女主角要用好好笑的方法解困，真係落力。 之後，大家响間屋度走來走去，再追出屋外，然後黑手就被幹掉了~~ 黑手係邊個？唔知點解，我睇到女人仔醫生攞佢個繼子條頸巾同冷帽俾個病人小朋友戴，我就估到成套戲劇情同個結局了！好彩套戲個半鐘咋屌~~ IMDB: http://www.imdb.com/title/tt2582500/ #shut_in #movie

搵隻陳年科幻片睇，夏里遜福福伯演出的Blade Runner。 82年科幻片Blade Runner , 翻查資料香港當年譯作2020，劇情簡單到不得了，21世紀的未來充斥著被科學家開發的複製人去處理危險的工作，而因某些限制，複製人只有四年壽命，而故事有四個複製人偷咗隻太空船返地球，去搵發明佢地的創造者，希望可以延長壽命，而福伯就係奉命去阻殺佢地的殺手。 此片被喻為百年經典，個人覺得應該係佢拍得氣氛很出色，場景很精緻，未來感重得來又很能表現出城市的墮落感。場景很有日本色彩，可能因為80年代的日本是科技走在世界最前。 劇情沒什麼好話了，簡單直線劇情而又感覺上有點無謂，而探討的主題以現今來看是很落伍，例如製造複製人的道德問題，複製人感情之類；當然，35年前這些話題是前衛的，而且以35年前的拍攝技術，拍出這些畫面和氣氛，是超強的。 IMDB: http://www.imdb.com/title/tt0083658/