文章

顯示包含「虎兒誌」標籤的文章

小貓咇咇

圖片
話說廖老師唔知幾時開始成日都話要搵多隻貓仔返來陪下虎bi... 最後,大概六月中既時候,就接左一隻B返屋企了。 呢隻B本來已經被改名,但係因為被批很娘,所以我又再同佢改一個。(而好娘果個名,我唔記得左了) 佢返到來屋企已經唔驚,好活潑好百厭,仲跑得好快。既然你跑得咁快,就叫你做咇咇啦! 咇咇貓,哈哈! 咇咇熱愛攝影,一攞部機出來就望住個鏡頭! 咇咇熱愛睇電影,成日坐正晌個電影前面...D人一郁仲會撲佢。其實我很擔心,因為屋企部電視係我供的,連冇嘢做果段日子都唔例外,一部同我共患難的電視機,花左爛左壞左點算? 咇泌熱愛我部電腦,記住只係我部電腦...成日坐晌我個MON前面,MOUSE CUSOR去到邊會跟到邊!然後會撲,同樣我也很擔心!另外佢太喜歡坐上我NOTEBOOK個KEYBOARD上面,賴死唔走。 咇咇和虎BI會讓我精神些開心些,其中一個原因係,我叫佢地個名,佢地會好用力咁回應你。 其實,我對人的要求也不過如此。

古怪虎BI

圖片
如果唔係放大假,我真係唔知虎BI同周公子既關係如此親密。 多了時間在家,日日好多時間同虎BI你眼望我眼,咪以為我成日在家虎BI會好高興覺得有人成日陪住佢,其實我從佢眼神睇得出佢係相當之不爽的,覺得我日日在佢身邊行來行去幾咁騷擾好鬼死煩令佢冇覺好訓。 睇下佢,仲霸左我個位...仲扮人咁訓....激死...(虎BI按:係你條死鏟阻Q住晒仲惡人先告狀) 咪以為我迫到虎BI冇定企.....其實訓膠袋紙袋係虎BI其中一樣嗜好!好一隻性格和興趣古怪的貓。 的確,我真係成日煩虎BI的,我會成日同虎BI講埋D古靈精怪野。 「喂,虎BI。」 「......」一臉不屑地擰轉頭望一望我。 「乜你真係識聽你叫虎BI架?」 「其實,你知唔知....你可以唔係叫虎BI,虎BI其實係虛構出來的,其實根本可以完全唔存在既,不過其實唔只你,世界上好多野都其實都係虛構既,有D事其實從來都冇發生過.......」 基本上,唔單止貓聽唔明,就算係人都聽唔明,其實我自己講都唔明。 九唔搭八既主人,就有古古怪怪既貓。

虎BI的照片

圖片
雖然虎BI冇著衫..... 但係佢都冇冷親! 同場加映: 年花習作

傷健貓

圖片
我都冇留意到...原來我張貼虎BI的照片中,大部份佢都係訓左O向度的... 如果唔講,各位可能會認為我隻係...癱既

睡睡貓

圖片
近來虎BI總是要走來訓一覺才走。 可能知道我心情麻麻,陪下我!

虎bi看病記

在三月三十一日星期六晚,返到屋企,虎bi照舊坐o向個門口迎接我,當時我見佢仲好正常,但係過左一陣,我發覺虎bi有點唔妥......佢坐o向度,神情呆滯,我走埋去,諗住同佢玩下,哄下佢開心,點知佢想走開,但係又冇力跑,又發出痛苦既叫聲,此時我發覺,虎bi好似係受左傷。 我唔知虎bi幾時整親,細心d檢查一下,應該係左後腳有事,但係又有反應,應該唔係骨折,我唔知發生乜事,即刻check下有冇24小時獸醫,然後打電話去問下,問左地址登記左,我再睇下虎bi,睇下佢情況,我希望佢只係一時拗親,只係痛一陣,費事去到如果佢又扎扎跳,盞玩野,同埋,半夜睇急症,真係貴到飛起。睇佢果陣,佢真係痛到不停咁哀號,我唔忍心,我荷包痛肉痛好過見到佢痛我又心痛,都係即刻車佢出去睇醫生。 帶虎bi入袋時都好多波折,佢又唔肯入袋,又驚整親佢,吵吵鬧鬧最後幾經辛苦先將佢放到入袋。 三少同我一齊車佢出去,到左診所,等左好耐醫生先睇佢,冇計,因為撞正有隻八哥狗媽媽生狗仔,相比起上來虎bi的確係需要等下。其實虎bi自入袋之後都冇再哼過一聲,充分咁表現出佢堅韌的一面。八哥媽媽生左一輪,produce左五六隻小八哥之後,阿鬼佬醫生「Dr. 波特」就得閒睇虎bi了。 鬼佬醫生檢查左虎bi一陣,大致發現左虎bi應該係整親條backbone近條尾果節骨,所以痛到郁唔到,跟住就決定照X光證實下。照X光前,醫生同虎bi打左支針,係麻醉針之流,等佢照X光時唔好四圍郁,醫生打左針後,話要等十至十五分鐘,虎bi就會訓覺,咁我地就坐在醫生間房入面,等虎bi訓著,點知,虎bi唔訓之餘,仲四周圍望,不減平日過份旺盛的好奇心。十分鐘廿分鐘過去了,虎bi冇訓到,我實在十分敬佩虎bi那種對抗藥力的意志力,反而我同三少就眼訓到死。最後,虎bi都冇訓到,但係都夾硬同佢照,冇計,虎bi都係鍾意在清醒的時候影相,以確保影得佢靚,女孩子,就係咁。 張靚女相曬左出來,真係發現條尾其中一節骨有事,咁鬼佬醫生話其實都冇乜野可以做,因為佢會自己慢慢好番,咁佢就同佢地支消炎針,開d消炎藥俾虎bi食。然後,又諗住袋佢入袋返屋企,點知,入袋又入左好耐,事關虎bi又唔知發乜鬼小姐脾氣,又或者可能太喜歡間診所唔捨得走,入袋時wewa鬼叫,又亂抓一通,極具攻擊性,好似拍緊驅魔人咁。我從來未見過虎bi咁,而全間診所既職員都十分驚,可惜,佢地雖然驚,但係並沒有唔記得收錢,十...

重複犯錯

我尋晚又做左一件錯事,就係放虎入房。話說虎bi每逢臨訓前,都會入我間房玩一輪,行行企企,搞下我桌面d野,先肯去訓(通常係因為我要訓,請佢出去),不過我尋晚太累,冇體力請佢出房,由得佢留o向間房度,咁就鑄成大錯。 我星期日,去買左個新headphone,好鬼好架,今朝,虎bi就同我咬爛佢喇! 記唔記得四月果陣時--- headphone 呢d,咪就係重複犯錯lor~~ 我,係唔應該未問過虎bi就將headphone擺o向桌面的。 我,係抵死的! 我,係重複犯錯~~

哈佬喂虎bi

圖片
據我所知,虎bi呢一世貓到目前呢一刻都應該只過過一年萬聖節 ,而且佢前主人娜姐都應該冇帶過佢去海洋公園哈佬喂,唔知點解,虎bi呢排會將屋企條走廊,扮到好似海洋公司哈佬喂的鬼屋似的,即係,嚇到你好好笑,好開心,好頂癮。 呢度就係鬼屋既佈置,右邊係虎bi做完手術運送佢返來既容器,虎bi好喜歡匿o向入面(呢張相,虎bi就係匿左入去)。 近來,臨近萬聖節,虎bi就好鍾意玩哈佬喂,夜晚,我有時會出去房飲水,去?所,我呢一種早已經同黑暗融為一體的人,係唔會開燈咁老土既,咁o向呢條走廊 走動,係相當有氣氛既,而阿bi,就會o向呢個時候,o向佢匿緊個袋度,伸隻手出黎撩你一野,甚至撲出來,懶係相嚇到你好驚咁,情況就好似海洋公園哈佬喂咁,分別係,海洋公園果d所謂鬼,係唔准掂到你,而虎bi係想點就點;另外,海洋公園會收你錢,而虎bi,你唔餓死佢,佢就會相當落力咁同你玩,工作態度良好。 估唔到,虎bi係咁有節日氣氛既! 如果你想感受下萬聖節既氣氛,又唔想俾錢海洋公園賺,可以來我家行下條走廊,先旨聲明,阿虎bi係一隻bb貓女,佢同好多女仔一樣,好情緒化,未必會entertain你,不過我就唔會情緒化好stable,一定會收入場費!

決心

圖片
20060815151 Originally uploaded by 火 . 你地睇下,虎bi個表情幾堅定,一副下了決心的樣子!!

打爛玻璃

阿虎bi呢排唔知佢做乜,成日打爛我間房d野,首先係我用黎裝野食的玻璃瓶,之後係別人送俾我的紀念品,真係要諗辦法預防一下。 對於虎bi的惡行,唔知點解,連廖老師都會包容佢,佢真係唔知行乜野狗屎運!