燎原誌

LOST，我其實只係睇左SEASON ONE，又好想睇落去，但係又睇緊Prison Break 喎。都唔知幾時開始，有睇電影劇既興趣，雖然，唔算得上著迷上癮，但係同以前比較係有好大改變。 睇以下段野，睇黎呢套LOST有排搞... http://www.worldjournal.com/wj-en-news.php?nt_seq_id=1437458

娘親大人居然叫我地星期一重陽節去南丫島行吓，佢老人家咁好興緻出到聲，我呢d孝義仔，第一時間答應，唔好叫我正日去拜山就得了。

我一直想keep番好似以前咁...步履如飛，踼彈牆旋風腿等高難度動作，奈何打左呢份工之後，食無定時，訓就好定時地....夜訓，經過幾年之後，搞到自己都好唔滿意自己既身形，生得細粒都算，肥就唔好啦，須知我平生叫親d肥仔就一定會加個「死」字o向前面，如果自己都變埋死肥仔就真係搞到自我形象好差。(肥二唔萛，因為我叫肥二做肥二，唔係叫肥仔，所以唔駛加個死字o向前面) 咁我d種成日都自我反省既青年，發覺自己有問題，就會正視同埋作出反應改善，咁幾年前我見自己身體愈來愈弱雞，就決定以跑步作為主要運動，而我亦真係有坐言起行，不過，實在太唔定時，得閒時會跑得密d，忙果陣就會停一排，身體運動下的確健康左，但係仲係未夠... 我有諗過join gym，理論上俾左錢會認真去keep住做，不過呢個理論唔apply o向我身上......因為我有太多白洗了錢但係又唔太在意的記錄，而且我實在說服唔到自己做「俾錢去跑步」呢種事，明明有長長的街和大大個球場在樓下，我又冇興趣玩其他器械和上札札跳堂，的確沒有必要。還是走落樓下跑算了。 之前四爺講開佢和佢的女朋友會跑渣打馬拉松，我之前都有興趣，不過無人提過我又冇乜intention去報，今年佢講起咁我又拿拿聲報左名。 今次跑係為了加強自己的恒心和決心，迫自己定時定候練跑。 我跑十公里項目，可以一嘗用雙腳走過西隧，希望可以令自己真係變番強d。 佢地話一齊練跑，我梗係無所謂，況且我的確係有跑開的，一齊練也不過係換過場地，多幾個人跑，冇咁悶。 如果你都想跑，咁就報名，一齊跑吧。

人在珠海，尤其是只得我一個人時，係可以好早訓的。 咁話說我尋晚早返宿舍，睇左兩集prison break，的確係幾鬼好睇，跟住頂唔住眼訓就訓喇，咁早訓，但係今朝都遲起身，仲要都係好眼訓，全日都係好眼訓，中午趁未開會仲大模斯樣訓左一粒鍾，但係都仲好眼訓。 到依家都係冇精神，頭又痛，現在就返宿舍訓喇，希望唔係病啦。

我尋晚又做左一件錯事，就係放虎入房。話說虎bi每逢臨訓前，都會入我間房玩一輪，行行企企，搞下我桌面d野，先肯去訓(通常係因為我要訓，請佢出去)，不過我尋晚太累，冇體力請佢出房，由得佢留o向間房度，咁就鑄成大錯。 我星期日，去買左個新headphone，好鬼好架，今朝，虎bi就同我咬爛佢喇！ 記唔記得四月果陣時--- headphone 呢d，咪就係重複犯錯lor~~ 我，係唔應該未問過虎bi就將headphone擺o向桌面的。 我，係抵死的！ 我，係重複犯錯~~

對上一次有大規模好吃懶做遊樂團，已經係昨年六月，咁耐唔搞，因為真係好難約的，我個人又好鬼懶，實在又好鬼忙，所以到今時今日，先至有機會搞d野！ 呢個月頭，趁住有幾日假期，o向一個月前，已經開始約定d朋友，不過好唔好彩，因為在約人時又考慮究竟星期日去好定星期一去好，但係又冇通知澤少，搞到期間澤少約左人，最後去唔到，相當遺憾，下次真係要約得好些，安排好些！ 今次既行程係先唱K，後食飯，再品嚐糖水，都幾行~~ 唱K的朋友有龍哥，龍嫂，亨少，大華，愛麗斯，今次難得唔係百日咳病發期，唱歌冇credit limit，唔駛辛苦身邊的朋友全程有咳聲伴奏...，我最驚嘆現在K房有機打有網上，真係利害，我咁都驚嘆，可想而知我幾落伍！ 唱夠之後二公子同vicki同大妹 join下場到東涌食海鮮。今次由亨少架車帶頭，我一味死跟就到左馬灣村一間村屋度食飯，呢度d野食都相當美味，而且價錢便宜，圍起上來每人百五蚊有找，食海鮮來講去邊度搵，真係要特別鳴謝有「算死草」之稱，「寸草不生」陳大華。 食完再死跟亨少架烈火戰車入大埔食糖水，其間龍哥同大華大談屎尿屁，研究排洪工程，佢地係講到停唔到的，不能自控。笑鬼死！ 呢種活動其實相當開心的，今次澤少join唔到，遲d再搞！ coming soon: - 九龍灣新開張大榮華 - 燒野食 不過唔知幾時得閒！ 二公子的海鮮團

屋企部機多災多難，繼上次燒左火牛後，今次仲中病毒，雖然唔算太大鑊，但係一諗到要用時間來搞掂佢，就覺得好浪費時間。 其實唔算太大鑊係因為我部機仲可以正常運作，不過有好多野俾隻毒搞亂晒，第一，所有shortcut key，例如win+r，win+e用唔到，相信係佢唔想你開到個command prompt出來，第二，在start按唔到個command prompt，第三，ie 個option setting按唔到，第四，一開host file佢就同你刪左佢，好鬼煩。 我話晒都做電腦行業，雖然其實我唔係好鍾意，好有興趣，講玩電腦我唔可以同果狂熱份子比較，但係搞到咁真係好慚愧。 諗諗下，真係想轉行，我諗到三個option..... 1.二世祖 2.少爺 3.太子爺 但先旨聲明，我係唔會理盤生意既，淨係俾錢我洗得架喇！呵！

呢排好忙，好多想寫底既野pend住o向度，再唔寫，就唔會寫.... 廢話少說~ 寫！ 由接到婚訊到完成做兄弟的任務，前後不過兩個星期，車仔做野真係好似架烈火戰車一樣咁快，兵貴神速，呢個就是經典級的例子了！ 本來車仔話淨係請d親戚朋友食餐就算，點知佢地居然可以愈搞愈大檀，一發不可收拾，本來化繁為簡，結果搞到完全唔似係一個只係用左兩個星期安排既婚禮，勁！諗起平時果d約食飯都約幾個星期，直情要食塊慚愧波板糖呀！ 既然由化繁為簡變到相當grand，咁好多接新娘呀，輪住飲茶呀果D遊戲節目都省唔番，咁「兄弟」呢種道具，我又要客串一下，另外，車仔仲有一個任務俾我，就係接載D姊妹。我當時聽到，的確係覺得車仔係「幾咁夠兄弟呀！」<---括住呢句野，理解力正常的你，一定知道暗藏的含意。 姊妹未見到，唔講住，先講「兄弟」，那班兄弟，我係一個都唔識，一個都未見過的，不過唔緊要，我o向接新娘其間已經記晒佢地個名同個樣，當然，依家唔忘記左喇。 其實整天都沒有甚麼好講的，接新娘時見到那些所謂姊妹，已經暗叫「回水」，好彩d姊妹創作力相當一般，我地呢班兄弟都冇乜做d難受既野，我仲食左d糕點同埋飲左杯廿四味，幾有益，幾健康呀！ 之後d家長飲茶，我就用從亨少借回來的相機影相，單鏡機真的確不同，好好feel！不過暫時都係冇錢，唔會買住！而且，我一向都認為，工具是次要，art sense，創作力才重要！中午好得閒，o向酒店hea左成兩個鐘先至去香港公園影相，不過我實在好怕o向香港島駕駛，尤其是放工時間，真係好鬼塞車，去金鐘果程都ok，回去跑馬地先至甘，我渣手波車，吊極力子真係攰過行路呀。 不過有兩件好彩的事，首先係二公子在行禮前出現，回程時坐我架車，好等我不用太悶，仲有就是後座那兩位「姊妹」的確係令我唔需要太顧及佢地的感受，所以佢地坐我架車由金鐘到跑馬地足足悶左成個幾鐘，我都冇話唔好意思。你話如果後面坐的係似樣d既，我一定會覺得好對唔住佢地。 o向馬會度飲，都唔錯，就係咁，我呢個從來冇入過馬場賭既人，已經o向晒沙田同跑馬地度參加過兩個婚宴。 再祝福車仔。 應肥二DANNY要求，post相...機會難逢，有幾會post有人樣的相，仲要有我在其中！千祈唔好見新郎個樣咁老成(d兄弟都係)，就以為我(地)年紀好大，論年紀，我地應該同年，我仲應該好大機會係佢地之中比較大果個，但係我唔係佢地咁老餅！

據我所知，虎bi呢一世貓到目前呢一刻都應該只過過一年萬聖節 ，而且佢前主人娜姐都應該冇帶過佢去海洋公園哈佬喂，唔知點解，虎bi呢排會將屋企條走廊，扮到好似海洋公司哈佬喂的鬼屋似的，即係，嚇到你好好笑，好開心，好頂癮。 呢度就係鬼屋既佈置，右邊係虎bi做完手術運送佢返來既容器，虎bi好喜歡匿o向入面(呢張相，虎bi就係匿左入去)。 近來，臨近萬聖節，虎bi就好鍾意玩哈佬喂，夜晚，我有時會出去房飲水，去?所，我呢一種早已經同黑暗融為一體的人，係唔會開燈咁老土既，咁o向呢條走廊 走動，係相當有氣氛既，而阿bi，就會o向呢個時候，o向佢匿緊個袋度，伸隻手出黎撩你一野，甚至撲出來，懶係相嚇到你好驚咁，情況就好似海洋公園哈佬喂咁，分別係，海洋公園果d所謂鬼，係唔准掂到你，而虎bi係想點就點；另外，海洋公園會收你錢，而虎bi，你唔餓死佢，佢就會相當落力咁同你玩，工作態度良好。 估唔到，虎bi係咁有節日氣氛既！ 如果你想感受下萬聖節既氣氛，又唔想俾錢海洋公園賺，可以來我家行下條走廊，先旨聲明，阿虎bi係一隻bb貓女，佢同好多女仔一樣，好情緒化，未必會entertain你，不過我就唔會情緒化好stable，一定會收入場費！

本來，諗住一口氣將近來想說的都寫出來，點知電腦火牛突然燒了，真係好有timing.... 現在用緊舊果部機，我都唔只一次讚呢部用左八年既PII-350耐用.....好鬼利害。 冇心機....記低左d topic 先 TOPIC IN QUEUE Carson 結婚 燎原火遊樂團 哈佬喂虎bi 工作的補完計劃<---(都唔知自己講乜....) 再次看大哥的電影 唉~~~無啦啦d野都會壞.....激死..... 突然想換左部機..... 突然想有好多錢......oh...對唔住，講錯...呢個一向都想的...