燎原誌

幫朋友訂碟訂的片，自己睇咗先至俾佢...... 劇情交待：蠢姐妹去墨西哥旅行，膽生毛地跟當地麻甩佬去近距離睇鯊魚，結果成個鐵籠跌落47米深，海底黑媽媽，氧氣又快用晒，仲有鯊魚添，點算好呢？ 後感：睇完覺得其實坐定定等人救其實生存機會應是最大，劇情安排既情況未至於造成咁大危機，不過算啦，唔好駁故；而唔駁故的情況下，娛樂性不算太豐富，女主角姐妹演的蠢過隻豬姐妹花很入型入格，完全感受到果種令人生厭的白痴性格和行為。 鯊魚反而很少出場，可能片酬有限。 IIMDB: http://www.imdb.com/title/tt2932536/?ref_=rvi_tt

Shut In (冰鎮房客) 集合所有驚慄片元素，心理醫生女人仔加行動不便繼子，住偏遠地區，有一日佢一個病人(小朋友)响佢屋企失蹤後，由不安到開始疑神疑鬼，再適逢暴風雪來臨，可怖(可笑)事件發生！ 套戲個戲本...睇咗半個鐘就可以斷定很九流....雖然很故弄玄虛但很易一眼看穿，倒是有一個位係俾佢嚇一嚇，用的是典型的配樂加突如其來的聲效，係囉，其實要被嚇也是很簡單的。但成套戲故事很一般，說來說去也不覺得入正題，原來已經入了......從個小朋友病人突然唔見咗，到阿女人仔主角成日發惡夢(或其實係現實)，都唔覺得舖排咗啲乜，突然呢就到咗暴風雪，突然呢幕後黑手就出，綁起咗阿女人仔，呢一刻，所有所謂迷團已經解開晒了，而黑手就走咗去捉小朋友了；雖然綁女人仔綁得好鬆，鬆到睇緊戲果個都覺得可以輕鬆地一邊飲杯凍奶茶一邊解結都得，但個女主角要用好好笑的方法解困，真係落力。 之後，大家响間屋度走來走去，再追出屋外，然後黑手就被幹掉了~~ 黑手係邊個？唔知點解，我睇到女人仔醫生攞佢個繼子條頸巾同冷帽俾個病人小朋友戴，我就估到成套戲劇情同個結局了！好彩套戲個半鐘咋屌~~ IMDB: http://www.imdb.com/title/tt2582500/ #shut_in #movie

搵隻陳年科幻片睇，夏里遜福福伯演出的Blade Runner。 82年科幻片Blade Runner , 翻查資料香港當年譯作2020，劇情簡單到不得了，21世紀的未來充斥著被科學家開發的複製人去處理危險的工作，而因某些限制，複製人只有四年壽命，而故事有四個複製人偷咗隻太空船返地球，去搵發明佢地的創造者，希望可以延長壽命，而福伯就係奉命去阻殺佢地的殺手。 此片被喻為百年經典，個人覺得應該係佢拍得氣氛很出色，場景很精緻，未來感重得來又很能表現出城市的墮落感。場景很有日本色彩，可能因為80年代的日本是科技走在世界最前。 劇情沒什麼好話了，簡單直線劇情而又感覺上有點無謂，而探討的主題以現今來看是很落伍，例如製造複製人的道德問題，複製人感情之類；當然，35年前這些話題是前衛的，而且以35年前的拍攝技術，拍出這些畫面和氣氛，是超強的。 IMDB: http://www.imdb.com/title/tt0083658/

新海誠作品。 短短40分鐘故仔，故事講述學生哥每逢雨天總會逃學到一個庭園避雨而遇到一個靚女姐姐，漸生情愫，而靚女姐姐郤是另有身份和故事。 幽幽的氣氛，畫面悅目舒服的。 IMDB: http://www.imdb.com/title/tt2591814/

Loki (對不起我一直都是咁認佢) 主演的電影。 故事講述中產階級醫生主角入住一楝大廈所見的所經歷的。 主要是以大廈來比喻現今社會的問題就是了。可惜劇情混亂，某些想探討的不夠深刻，浪費原著小說，劇本，演員。 IMDB: http://www.imdb.com/title/tt0462335/ #邪神 #Loki #   Tom Hiddleston #highrise

喜歡看杜琪峰導演的作品。 不過最近數套作品都沒有進場看，都是買碟回家看的。 其實想進場看的，不過看杜琪峰導演大部份的戲比較麻煩，就是找不到女孩子陪你看，而基於朋友們都同意二個男人或以上一起進場看戲是一件極度悲哀相當沮喪的事情，而我亦只得在特定情況下才會一個人看戲，而撞不中那特定情況而片子落了畫，那便只好等出碟。 1. 為什麼找不到女孩子陪你看？ 一來，我就是認識的女孩比較少，而即使認識很多女孩子而會一起看戲的，對杜琪峰電影，也是一道難題，因為通常女孩子都沒太大興趣看他的戲，其實我沒有特別研究過原因，簡單地說...就是這些電影大部份的對象都是男孩子，都是拍給男子漢欣賞的！ 戲中的事情，那男人之間的情義，女孩子都未必會明白。 由鎗火到PTU，黑社會，放逐等，你問一問看過的女孩子，她們應該都不太欣賞，因為沒有太大感覺吧！ 對男子漢來看，其中簡單的對白，鏡頭中的一個眼神，那種默契，那種心照，都很有意思。 還有的是，杜琪峰的電影會看仍舊看到真正的男人，不再是那些那些不知道還有沒有男性器官的娘娘腔...那些表演組合，知道嗎，不舉例子了~~ 看杜琪峰的電影，就是令我知道這世上還是有很多男人的！ 2.什麼時候是一個人看戲的特定情況？ 就是一個人閒逛或極度疲勞，然後唔小心亂走入了戲院。

終於看了這套買了不記得多久的動畫。 淡淡的情感，很細緻。   全套動畫以三個短篇串連，內容不多說，整體來說是個簡單的純愛故事，結局不是Happy Ending，很正常。 印象最深刻是第二段，主角搬了去沖繩讀書，在校有個女孩子暗戀主角多年，有一日，她決定表白，但最後，也放棄了表白，原因是在某一刻她突然覺悟到一直從主角流露出的眼神，是在望著遠方的另一個她，而眼下根本就沒有她。明知道沒有結果，只好放棄，縱使還是深深的喜歡主角。 是的，看著別人的眼睛，總是知道很多事情似的，看到最多的，就是，她眼中其實沒有你。 最後一篇，主角長大成人，回到小時候和女主角結緣的地方，描寫主角的心態轉變，那一種突然有一天覺得再支持不了的無力感，很感慨。 看的時候聽到那主題曲，覺得很熟，好像聽過，看一看訪問，才知道是日本的經典情歌，蠻好聽的，不錯。

星期日四爺叫我出泥同佢搜羅NOTEBOOK一部，其實佢話佢唔做MAINFRAME唔識PC D野，我呢一個連自己做緊乜都唔知既小混混又點會識呢？買電腦，好簡單，用我老闆既三字真言：平，靚，正！係咪好廢呢？哈哈！ 旺角睇完一大輪，最後返去又一城睇，其實我全場都冇俾D過乜野意見，反正部部差唔多，即係搵女朋友咁，自己鍾意咪得，唔駛理佢乜野CONFIGURE，唔駛理自己鍾意D乜架，係人地問你你先至要作D理由出來之嘛...佢快LOR，多RAM LOR，STABLE LOR，樣靚LOR，外型贏晒LOR....你諗真D係咪？其實好多情況，你都係覺得：我鍾意LOR，就係咁之嘛，好多時買野，買之前，一早已經揀定左啦！ 由於我其實都唔駛俾D乜意見，我就自己四圍睇，睇到D 50吋大電視播緊導火綫TRAILER，發覺好多戲未睇，咁阿四爺落左ORDER後，我就去左戲院睇下有乜場可以睇！本來我梗係想睇導火綫啦，但係要成十點幾先做，睇完好夜都唔緊要，重要係我要等到十點幾我就真係返屋企瞓一陣再出都得，咁我就再睇下有乜做啦，見到變節金剛..唔係..係變型金剛先至對...我未睇，咁就趁出左街就順道睇埋佢先收隊返屋企，不過四爺要回家照顧祖母，咁我就自己一個睇！一個人睇戲的好處是，即使場戲好FULL都好，都相對容易揀到位！ 講番套戲，視覺享受一流，本來諗住只係睇電腦特技，原來劇情都不錯，而且有很多好笑的情節，娛樂性豐富，兩粒幾鐘係相當抵的！睇變型金剛，就諗返起以前住樓下個小學同學，佢以前有本變型金剛集圖冊，同埋...男主角個樣幾似佢...... 劇終前大黃蜂要求留在主角SAM身邊，我心諗梗係要啦，成$4000蚊美金買架喎...佢走左去點算...即係我屋企架歌露娜，如果有一日出左去打交以後都唔返黎，你話點算先？係咪？我有俾保險呀之類架！不過，唔知阿SAM會唔會有一日發覺養大黃蜂好貴，又要入油，停車場牌費保險，而叫佢扯咁呢？ 又唔知點解，成日就硬係諗起「變節金剛」，唔知係乜？係楊學德先生的漫畫創作，刊於《標童話集2之消滅九龍》，有興趣請到書局打書釘，或到我家借閱！對，我專係買呢類無聊書返屋企的了！

導火綫，劇情很簡單，一個擅於使用暴力的差人，一個做卧底，但感覺上活得相當開心的差人，三個越南壞人兄弟，然後，差人捉壞人囉，壞人三兄弟個大哥被差人捉左，二弟同三弟走甩左，跟住卧底又揚左，但係壞人二兄弟又殺佢唔死，只係訓左三個月醫院同埋隻腳跛跛地(復原力一流，不愧係無間差人)壞人二兄弟走佬HEA左三個月，見個大哥就快受審，就返來殺晒D證人，包括跛跛地差人，跛跛地差人當然冇咁易死，但係壞人就反而足左跛跛地差人條正菜，咁俾人威脅就真係冇晒計，個大哥就咁無罪釋放，暴力差人當然就唔會就咁俾壞人逃之夭夭，咁咪O向個COUNT門口伏佢囉，然後就捉住佢去南生圍將佢成班兄弟全部打死。劇終。 其實我唔係咁介意D劇情，反正我就係想睇暴力警察毆打其他人，全片打架場面比我預期少，不過又係打得好好睇，又真係好暴力，直情唔打到個人死都唔會收手。我其實唔係一個喜歡使用暴力的人，不過我相信要用的時候，就唔好就住就住咁雞婆，要用暴力對付某些粉丸的時候，就千祈唔好仁慈，雖知道使用暴力的時候，除了在肉體上令別人失去活動的能力，仲要在心理上摧毀對方，要令佢以後見到拳頭都會騰騰震，賴晒尿咁至係為之有效，如果唔係D壞人就硬係唔知碇的！你睇下，黃飛鴻師傅次次打奸人堅都打打下變左講耶穌，咁就梗係之後又可以拍好多集黃飛鴻啦，如果黃師傅第一集就起勢咁打，奸人堅差唔多死咁滯，黃飛鴻系列我諗只會最多係三部曲，咁關德興師傅就唔駛成世都做黃飛鴻咁Q悶了！ 今次呢套導火綫好多D乜乜鎖，物物鎖，係果D成日打VIRTUAL FIGHTER，DEAD OR ALIVE見到果D，暴力警察又用得好流暢，好賞心悅目！值得一看！淨係一路睇一路幻想被人痛毆緊果個係你身邊條粉皮，咁就真係成個人開心晒！

Warning: If you are reading this then this warning is for you. Every word you read of this useless fine print is another second off your life. Don't you have other things to do? Is your life so empty that you honestly can't think of a better way to spend these moments? Or are you so impressed with authority that you give respect and credence to all that claim it? Do you read everything you're supposed to read? Do you think every thing you're supposed to think? Buy what you're told to want? Get out of your apartment. Meet a member of the opposite sex. Stop the excessive shopping and masturbation. Quit your job. Start a fight. Prove you're alive. If you don't claim your humanity you will become a statistic. You have been warned- Tyler Pretty warning~ I like it.