我對集團的看法

先旨聲明，以下言論並唔係針對任何個別人仕，政治立場，宗教團體，黑白兩道陰陽兩界。我唔想聽日就冇左條命仔。如有一句半句唔o岩聽，你可以鬧我，不過千祈唔好搵我，因為我好忙。(我呢種人，通常見唔對路就會扮忙架啦。)

---

話說尋日，阿廖老師教緊畫時，問D小朋友上個禮拜(七一)做乜要放假時，D小朋友循例又答D九唔搭八的答案：因為我去吊墨魚，因為我返大陸....小朋友就係咁，以為個世界會圍住佢來轉....
有D開始對辦：因為要去遊行....(如果因為遊行而有假放，我唔介意精神上支持所有遊行活動，即使我未必真係認同，包括果D支持同性戀乜乜物物的...)
阿廖老師聽到遊行，即刻糾正佢地，果日係七一回歸，係去慶祝，唔係遊行。@_@
然後，佢就拿出佢準備好的圖片俾d小朋友睇，全部都係d慶祝活動的剪報......
我好八卦咁睇下d圖片，嘩....好鬼粉飾太平feel，好假，少少想嘔同少少想死....

---

成件事我發現幾樣野。
第一，原來廖老師是有少少左傾的。這個我其實冇乜意見，我諗佢未至於會在我面前歌頌祖國有幾偉大甚麼甚麼的，如果不幸係咁，唔怕，我的聽覺已進化到有自動過濾功能，好ADVANCE！

第二，我唔係咁喜歡呢D左傾心態，跟住即刻檢查下自己其實係邊門邊派，發現我其實都討厭果D事事反對，聲大大冇野賣，淨係識沽名釣譽的其他派別。咁樣相當不得了，O向社會學上，我呢類人好係唔適合住在大眾社群中，即係話，我其實係一個自閉仔。

第三，我討厭任何團體，組織，黨派。一班人為左某些理想理念走埋一齊實在無可厚非，但係唔知點解我一直所見的所有團體，組織，黨派最後都好似變左質，到最後我都係覺得佢地做野只係為左擴張勢力，劃地盤；最重要係佢地最後都有好多祟拜，迷信色彩，仲定左好多所謂規則，總之其實同佢地最初理念無關。我可能表達得唔係咁好，但係總之我覺得佢地最後會變得好假，好表面。我相信的只會是某種理念，做的會是我認為對的事，好多野其實跟本唔重要，例如高舉某國國旗，高唱某些歌功頌德的歌曲，呢種事.....對唔住，我真係覺得好難接受。

所以，雖然我係中國人又做過好多中國人的同學，我冇加入中國同學會；
我細細個就讀教會學校，知道聖經講乜，老師仲覺得我乖到直情係十足十教徒的樣子，每逢春秋二祭，都叫我對住d同學仔讀d金句出黎，你問我信唔信，我其實唔會答你，信又點唔信又點？
曾經有人o向條街度叫我入佢地教會，佢講左半日，都講唔出點解我要返教會，佢都有問我信唔信有神，我話信，但係咁又點，咁就要返你間教會？我唔係反對人地返教會，但係你做乜要迫我返？我懷疑佢同我講講下，都開始問番佢自己o向度做乜。總之，我做多d好事，同叫人做多d好事咪得囉，咁務實好多。
講開又講，打仗爭執其實o岩唔o岩？點解會有聖戰？點解會分天主教同基督教？點解教廷會咁？
補充一下，都唔知點解d教會咁有錢，d大廈一樓全部俾佢地買晒來做基地.....;
除左聖經，我又睇過佛經，基本上，佢都係叫我做d應該做的好事，點解我信左你就唔可以信第二樣？又唔係識女朋友，識左呢個就唔好識第二個......
而我更加唔會加入黑社會，因為其實佢照顧唔到我，而且黑社會有好多門派，選擇起上黎會好苦惱，唔知跟邊個好，觀摩下人地個派別又話你係二五仔，好鬼麻煩！

簡單一句，我討厭假，討厭要我信邊個天，邊個神，邊個大佬，然後唔準信邊個邊個，討厭開會，討厭守幫規。