新低

自從上次大醫生回港事件(四月)，以及俾人鬧左幾句後，我生活表面上其實也真不錯，當然了，乜都唔諗，乜都唔睇，乜都唔聽，乜都唔講，仲會有乜野感覺？
感覺上，我只不過當自己係一團有骨架支撐住既蛋白質。當然，我見人的時候，還是會笑面迎人，事關個人唔靚仔，仲成日木無表情甚至黑口黑面，我驚會俾人吐口水，而且出黎做野，成日要對住vendor，client同老闆，樣衰衰咁，有朝一日俾人革扯又有乜野咁奇。
真又好，扮又好，總之生活同心情應該叫做平靜，至少唔駛好似坐過山車咁。

但係，和平既日子通常唔會長久，呢個月似乎又走緊下坡，尤其係今日，應該(希望)係全個月最低位。

一早起身，落個客度做training，本身已經唔係咁喜歡做training架啦，今次仲廿九幾人一齊上，仲只不過係全部人的一半(星期一仲要做多一次)，你老味，買果6個license，成村人上training，想點呀？最重要係間公司多數都係阿姐(這是比較客氣的講法)，真係乜野精神都冇晒。咁都算啦，做野o者，工作範圍以內，我應該做的。最唔開心就係呢d solution永遠唔會順順利利就搞掂，梗有d野唔得。今次又係d integration問題，即係d野分開用就全部正常運作，夾埋一齊就仆左o向度，個scanner行得好好，安裝又冇問題，software操作正常，但係個scanner配會個software一齊，就有問題了。有問題其實都唔緊要，有問題咪fix囉，但係，integration的問題就係各個單位都話自己冇問題，唔關佢地事，佢幫唔到。幫唔到，問題解決唔到，對個客來說，即係我既問題，大佬，個scanner唔係我整，scanner driver 唔係我寫，連我公司個software，我都冇參與開發工作，點解問題會落o向我度，就算我想幫，我其實幫到d乜？我落到個客度，都預左有問題就我係第一個(或者唯一一個)俾人鬧，但係我實在做唔到d乜，你鬧到我命喪黃泉都冇用，反而，你真係鬧死我好過，唔駛煩。或者，又係我唔識handle，工作能力低啦。

搞到成日冇心機，今個月又唔知搞乜，洗晒d錢，ok，財散人安樂，反正得番幾蚊雞我都有辦法生活到。最激心係尋晚打俾三少爺問佢d野，佢答完先至同我講佢撞爛左架車，今日仲打來問我借錢俾修車費，嘿，佢當然唔知我今時今日仲窮過佢啦！撞車都算啦(仲要同上次撞個位一樣)，借錢都算啦(反正我呢幾日都唔會有錢借俾佢)，成件事我最唔開心係點解撞車唔即時通知我，話晒架車都係寫我個名，佢實際上只不過係借我架車去渣，有事係咪應該即時通知我一聲呢？依家d細路，當自己是誰？

全日最心就係夜晚食飯，我仲識講下笑，開開心心食左一餐，仲睇到雙殘記，好彩最後都冇事收場。去食糖水，仲見到好多年冇見的uncle，係老豆以前的朋友/生意伙伴，佢仲認得我，犀利，生意人果然係生意人。

當我以為可以懷著比較ok的心情渡過呢一日時，點知返到屋企又俾d唔小心睇到既野整壞返d心情。自從多年前某天開始，我就沒有再見到她online的狀態，今晚一開就見到她online，好奇之下又睇下info，知道了近況，其實這是一件好事，因為她再找到幸福吧。我其實唔應該唔開心，不過，我能完全控制自己的心情嗎？找到幸福的不只是她，還有她，她的事其實早在上兩星期便已能證實了，只不過愈來愈確實罷了。作為朋友，知道她找到幸福也應該祝福的。
她們都得到了幸福，我也應該放心。

我還是執著，以及喜歡自欺。

如果不是娜姐send 佢隻跳跳虎(小貓)既相俾我睇，我大概又進入無意識狀態。我遲d就會領養跳跳虎，弄貓為樂。