病發半天

在這個開六合彩的日子，我發了。

發達，梗係唔係，發夢都冇咁早。

係病發，感冒終於都發左出黎，我一直以為自己可以壓制住，又係我太天真。

朝早本來都好地地，點知食完個午飯冇耐就黎料，應該同晏晝食飯淋左幾滴雨有關。食完飯番上office就感覺到自己HP條bar一直下降到紅色狀態，個頭仲好鬼痛，我下晝除左不停飲水，去廁所痾番飲左果d水，同埋不停咳之外，好似乜都冇做過，如果一間公司係靠不停有人飲水去洗手間同埋咳來搵錢，我今日應該幫公司賺唔少。

好彩，到左七點零鐘，條體力棒上返黃色狀態，夠支持晚間的活動。
夜晚都冇乜特別野做過，主要係同四爺食米線，跟住上我屋企抄d新歌落我部機度，其間我研究下佢新買部水迷你(O2 mini)，部機的確係掂，最衰我決心慳d洗，唔係都會trade左而家部hp2210同索愛t630，二合一用部水，成個人即刻瀟洒晒，好似四爺咁。
抄完d歌，我見耐冇楂車，加上三少爺同我部車改左少少個look，就楂下送四爺歸家。換左個鬼面罩，成架車有番個性，楂起上黎都爽d。

來回連行路都唔駛半粒鐘，返到屋企仲要睇一陣廣告先做創世紀。

希望聽日可以開番聲講野，我實在唔想人地覺得我講野似譚兆偉。