停電(上)

星期三同星期四在珠海，本來諗住好例牌咁做野之後夜晚單拖去搵飯食然後返office上網睇書處理些濕星野，點知完全唔係果回事。

本來公司講左上親珠海都應該安排至少二人同行，點知阿HIM唔知搞乜，話佢唔可以朝早上，要晏晝上，咁我朝早又要孤身走我路，落船之後坐死亡計程車，懷著執番條命仔的感恩心情到達公司，開始一天的工作。

早上收到雲尼的廣發電郵，話科技園通知我地呢區電力故障，隨時會停電，叫我地做好工作準備，我用notebook插住舊電就唔係問題啦，但我其實都唔知d同事點準備，唔通寫一行code或者打幾隻字就save一save咩，所謂準備就是準備隨時返工去玩吧......所以我暗地恥笑了科技園那無建設性通告的無聊，不以為意，然後就繼續做自己野。到下晝食完晏之後我已經忘記停電準備什麼什麼了。

到了三點幾本來schedule了「左文右武」開例會，但在這時hotline收到call，話有個client話佢地收唔到email.....操~~通常果d粉腸收唔到mail都唔關我地時，而多數都係佢地自己個server有事，所以收到call之後我都係心中暗罵，然後就check下所有setting睇下邊度出問題，如果係個客自己的問題就教佢點做點做，解釋下，甚至作一個「電郵一分鐘」的教學課程，教精佢。
因為一收hotline call就會打斷我手頭上的工作，很麻煩(都說了，本來是要和左文右武開會的嘛)，所以一般來說我對客人都是先咀咒，後解決的(解決問題，不是解決客人)。
誰知道，我這次還來不及咀咒，電便停了，沒有電，也沒有得連上網了，也就是什麼都做不到了，本來，在香港還有佛陀同事可以幫忙的，但是，睇得老夫子多都知道呢四字成語--禍不單行，佛佗同事下晝放假去考試，你話，係咪好巧合呢？

我唯一仲可以用的，就是個手提電話，只靠打俾個客，打俾ISP，打俾我地個sales，嘿......
而由於好心有好報，本公子平時做得善事多的關係，在最關鍵，要上網改setting而冇人做到的時候，電又回復了，搞掂。

16:00 - 終於可以準備開會了。