我著2號

玄機留msn message俾我話有波踢，成年冇踼過，都想踢下，走動下都好。其實夾埋只係踢左半個鐘，不過咁耐冇踢，踢得都ok喎，冇失誤腳腳清。 因為踢波，久違了的波衫重見天日。

從前返學時踢波，一日四餐，晨咁早返學校先踢一場當早操，小息得果廿分鐘都要射下波，早午食完飯又踢，放左學又踢，踢到對腳粗晒，所以依家基本上唔會著短褲出街，因為怕俾人笑。

以前踢波，球場得一個，但係幾隊人，幾個波，滿場飛，但係我地唔會分唔到同緊你踢波既人係邊個，亦唔會分唔到你踢緊邊個波，果陣時已經明白，做事要專心一致，心無旁騖的道理，身邊會有好多人好多事，人生在世，做你應該做事是很重要的。即係讀書同玩樂，咁多野要做，但係又唔係咁夠時間，當然揀做得開心的事，即係專心玩就可以！所以呢......我可以好快就脫離呢間男校，走去讀男女校......

果陣時冇波衫，因為返學係著校服的，我地亦唔會帶件衫返去換咁戇居，因為冇人咁做，會俾其他同學笑的。波衫反而係大家離開學校，但係大家係年青力壯會踢下波時造的，一同造過兩次，橙色呢件係第二件，但係原來都歷史久遠，我仲保存得好新好光鮮，證明......我後來已經好少踢。造波衫其中一個很重要的事係熨名同埋號碼......名，我本來只是想用「Lun」的，因為我喜歡簡潔，不過佢地話無論印幾多個字母都係一樣價錢，只係印三個字母好似好蝕咁，所以，都係加埋個「Wai」落去，其實如果連個性都加都應該夠位的，不過......咁應該好老土。

跟住輪到個號碼，正如幅相見到，我是揀「2」的，不為什麼，因為我很喜歡這個數字，點解鍾意，我都唔知。不過咁o岩，我多數踢左閘，都擺o岩位。有個同學好騎呢，佢揀「23」，我地仲笑佢：你估打籃球咩~~奇就奇在，件衫做完冇耐，碧咸就轉會皇馬，著23號，搞到佢好似好有先見知名咁，不過又唔o岩...佢個樣咁似施丹，著23號唔o岩數！

講番，雖然我唔知點解喜歡「2」呢個數字，的而且確，我同呢個數字好有關係，我2月生日，家中排行第二，等等。「2」唔知道係我的幸運數字，定係受了咀咒，有些事過不了兩年，第一永遠輪不到我，很多人和事，永遠屈居，不能坐正。