好像浪費了的假期(三)

間房執左三日終於在星期四零晨完成，但係仲有一疊書同紙楝住o向桌面，彷彿永遠都總係有d野執唔清。

唔知係我平日間房實在太亂，放假一定會搵一日執拾下，又可能，呢個根本係我既興趣。我細個同好多細路一樣，好鍾意砌LEGO，依家我見D LEGO，多數係有個主題，又星戰，又蜘蛛俠蝙蝠俠咁，唔知d人會唔會跟住張圖來砌，我細個，就一定唔會，因為根本都冇圖，d LEGO都唔知係邊個俾的，總之就唔係買架啦，屋企窮丫嘛。o向冇任何指引或者局限的情況下，我既創作力得到無限既發揮，我除左會設計d好有形有款既戰鬥機，或都可以用來攻擊我d屋企人既武器之外，我最喜歡就係砌間屋出黎，我仲要唔係砌外觀，我砌既係內籠....即係我會先四四方方咁圍起一個範圍，然後我會間番兩房一龐或都三房兩廳視乎時間而定，之後安置埋d傢俱，咁最後當然要有一男一女o向度生活下，家庭觀念幾重呀！

我小時候曾經諗過做建築師，不過上左中學之後發覺數學天份太差，所以放棄左，跟住又諗過做室內設計，但係讀書其間不知不覺走了讀商科，又唔知點解走左去讀IT，所以我都係注定唔可以做果D懶係好鬼型既Designer，或都貝聿銘接班人，咁我都係勞碌地做個cheap cheap電腦佬，仲要成日俾人當我係黃金俠，專門砌機...可能因為我仲係唔甘心，所以我一有機會，即使我只係得間房，我一有機會就會發揮我對interior design既心得。