05總結算

為了給2005年的自己來個總結，花了數十分鐘來重看自己這來年記下來的事。

未看之前原本覺得自己這年過得很平淡，看完返發覺原來也發生了幾件對自己影響頗大的事，當然，這些有點兒影響力的事，也不是甚麼大事件，只是以我當時的級數，覺得有點兒招架不住。

總結起來，這年的確沒有甚麼事打擊了我，反而因為這些不大不小的事而進步起來，我覺得，這因為我在昨年年尾給自己定下來的處事態度有關，「禍福難測，凡事惟心」。

那件憾事，由年頭在逸華劍士的婚禮遇到了胡同學，到幾個月後大醫生回港，之後收到胡同學及現任胡太太的婚訊，最後在出席她倆的婚禮而為這多年來的心結來個結局。全年起承轉合，自己給自己來個了斷。

昨年的工作好像很沒勁似的，公司還在變化中，我身在其中，要不停適應，手下由零到現在的左右手，但生產力不見得增長了三倍....事實上，兩倍都未必有，反而鑊便爆了一兩次，不算多，但已超越的我一個人做的時期了，看來是我還未懂得管理人手。其實以我這等冇所謂的人，工作得算很開心了，來年要好好提昇一下自己的工作能力。

昨年好像沒有缺少甚麼，但甚麼都不是自己的，總是曖曖昧昧的，其實，我算不算不知足？沒有進退失據，只因為我一早就定下了只守不攻，保持現狀的方針。很多時候，我自己想怎樣也不肯定，很怕那一個多心的自己，所以甚麼都不敢要...我是有一種這樣的感覺嗎？我真的不能自我分析。

竟然，已練成的完全自然防禦體，完成無死角形態，來年，應該可以自由活動了吧！

祝大家06年，生活愉快。

迷茫

對於放假期間仍有限度地處理工事，我並不是有什麼怨言，只不過於假期二字有點迷茫而已。

1224，1225

根據乘客指南第201條

1224 1225區是特別寒冷的地區

除了依靠車上的禦寒設施之外

每一個乘客必須與另一個乘客擁抱才能抵抗寒冷

摘自<2046>

---

根據<2046>的講法，我呢幾年都凍到面青口唇白。

江sir安息吧！

好歹我也上過江老師的oral堂，江老師過了身，我應該去靈堂?躬的。

但是他出殯的那一天(上星期三)，我被召到珠海去工作。

另外，看到報紙澄清江sir並不是自殺，而是在河邊中風墮河溺斃。

無論如何，希望江sir安息吧。

西南

病住去燒野食寫生，都唔算係乜野。

同日，回程後，我仲去左打邊爐...因為龍哥牛一，我地呢d做細既點都要請下食飯既....

我地去一間叫西南既火鍋店，食佢個蕃茄龍蝦湯底，我去到先坐底，叫定個湯底等佢地，不久，龍哥就到喇，之後，高貴大方兼得體的娜姐以全新super model形象出現，震懾成個場，連d火鍋料都來得快好多。

蕃茄龍蝦湯底果然夠新鮮甜美，d?都好好食，不過因為太多人，所以好多時都會來唔齊，呢d算啦，唔來果d就叫多幾次，叫都佢來為止。整體來說真係好好，同場仲有個阿叔大大聲咁同個部長講佢咁大個仔都未試過d咁既招待，你話幾咁緊要呢！

星期六兩餐都咁熱氣，但係仲行得走得，你話，點有可能會死呢，即刻覺得買保險簡直係浪費金錢呀！

---

同場加映，食完飯偶遇小勤勤，恭喜佢畢業，同埋成晚可以同人煲電話粥。今次唔好得個傾字啦，要實際煮煲熟飯了！

綠田園寫生團

上星期六，廖老師組織成班學生一齊去寫生兼夾燒野食，本少爺雖然病到條能源bar跌到落紅色狀態，但係都要頂硬上，仲晨咁早就起左身，仲早過平日返工，可想而知我幾咁重視我d學生。

綠田園聽就聽得多，去就從來未去過，到左之後咋帝行過圈參觀過之後，就開始燒野食了，d野食都算ok啦，唔難食......我本住賤命一條的態度，乜都照食，視死如歸的氣派，可見一班！食左兩個幾鐘，都未病死，就開始召集學生們去開工寫生了。

其實果度冇乜好寫，對於佢地取境會有困難，不過最後無論大個定細個都寫得唔錯，證明平時o向畫室寫畫真係局限左佢地！



我自己都寫左幾幅速寫，冇乜力寫，反而影左幾張相，仲有日落景，因為部細機借左俾四爺出征高麗，咁我就冇藉口唔用番部半專業的大機影相喇，好彩仲識用......不過影得唔係咁好囉...

階段關口

二零零五年十二月十六號，我設定這天為我人生中一個階段的關口，而我，面對了，亦渡過了。

我這天請了下午半天假，中午吃過飯後，便到了紅綿道。

到達後看到了大華和一些我認識的同學，不知是不是我心理作用，總覺得他們看到我的時候樣子都很奇怪，算了吧...這個根本不重要。看到了她和他，她很漂亮，當然了，作新娘子嘛。

和她及她的家人打過招呼，拍了幾幅照片後，恭喜一番後，他倆便要開始儀式了。

儀式完了後，一夥親朋好友再拍了照後，我和她互相問好，再叫他好好照顧她，便走了。

由於感冒實在不輕，夜晚也不好出席飲宴，推卻了她的邀請，從來沒有拒絕她，這算是一次。

全程沒有任何不好的感覺，當然也很替她高興，同時，我算是為自己的一個階段作結，過了這個階段的關口，明天，為自己的明天，以及明天的明天，作個準備。

---

鳴謝維維人借我相機，不然我也不能擁有一張和她的合照。奇怪吧，之前，我和她拍的照，我一張也不能擁有。

不要病

因為爆鑊，今個星期上珠海三天，一連算天不停地train一個人幫我做野，咁我就不停講野，直至今天下午，終於開始講唔到野，有少少喉嚨發炎，仲有少少感冒。

返到屋企即刻啪兩粒傷風感冒丸，我唔想呢個時候病。

剛才公司aunnal dinner，我再次抽到五舊水，算是幫補下財務，好過冇！多謝。其實果d係遲到基金，如果冇我貢獻下，邊有咁多錢抽，我收返少許都好應該！

維維人做埋下個星期就走了，祝前途似錦！又少一個好同事。唔緊要，請個更有可觀性的！

恭喜

明天早上，她便會嫁給他了。

我準備了一份小禮物給她，雖然不是十分貴重，但當年的承諾我可不是空口講白話。

祝幸福。

跳跳虎登場

上星期日，終於接濟左阿跳跳虎(又名虎bi)。

不過，我第二日就要上珠海，照顧唔到佢。

佢第一日到左我屋企，就好驚，唔係喱o向我電腦後面，就係喱o向我個書架度，再唔係就床下底，所以我都廢事理佢！

我星期三返到香港，廖老師就話佢果朝翻倒了我的盆栽，搞到張床濕晒....

我果晚見佢成日要入廖老師個房玩，咁廖老師都俾面招呼下佢，同佢講野，抱下佢...，當然，廖老師唔係成日都咁得閒，而且佢生果幾個仔由細到大都唔會咁跟住晒，要人注意，所以就請佢出去佢間房。

虎bi行為相當令我奇怪，佢好鍾意攬住電線，同埋典下典下，發出一些唔應該係一隻貓發出既怪聲....我開頭，仲以為佢有病....

十二月

不知不覺，又到左十二月，我最喜愛冬天，偏偏最怕十二月，十二月，總是過得戰戰兢兢。

---

當年今月，睇番昨年十二月自己所記下的，到今天都餘悸猶存。

---

今個星期終於叫做似d冬天，不過也不過如此程度，還開始回暖，好掃興。

---

下個星期，馮小姐就會嫁給胡同學了。
祝您幸福。

---

今年的公司年飯還未決定地方，但係下星期就食了，我覺得呢個唔重要，最緊要決定到我明天有大幅度加薪，唔係點繼續支持我富家子既形象呀！

---

呢幾日，一到下晝個頭就好痛，所以呢排都早左訓。
現在就正在痛了。

勇探重慶森林

早 幾日，應澤少邀請，到了重慶森林食阿差咖哩，同場仲可以見識澤之女友的大方得體，活潑開朗。我地一行三人都冇去過重慶大廈，入到大門之後，經過d神秘通 道，別有洞天，到左我地食野既地方，得到了熱情的招待，當然仲有風味咖哩美食。除了咖哩，我最欣賞果度既拉茶(奶茶)，好香好滑，最衰就係睇唔到佢點拉。

上週記

上星期日(27/11)

應邀出席黃老闆畢業拍照活動，雖然我搞不清楚他畢的是什麼業，我真該死，但還是要好大力咁恭喜他。
黃老闆除了學業有成之外，其他方面亦很吃得開，識了個賢淑的女朋友，還買了樓等結婚，我們拍照完了，便上佢新居打擾一下。
人比人真係會比死人，如果我硬係要同黃老闆比較，真係死左佢好過。
好彩，我此等爛泥扶唔上壁的人，係唔會咁膚淺既，各有前因莫羨人，自己唔上進，就唔好同黃老闆此類well planned的人比較。
況且，都今日為止，我仍然認為當日唔讀個degree course的決定是正確的。而其他方面，例如有個賢淑的女朋友，我壞人一個，邊有資格。講買樓，我仍然覺得唔應該為左d無良地產商打半世工甚至負半輩子的負債。

---

上星期二(29/11)

老闆召開了一個衣著儀表的training，我覺得，雖然老闆冇講因乜野會開呢d咁無聊野會，亦唔係針對某位同事，但係，唔多唔少都係為賽先生而設的。成個會好似劉天蘭品評d藝人咁，我地就係d藝人，老闆就係劉天蘭。
講 到我，當然係話我著得太casual啦，我認，因為我而家已經好少機會見客見vendor，而且我唔覺得我坐o向個位度諗下野，寫下野，聽電話，鬧下 人，講下粗話，咀咒下人，擒高擒低......有必要著套老西返工，係真架，佢係叫我多d著西裝返去....佢話，唔好俾人成日覺得我地呢d電腦人， technical同事係「師傅」(整機師傅)，我地其實差唔多係PM(Project Manager)黎架............
我知道了，首先，我會多些做些pm的工作，或者將一d好普通的task用pm的手法來做，之後，我想要pm的薪酬.....

---

上星期三(30/11)

俾老闆話我呢輪工作效率奇低.....我都覺得係..........

我係抵鬧。

---

上星期四(1/12)

夜晚同王子食宵夜。
有金句：我們只會對那還愛自己的人專一。

講得好。

---

上星期五(2/12)

發現了醒目通的手機優惠，$980有一部sx813。但是，還是算了。

好耐冇見澤少，同佢去花園餐廳食飯。

---

上星期日(4/12)

原來仲有一些我未到過，但係咁靚既地方。

景色的而且確十分怡人，不過你不需要常常強調那種說話。

發現了分別在那兒，就是有些東西永遠不會跟我說，這就是種距離，但不會影響之間的友誼。

行路

傑王兄話想分享下我行路去油塘，沙田，同埋青衣的事。呢d事，講出黎，會俾人笑同埋歧視，不過冇所謂，因為自從我中學時去參觀庇護工場接觸過果度其中一位工友用比較輕蔑的表情後，我以後都唔會驚話俾人笑同歧視，而且我仲會將笑我個d人同果位工友一同歸類。

言 歸正傳，話說行路呢家野，並唔係我發起的，而係兩位華哥，即係逸華劍士同埋大華先行的，佢地兩位，一般人唔做既野，有時會發生o向佢地身上，行路就係佢地 其中一項。行路，其實唔特別，很多人平日都會去下遠足，但係兩位癲佬，佢地遠足，行個條路線的確好遠，不過就相當唔健康....行馬路，而佢地個條元祖路 線，就係由油麻地行去油塘。

---

油塘篇
我有份行之前，兩位華字頭已經行過幾次，後來會考之後，一來聽佢地講佢地既旅程講得眉飛色舞，我好奇加上無聊之下，便加入佢地既行列。
路線：(我)長沙灣->深水(土步)->太子->旺角->油麻地(佢地住油麻地,我join佢地)->窩打老道，太子道->九龍城->麗晶->九龍灣工業區->牛頭角->觀塘->藍田->油塘

首 先，由於全日都是行路日，我會由我屋企出發，行去油麻地join佢地，呢條路線，我細個返學個陣有時都會行，係呀，由長沙灣行路到油麻地返學，幾刻苦呀！ join左佢地之後，就會經窩打老道太子道到九龍城，經舊機場外圍到麗晶花園，呢度我地會買少少野飲，之後就會由九龍灣到工業區，跟住會到牛頭角觀塘直上 藍田，有時會行下吉之島，再行到油塘，o向油塘有間機舖，我地會o向果度打舖機，咁之後就會沿路回程。

雖然呢條路大華有份開發，但係佢之後都冇再行，返而我同逸華劍士就在會考同埋repeat果兩年就經常行，那時跟逸華劍士很熟絡，乜都傾，最常講到的大概是那時在自修室認識的幾位隔離校既真光校友。

---

沙田篇
行左咁多次油塘其實已經冇晒挑戰性同埋好悶，咁就開始發掘就路線，其中就係行路出入沙田。當年我中六中七就讀小瀝源的商科學校，由於習慣了在行路時思考，有時如果要諗下d難題，例如點追隔離班個女同學，就會選擇行路返屋企。
路線：小瀝源->第一城->城門河->新城市廣場->大圍->大埔道->蘇屋村巴士站(我以前就係住蘇屋了)
而呢條路，通常會揀早放學的日子才可以行，而且都真係幾辛苦，所以都只行過幾次，自己行多數都係由沙田出來，而入沙田就係放假的時候搵埋逸華劍士，這是我們行油塘行到悶之後所想的路線，不過就唔會行到小瀝源咁入，只係行到新城市廣場，行下商場就會回程。

呢條路最危險就係大埔道，因為有好多車高速行駛，而且有好多貨櫃車，真係隨時死鬼左都唔知乜事。

不過數驚險，都算是入青衣。

---

青衣篇
入青衣只係行過一次，仲係行路入，搭車出。
當時因為平日果d路大識行，冇挑戰性，有一次就諗一個完全冇行去過既地方，計劃只係渣住本地圖就行，唔知點解，就揀左青衣。

路線：長沙灣->荔枝角->美孚後面->荔景->葵芳->長青橋->青衣

前 段太小兒科，到了葵芳才難度高，先要經過一個滿地泥漿的地盤，而且我相信那段路應該係唔俾人行的，只不過係我地強行進入的，跟住就上左條橋，上左橋，先至 驚，條行人路好狹窄，而隔離就係d烈火戰車，真係行出一步都會俾車車死，條橋好長，好不容易才走到青衣，遊歷了一會兒，就決定搭車到荃灣那邊了。

這是一次可一不可再的旅程，而逸華劍士亦可稱得上是「生死之交」了！

這些都一些比較有代表性的路線，還有一些路程短的，例如油麻地到黃埔，也很好玩的。

現在都不會再這樣行路的了！