虎bi看病記

在三月三十一日星期六晚，返到屋企，虎bi照舊坐o向個門口迎接我，當時我見佢仲好正常，但係過左一陣，我發覺虎bi有點唔妥......佢坐o向度，神情呆滯，我走埋去，諗住同佢玩下，哄下佢開心，點知佢想走開，但係又冇力跑，又發出痛苦既叫聲，此時我發覺，虎bi好似係受左傷。

我唔知虎bi幾時整親，細心d檢查一下，應該係左後腳有事，但係又有反應，應該唔係骨折，我唔知發生乜事，即刻check下有冇24小時獸醫，然後打電話去問下，問左地址登記左，我再睇下虎bi，睇下佢情況，我希望佢只係一時拗親，只係痛一陣，費事去到如果佢又扎扎跳，盞玩野，同埋，半夜睇急症，真係貴到飛起。睇佢果陣，佢真係痛到不停咁哀號，我唔忍心，我荷包痛肉痛好過見到佢痛我又心痛，都係即刻車佢出去睇醫生。

帶虎bi入袋時都好多波折，佢又唔肯入袋，又驚整親佢，吵吵鬧鬧最後幾經辛苦先將佢放到入袋。

三少同我一齊車佢出去，到左診所，等左好耐醫生先睇佢，冇計，因為撞正有隻八哥狗媽媽生狗仔，相比起上來虎bi的確係需要等下。其實虎bi自入袋之後都冇再哼過一聲，充分咁表現出佢堅韌的一面。八哥媽媽生左一輪，produce左五六隻小八哥之後，阿鬼佬醫生「Dr. 波特」就得閒睇虎bi了。

鬼佬醫生檢查左虎bi一陣，大致發現左虎bi應該係整親條backbone近條尾果節骨，所以痛到郁唔到，跟住就決定照X光證實下。照X光前，醫生同虎bi打左支針，係麻醉針之流，等佢照X光時唔好四圍郁，醫生打左針後，話要等十至十五分鐘，虎bi就會訓覺，咁我地就坐在醫生間房入面，等虎bi訓著，點知，虎bi唔訓之餘，仲四周圍望，不減平日過份旺盛的好奇心。十分鐘廿分鐘過去了，虎bi冇訓到，我實在十分敬佩虎bi那種對抗藥力的意志力，反而我同三少就眼訓到死。最後，虎bi都冇訓到，但係都夾硬同佢照，冇計，虎bi都係鍾意在清醒的時候影相，以確保影得佢靚，女孩子，就係咁。

張靚女相曬左出來，真係發現條尾其中一節骨有事，咁鬼佬醫生話其實都冇乜野可以做，因為佢會自己慢慢好番，咁佢就同佢地支消炎針，開d消炎藥俾虎bi食。然後，又諗住袋佢入袋返屋企，點知，入袋又入左好耐，事關虎bi又唔知發乜鬼小姐脾氣，又或者可能太喜歡間診所唔捨得走，入袋時wewa鬼叫，又亂抓一通，極具攻擊性，好似拍緊驅魔人咁。我從來未見過虎bi咁，而全間診所既職員都十分驚，可惜，佢地雖然驚，但係並沒有唔記得收錢，十分專業。

搞左一輪，返到屋企，虎bi都已經靜番晒，但係都係未訓......意志力驚人。

醫生話，佢等一頭半個月應該會好番，但係都唔駛三日，我已經見到虎bi正常番晒，復原力強到你吹佢唔脹。

依家見到虎bi冇事，真係安樂晒。

不過，佢睇醫生，真係好貴，貴過我一年睇醫生既開支，又貴過佢一年貓糧既開支，一晚駛左我可以駛兩個幾三個星期既錢，相當肉痛，不過見佢繼續活活潑潑，但求安心，都算值得。