接踢：記得當時年紀小，我在中一的日子

原來天煞孤星都會有被鄰博TAG的機會，不接下那就太沒道理，Oasis兄，多謝踢我！

---

1) 第一日踏入你要入讀的中學，見到什麼令你最難忘？

由進入校門到上課的課室，可以走上一條四十度斜的樓梯，或可選擇走另一邊那一條約二百多三百米，有如半月彎刀的斜路，諗起之後幾年都要咁返學，身心都一定很健康，不過咁並唔係最難忘，最難忘係呢間學校有大量公公婆婆在校舍範圍晨運！

2) 中一係拎個咩樣書包？

呢個唔係好記得...但係好似我呢D咁樸實既學生哥，應該係用價廉物美的NIKKO書包！

3) 中一的班主任還記得叫什麼名字，教你什麼科目嗎？

呢個我記得呀，你地睇下我幾咁尊師重道！！中一班主任叫黃國華，別名巢皮柑，教數學！是一個傻頭傻腦的肥胖中年人，絕技係用蘭花手拿粉筆，姿態優雅。

順道一提，我們同學曾作過一首屎坑順口溜有關他的：「只要有恒心，我愛巢皮柑。」

4) 還記得第一個主動跟你結識的同學是誰嗎？現在還有聯絡嗎？

跟我第一個結識的同學...我也不知道是不是我們主動互相結識...因為他是街坊，住隔離座，而娘親大人唔知點解會知道有個同我一樣大既村童跟我升讀同一間中學...然後已預先叫我地開學果日在樓下等埋結伴上學，不過一齊返學呢樣野我到後來已提議停辦，因為免得我在上學途中結識女孩子的計劃被阻礙，冇辦法，讀齋校係要外出覓食，當然......即使我唔俾同學跟住我，我的計劃仍然沒結果。那位同學姓甘，英文名首字母是P，所以大家都叫他PK，直至他二年後易名也沒有變過。

現在很少聯絡，根據最後的消息，他現在仍然在海外傳教，對我來說他當年小時候咁識做生意，依家去傳道，已經是個見證，甚至是神跡 。

5) 中一時參加了什麼課外活動，對你日後有大影響嗎？

中一時參加的課外活動多不勝數，對我影響很大。例如踢足球，除了令我有日行千里的能耐，還令我沒有原來那麼高(一直賴唔高是因為踢波)，又例如同群雄舌戰，令我個人好口多，成日激走D心儀對象，以致今日常常自己開飯，影響深遠。又例如加入棋藝社，令我唔多想裝人陷阱，也可洞悉天下所有計謀。又學牧童笛，呢個讓我知道呢個世界有些老師係傻得咁過份，令我以後見到D咁傻既人都唔會少見多怪，處變不驚。

很奇怪哩，畫畫同埋幹架這些兩大技能理應要寫的，都沒有寫，因為畫畫不算是活動，可以說是工作，幹架中一的時候很少啦，那時逸華劍士還沒有來找本少爺麻煩。

---

有興趣的朋友，自己TAG吧，我不傳了！