燎原誌

今年公司anuual dinner在珠海舉行，跟往年不同，除了香港全體同事上晒珠海會一會珠海同事外，每team人仲要在聯歡會中參與表演。 老實說，我由細到大都冇表演慾，做人又低調，表演呢味野我通常做些幕後工作，我們香港同事一組，阿rai本來話表演唱歌跳舞，而我本來想話幫佢做下道具或者幫佢「畫腹肌」，當然最後冇做到，因為我地未到最後都唔知佢想點，咁我返而幫我條Technical Team同Admin Team個話劇畫佈景，表演前一晚，我用左兩個鐘完成左我有生以來畫最大既一幅畫，同埋破左最快時間記錄。 成個節目都好熱鬧，好開心，中間又頒左個老人奬俾我及其他老人同事，老人奬係凡在公司做夠五年就有。不知不覺，原來出來做野已經五年幾，時間話過得快唔快，話慢唔慢。呢幾年，在這公司工作，穩定之餘郤不算太悶，人工不算高但還算夠用(如果不揮霍的話)，公司同事很好，沒有糾紛，老闆方面，我認為已經比外面其他公司的好的了，做人也不要太高要求。我亦很感激我的上司一直以來的教導，基本上，所有工作上處事的技巧，都是她教我的，而她給了我很多機會去發揮我的能力之餘，也包容了我工作時所犯的錯誤。頒獎時我有機會向公司所有人說幾句話，不過我沒有說太多，但我實在要感謝公司所有人，至少，我沒有為工作上的事煩惱過什麼，而我亦真的在公司活得很愉快。 真的，尤其這份工作是我在很不開心的那一年找到的，而我就是從這兒慢慢再站起來。

世界上總有些人，你看見他/她的時候，是很想毆佢一鑊，用口水吐佢，一腳伸佢落樓梯，「的」佢上三樓然後丟佢落街。 四爺經常說我眼中沒有壞人，因為我知道，如果我不這樣想，我實在會真的毆他一鑊，吐佢口水，諸如此類。 那天我參加豪門宴，意想不到又碰到他，同桌吃飯，難怪我覺得味道麻麻。 我總覺得，山水有相逢，今天要做的，就是為了那一天相逢作好準備。

我其實早在好幾天前已經搵到張稅單，肉痛之餘亦慶幸今天可以一早安排好所有財務上的安排，還以為這叫有點進步。 我一向覺得PPS很方便，也跟以往一樣用PPS來交稅。今天收到EMAIL通知過了數，突然醒起，那個交稅的number，係每年不同的......大鑊...... 我都話架啦......

經過這幾年時間的證實，我應該是一個沒能力安排自己日常財務的人。 我找了很久，還是不能找到我的稅單，我不是很想交稅，但這個世界，並非你看不見的，就當作沒發生，我的意思是：如果以為搵唔到份稅單，咁就當唔駛俾，咁就實在天真得可憐... 仲有....摷到好多一個月前的信用卡單，仲係未拆的.... 十二月一月好多野做好多野煩，找卡數呢一類我唔想做的事，便順勢睇唔到，結果白白罸息和手續費，真麻煩... 我想....嗯...算了吧...

從星期三上了珠海到今天中午才回港，隨即回畫室上課，之後回家換衫就出門去飲豪哥的婚宴。 幾天馬不停蹄，現在很累，明天要出席龍哥行禮儀式的排練。 另有一些俗務要處理。註：小弟說的俗務，多數都是同些臭錢有關... 現在很累，處理好些東西後，有不少事想講。 下期發表。

我沒有說出來，我不敢說出來，因為，這是罩門。 你大概不會相信，我打從心底害怕這個詞：錯覺。 讀到這兩個字，聽到這兩個字，會有條件反射，就像唐山大地震的災民一樣。 當日，那時我還是個幼稚得可憐的人，居然問了一個不應該問的問題。 你回答：「這是錯覺吧！」 你不知道，原來，這個答案，影響有多深遠。 我沒有想過，一直做的，是我一廂情願的以為在供給你快樂；而然，我只在製造「錯覺」。 你沒說，我也不知道我是多麼的擅長於障眼法這把戲。 後來，我仍對了幾個她提供快樂的感覺，但是，到了一定的時間，我總是很節制。 因為你，我認為自己是一個變戲法的人，但是，是九流的那一種，如果一直下去，表演得太久，便一定給別人拆穿，說我又在製造「錯覺」。 雖知道，變戲法，一旦被知道背後的底蘊，別人便會覺得表演很爛。 其實，我介意的，不是因為被揭穿，我害怕的，是有第二個你，跟我說：「這是錯覺吧！」 因為，那本就不是混淆視聽的把戲，所有發生過的，都是真真實實的，至少，對我而言。 只是，之後我自己也被你說的所謂「錯覺」，弄得迷糊不清，因此，有些事，我就是做了一半，便沒有做下去。 現在，我必須告訴今後的自己，根本就沒有錯覺這回事。

14 jan 雖然，今個星期算訓多左覺，右頸椎，仲係好痛，唔知係唔係唔覺意受左一記倒頭樁。起身沖左過涼，再用熱水淥下痛果個位，然後勁拗隻手，都係唔得。咁冇辦法喇，又要扮殘兵首領，無痛覺。 個server死死地，諗住落老深睇下有冇除左起台server以外而又方便又便宜的方法，因為我實在唔想擺兩部PC在房間，但係，原來老深擺電腦節，好多人，我實在唔敢行入去，連想去維記食過蛋牛麪的念頭都打消了，連百佳旁邊賣魚旦間舖都排長龍，真係誇張，無可否認，果檔魚蛋係比其他的好食好多，但要排隊，唔駛預我。我本來諗住在老深地鐵站搭地鐵返公司做少少野，但係我實在好怕多人，咁惟有行番過長沙灣搭。 返公司其實唔係扮勤力，而係執星期五既手尾... 13 jan 今日教完畫，又冇去學畫了，已經成個月冇畫畫了，冇辦法，年頭年尾太多野做，下個星期同再下個星期都要去飲，反正成個一月都去唔到，咁惟有去同逸華劍士，大華，二公子和vicki食飯，好耐未試過呢個組合食飯。食完大華同逸華劍士又要去行尖沙咀，對唔住，我已經破例陪個無業遊民行左二個星期五晚，今次唔好預我，而且，我仲係養病中。 12 jan 夜晚要裝新server，好簡單，但係好煩，尤其是我在食左藥的狀態下，唔好以為食左藥會勁左，其實只係得番50%精神力，但係已經好過早兩日...12:00先走得，仲要自己知有少少手尾，不過精神唔好，走。 11 jan 請左半日假，睇醫生，因為唔想成日咳到好似李尋歡咁，雖說小李飛刀，例不虛發，武功好得不得了，又係探花，即係讀書叻啦，但係呢個角色成日咳，佢條女林詩音又俾人撬左，又成鬼日俾人害，咁既遭遇，都係唔好似佢。 睇完醫生返公司，食左藥，嘩...好眼訓，雖然好多野未做，但都七點就走，返屋企，野都冇食就訓，訓足十二個鐘。