燎原誌

九月尾的突發事件太多，令到原本要計劃的沒事間搞。 九月尾的突發事件太多，令我有很多事情都想記下來。 九月尾的突發事件太多，令我沒有時間記下這些事情。

「你係邊個？」 「咁你又係邊個？」 「我？」 我沒有等她回答，就說：「小姐，你係咪打錯電話呀？」 她也沒有回答，然後「拍！」---掛線！ 幾冇禮貌 呀！ 我真的沒有興趣做這十零廿秒的便宜電話情人。 前文

打電話給逸華劍士和大華，告訴他們一個消息，那其實是件喜事，但他倆異口同聲話我講的時候語氣很凝重，以為是什麼悲劇大慘事，呵呵，我有時就是會將要表達的東西顛三倒四，問你怕未？ 那件喜事，就是人生大事，結婚。當然，唔係我結婚，結婚，是要兩個人才能成事的。車之子結婚，居然扒晒淫詹肥二龍哥頭，始料不及。 始料不及的，還有一件事，跟逸華劍士談起傻佬文，他說傻佬文之前又搵到一份工(始料未及-1 hit)，幾日後被解僱(始料未及-2 hit)，原因是那老闆嫌佢太叻，傻佬文話的...(始料未及-3 hit)。 我的即時回應三個字---痴娜線。 順道來個「成語笑話廊」---今集介紹的成語係「病入膏肓」。 真係差些少就俾傻佬文個three hits combo幹掉....

夜，九時半，書屋。 電話響~~ 看到來電顯示，陌生的。 「喂。」 「你o向邊啊？」(不認得的聲音，但如銀鈴般清脆悅耳。) 「北角。」(腦內正在快速搜查人物錄，咀巴下意識地回答。) 「點解o既？」(搜索完畢，打錯電話機會有85%，仍是風鈴似的聲錢，帶點天真，令人心曠神怡。) 「你係邊個？」 「咁你又係邊個？」 「我？」 遇到一副甜美的聲?，不知行了什麼狗屎運。 我會怎樣回答？ 故事，會有下文嗎？ 呵呵！ 下文

早前，知道又一城有天野喜孝的展覽，早已想去看一看，以為展期到九月中，星期日中午抽了一小時走去又一城，發覺展覽已完了，實在可惜。 想收藏一兩本天野喜孝的畫冊，不知有否。 經常都是，當你行動時，事情已悄悄溜走了。

第一幅畫得比較唔會貽笑大方的人像油畫將近完成， 今次我自己找來靚女model相來做參考，畫的時候心機比老師叫我畫那村姑一類時好上百倍，我諗住以後主攻畫靚女......我覺得我擅長！ 不過，老師說我畫的背景調子太冷，藍藍紫紫的，同個靚女好唔夾，然後就要改過晒個背景.......其實，提議我用紫藍調子的，就是老師。不過算啦，如果唔係咁，好難有機會見到老師示範給我看，今次仲係大幅度修改，真是千載難逢。 老師一路改，一路話冷色調唔配合我，講到我好似d好正氣好陽光咁，其實，我覺得，我畫那些偏鋒些的題材，negative那些，可能好有效果，好出眾。不過，我份人好cheap，好冇性格，好市場主義，常常遷就市場需要。 我不能叫自己做藝術工作者，就是因為欠缺那個藝術家脾氣。

上星期中開始，珠海的手足向我報告珠海有幾台電腦受到病毒襲擊，我俾左少量指示，以為佢地會搞定，結果完全唔係一回事..... 我星期二上珠海，病毒仍然未受控制，老闆即時召喚左我入房，我俾左幾項要即時做的行動，咁老闆又即時召喚全公司七十二洞主入conference room開臨時緊急會議，幾型呀！ 應付呢次病毒大擴散，第一，就係全部pc同server offline，唔准連上network，呢一點我上星期就已經叫佢地咁做，唔知佢地驚乜，死都唔肯叫所有人斷線，依家咁真係死囉... 第二，今個星期唔可以上網睇webpage，我唔知佢地大陸同時平時會去邊一些網站，專係會惹d病毒同麻煩番來，咁咪唔好俾佢地用囉... 第三，update 番最新的antivirus軟件，我後來先至發覺，佢地好多人個antivirus係唔update的，個user又唔出聲，不過我team人都有責任，成日叫佢地定期check下user的pc，都唔知佢地有有認真check，安全意識認真麻麻... 連續兩晚叫全體同事放工後入safe mode scan下部機，我地見到有病毒就同佢清左佢，清唔到就重裝os，結果我地第一晚搞到四點，第二晚搞到一點，認真辛苦。搞左兩晚，個情況先至叫做受到控制.... 我做咁左呢一行咁耐，從來未見過病毒可以發作得咁犀利，清完又有，有完又清，沒完沒了似的！一個user個scan report，可以有數十個病毒，直情可以列入真經典系列！

終於有機會去探望阿冰同埋佢個BB。真係好得意！仲同bb & 媽媽影左褔相添！ 希望bb健康地成長吧！ 唔知兩位老闆係講笑定講真，我地講起阿冰佢地就問阿冰有冇online上skype覆email... 放假就係放假，休息就係休息，認真工作重視工作固然係應該，不過工作唔係生命的全部嘛。

最近跟龍哥亨少娜姐等朋友聚腳的地方，是一些上樓的cafe，兩次都有玩「飛行棋」。 頭一次我因為要食出前一丁，沒有跟娜姐，大華，亨少，龍哥參戰，只做旁觀者。 大家都知道，無論玩任何遊戲，都係要分勝負的，一定有輸有贏，每個遊戲，都有一套規則，都有一套嬴的方法，「飛行棋」要嬴，當然要行得快過人，除此之外，就係令到對手白行一場，即係對 手無論行左幾遠，你有機會，趕佢返歸，等佢從頭做起。基本上，勝利只得一個，一般人都會有位就鏟除D阻住個地球轉同埋阻住自己發達的人，但係，上次見佢地玩飛行棋，佢地都好忍讓，唔捨得傷害別人，我口雖然話咁玩會唔好玩同埋教唆佢地有機會就做低D對手，其實，我很欣慰識到呢班心地咁善良的朋友。 上一次我有落場玩，佢地終於人性化番些少，但係要害人的時候，都仲係有少少於心不忍。 很慶幸及感激，自己能夠認識一班很真誠善良心地好的朋友。 你地睇下旁邊個留言box...娜姐話要玩大富翁，無問題丫！當然，娜姐已經成個富婆啦，我呢D擺到明係赤貧份子山頭代表，想嬴唔係話咁易。

由於突然所有節目告吹，加上發現天氣出奇地清涼了，這個時候最適宜去兜兜風。 好一排沒有這樣沒目的純綷駕駛，因為覺得好浪費，唔記得在香港養架車其實個動作同燒陰司紙一樣，不個面額少d，但係真金白銀。我自己出車的時候，通常都是有一些我認為需要的時候，例如...一班朋友出去的時候，或者約女仔的時候，接載阿娘親的時候。 不過，說實在的，所謂有需要的時候，都其實沒有那種必要性，即係，唔(手查)車係唔會做唔到的。所以o向我發現同我同年甚至細我幾年既人都撈得相當吃得開，而我仲係仙都唔仙的時候，我係考慮緊將呢件咁貴既玩具賣左佢。 我當年想買車的目的其實有二個，有一個算是達到了，但那個目的只不過係一些意氣用事的幼稚想法，沒有實質的效果，一種純心理補償。另一個目的，應該沒有達到，雖然付出了不少。 諗到咁，既然其實乜都冇乜都做唔到，的確係太多理由賣了她，太少理由留下她。 惟一，是捨不得。好像這些時候，要兜風，難道坐小巴坐巴士坐地鐵，仲要諗下點轉車，咁型咩？

看見朋友去旅行的照 片，我也興起去旅行的願望，當然要有美相伴。 每年都是空想，不要說沒有女，連銀兩也欠奉，真是要想辦法。 近來願望還有： - 跟家人換一部電視 - mac book - D80 一共五個願望，不算多，不算貪心。 根據童話故事書，不貪心的人通常都會願望成真的。

迴轉吧上的後悔 轉貼自 暗黑熱血 看的時候，就想起了好一些朋友！

後頸好痛！

晏晝收到二公子同danny的msn，danny即係肥二，佢好堅持自己叫danny，不過我覺得叫danny的周街都係，咁叫會好冇性格，所以我係堅持o向佢吹我唔脹既情況下叫佢肥二。 咁佢地msn時我做緊野唔得閒搭訕，都冇正式問候佢一聲，更加恭喜唔到佢今年年尾結婚 。 肥二danny移居澳洲，好遠，上次見佢時係富力士結婚時。久違了。 肥二danny叫我地過澳洲參加佢個婚禮，我地呢d義氣仔女，同果d問人「義氣幾錢兩」既人(唔係人人知道佢係邊個)係好唔同，唔能夠雙題並論的，我會盡能力儲錢，希望能夠儲夠水腳，雖然困難重重，我黎緊仲有一期grantloan要還，又要同架呠呠車續牌交保險，但係我真係會試下，當然如果有人實際地支持會更好，機票實在係唔平。肥二danny，係真的，我會調一調d假，希望真係會有錢搭飛機來賀你的！反正我也好幾年沒有出過國。 另一個久違了的朋友係小勤勤，話說我因為感覺到自己變弱了，所以今個星期趁住唔駛上珠海，的起心肝同埋脾肺腎，決心要去探下師傅，讓自己覺得我還能戰鬥的。咁我上到去除左見到好幾個月冇見既師傅外，仲見到小勤勤，小勤勤長得很健康，打沙包呯呯聲，好似好犀利，如果俾佢打中一拳都唔知點算.....不枉我地當年同佢起一個「鋼條勤」呢一個美譽。 小勤勤已經搵到野做，佢話佢係做打雜，我話唔緊要，趁後生當係鍛鍊下，不過佢又話老闆好鍾意講粗口鬧人，咁我就叫佢有機會就轉工了，因為那講粗口鬧那些幫你搵錢的人既老板，應該都唔會有什麼大作為的了。 小勤勤臨走的時候，又接到電話，咁佢又講左好鬼耐，亨少果然講得冇錯，小勤勤一同女孩子講電話，就會著左non-stop mode，好彩，最後佢都肯收線走人，唔係連師傅都冇得返屋企。 我本來已經係一個好無聊既人，成日會講d無謂野，但係一見到小勤勤，就會更加無聊，淨係等巴士既其間，我已經用街邊d人講左幾段無聊既野，不過太無聊，無謂o向呢度寫。 我如果有心情，的確係可能不停咁作好多無聊的故仔的，如果有逸華劍士呀，二公子呀，小勤勤呀，甚至我家姐呀，咁樣腦震盪會震盪得勁d！

因為一件事，發覺要重新鍛鍊自己的身體！ 今日食完少少野，等二公子打電話俾我一齊去參加一個「兄弟團」(即係人地結婚個d兄弟)會議，咁食完佢仲未搵我，咪去黃金商場度逛下，其實我最唔鐘意去呢d人多既地方，好鬼迫，大熱天時，d人個身仲好鬼死臭，不過等人冇辦法，唔小心都行左入去。 當二公子打電話俾我時，我一隻手要拿左部手機，得番一隻手保護自己，響呢個時候，真係有人趁我得一隻手時，用手想掃開我開路，我講緊電話，個腦冇點思考過，下意識咁起手格一格，咁我先至唔駛失位，但係我隻手都未放底，果位仁兄後面果個人，就好大動作咁又用隻手掃過來，今次我企唔穩，撞左落去身邊一個正在睇野既人度，不過又由於我正在講緊電話，一心只係想離開呢個商場，咁又行左去，都冇睇下有冇整親人...... 事後我覺得： - 撞到人，都幾唔好意思 - 身體反應差左 - d人好鬼惡，冇禮貌冇家教 - 如果依家同人打交，多數會輸 根據我早年成日講：「你唔會知道你幾時要痛毆d渣滓，所以要好好鍛鍊身體！」我認為我應該每天早上就同自己講一次呢句說話，好好警惕同埋鼓勵自己，甚至視為座右銘！ 順道講下，睇見詹夢夏咁快又話結婚又買埋樓，真係估佢唔到，想當年，我仲同佢一齊引用「行運一條龍」既對白來嘲諷一下大家(用邊句對白我諗應該好易估)，至今只係過左七八年，佢讀完大學然後出黎做左兩年野就話結婚，真係利害。 結合昨晚同亨少講開大家認識的小時候同學朋友，都撈得咁掂，而自己仲係一條茂利，真係要檢討下，發奮圖強。

因為終於可以聯絡上久違了的老豆，上星期在珠海找他食飯，順道祝壽。 想起來，我和家姐同埋三少爺比較，我是唯一一個由出世到六歲都在父母雙全的情況下成長的人，三少爺在兩歲便從澳門回港，家姐更不用多說，基本上沒有和老豆生活過。 小時候很怕老豆，不知道原因，可能是我小時候很愛哭，惹得我老豆討厭，又可能只是每個做兒子的潛在基因，又可能睇到人地的父親，起勢打到自己個仔半死，以為天下間所有父親都係暴力中毒。(而家個世界應該冇呢d所謂老豆打仔，個仔唔炳佢老豆都應該叫做父子情深) 因為我細個怕老豆的關係，返香港讀書後少見了，我的生活是很輕鬆的，我只要應付廖老師既要求就已經天下太平，大個左，又因為習慣左，所以都冇話因為長期見唔到老豆而覺得有問題，而又雖然老豆又冇乜照顧過屋企，不過，基本上，我冇覺得佢唔好之餘，仲認為同佢的感情是不錯的。(大個左，當然亦唔會有怕老豆呢一種低智能心理。) 近呢幾年，老豆好少(應該話冇)返過屋企，我係相當了解原因，所以都沒有說過他甚麼，不過連電話都唔打一個，就比較難說過去，可能佢又覺得，打返來又沒甚麼好說吧，正如我，都唔會無啦啦打電話俾人只係問候咁造作。但係，真係有事起上黎，真係死左都唔知。 既然佢唔打俾我地，咁我唯有間中搵下佢啦。 果晚同廖老師講話搵左老豆，佢少不免都又鬧佢幾句(即係俾人鬧果個係我)，話d電話搵佢唔到之類，最後佢好頂癮咁同我講：「咁咪好lor，你地父子團聚！」 唉，做孝順仔真係難！