燎原誌

咁就2012了～

2012-01-02T23:53:00.000+08:00

每年年尾，總是做個回顧，好像很多嘢想講的。

今年，突然就年尾了，其實我是有點．．．來不及．．．老實講，我到了年尾的時候才突然驚覺：噢，靠！乜年尾嗱？？

感覺是有點招架不住，今年過得很快嗎？又不是，今年我是覺得很漫長的，是捱過來的，是度日如年的．．．但是，一方面，時間又點點滴滴不知不覺，唔等人，又溜走了。對於這種時間不夠用，工作做唔到，但另一方面感覺很折磨的，我是分裂地兩方面都感覺很想死，即是雙重想死，如果我是很享受死亡的快感的話，那就是雙重享受了～～爽啊～～（癡線）

全年很像做了很多嘢，但又實在無乜功績立過，簡單地形容應該是：被兩三人圍毆，那兩三人又不致於可以解決你，是不停的接招，偶然被打中，又唔會死，但你又唔係可以還擊做低佢地一件半件等你可以逐一擊破。事實上，就算你做低其中一個，後面仲有一大班壞人排住隊加入圍毆你的行列．．．．嗯，sosad.....

年頭，過完年冇耐，就做親子班團購．．．基本上超難做，好辛苦，精神病都迫出來！我一早知自己搞唔掂，搵左D part-time幫手。基本上呢個親子班經驗相當難得，可以彌補返冇賺錢同埋心靈創傷，超正。其實一直想寫數篇文去講果幾個月嘅所見所聞同埋現今社會家長心理行為對小朋友成長及教育之我見。但最後只會淪為我閙X＿＿X臭人家的BLOG文，真是何苦，所以算。其實唔係所有家長都有問題，不過很多都超離譜。我其實好錫小朋友，見到佢地被佢地爸爸媽媽咁「飼養」，真係心痛，心痛佢地其實很聰明，識好多嘢，但其實對一D簡單基本但很重要的東西都唔識。算了，the city is dying, 我都 know 嘅....

然後，就到暑期班，暑期班唔駛我理，不過都好多準備功夫，當係開拓小朋友市場，都啱嘅，其實我唔想做細路仔班，不過，唔做，真係搵唔到錢的。其間，又搬OFFICE，唔關我事都好Q煩。
本來，諗住暑期班搞定左就去旅行，點知，又係唔得。算了，都冇心情去。

暑期班一完，突然搵到份新工，世事好吊詭的．．．本身都已經夠忙的，仲要轉一份唔駛入到去做都已經知一定會忙到仆街的工。原因好多的，主要，是錢囉，同埋，本身都已經有得四圍去玩㗎啦，都唔爭在啦～

而事實上，工作繁忙呢一方面，我不知不覺間，已經習慣了。窮呢一方，也又習慣了，都沒有什麼很必需要買的，從前生活不愉快，會用物質去補償，現在，連生活都沒有愉不愉快的，所以連補償談不上了。本來看見身邊的朋友四圍去玩去旅行什麼的，都會想點解你地咁多錢咁多時間不停的吃喝玩樂，怎麼我只是不停在公司畫室和屋企三個地方花光時間，後來，連這些問題都收起了，反正嘛，自己選擇的，又不是很不開心，又，算了！

今年還有數件事可以記下的：

四月時，屋企樓上漏水，我間房水浸，漏左幾日，結果我年中先整返好晒間房，即係8月尾．．．中間4個月，不知是怎樣過的．．．對自己的適應能力，頗佩服。

唔知係咪《那些年》效應，小學同學都找了半班回來，F6F7的同學也聚了一次，其實感覺蠻好的。

見返一個3年多冇見的好朋友。嗯．．．感覺也很好的。

一大班很久沒見的朋友．．．讓我很多回憶都返回來．．．又想起，原來那件事已過了足10年。

今年的農曆新年，又是年廿九之後便到年初一。不是故意想起，但總是忘不掉。

好，新一年新開始（廢），今年要好好加油！

我是殘兵之首，我本事超大的啊！！卧龍先生都這樣說的～～

重操故業

2011-11-02T00:33:00.000+08:00

命運這回事，即是你再拗頸，也是拗不過的。

簡簡單單講，我又回到IT行業去了。

輕輕鬆鬆唔駛俾力的工作，看來，個天點都唔會俾我做。辛苦命，就是這種了。

世事便是如此，越懶得去搵工的時候，總是有些工自動介紹過來。
工作是澤少介紹的。話說，數月前，澤少給工作了八年多九年的公司辭退，理由是，在內地SETUP左 INTERNAL SUPPORT TEAM，香港的員工，不要了。多麼的殘酷，還好我已經見識過，不覺得什麼。

然後，過了個多兩個月，澤少找到了新工。

他告訴我他公司正在招兵買馬，問我有冇興趣，我都係一試無妨的心態答下就算，仲要叫左我幾次我先SEND個CV俾佢，出奇地，夜晚SEND CV，第二日中午就俾電話我，跟住再第二日上晝就去INTERVIEW，中間才經歷了三十小時左右，相當有效率。經過做份TEST＋1ST INTERVIEW＋PHONE INTERVIEW（2ND）＋3 RD INTERVIEW．．．最後，佢俾OFFER我。

不過佢話我兩年冇做IT，只會俾一個JUN D既POST我，當然人工都JUN左．．．

我基本上，只係假裝考慮左一分鐘左右．．．就簽左，事後有後悔太早簽，原因後述。

唔駛諗就決定俾人壓價唔BARGAIN一下就做：

一．股票行真係冇嘢可以晌佢果度得到了，混亂不堪的管理，暗淡無光的前景（我指公司），對我來講，真係再唔可以晌佢身上學到任何嘢了，佢作為一個反面教材的作用都給我用光了。雖然，我每天上午工作一小時，下午工作一小時，就已經完成了一天的工作，以真正工作時間來講，人工直迫管理層，但係，長此下去很不健康，以我自身以至整體社會來說都很沒好處，離開是早晚問題。

二．離開IT兩年的而且確會脫節，雖說基本上是想轉行，但如果情況是唔入返去做一排，人工一直下滑，將來真係要回頭都真係回唔切。而且，現況係，果份工，唔會有得升，人工唔知幾時先加返去我應有的水平，簡單D講，唔會有機會。

三．佢依家用我兩年經驗人工請我，但係我有八年經驗，我是好蝕的，但掉返轉諗，佢咁樣都係保險啫，我係老闆都會咁壓價，而當果個人幫得手，咪加返佢應有既水平。我係咁諗，外面，未必會俾機會一個脫離行業既古古怪怪份子，依家有人睇到你其實有幾多料，係好事。

四．最重要，我對呢間公司做既系統好有興趣，EMAIL MARKETING SYSTEM，我好想知道呢套嘢既真面目；另外，我感覺到呢間公司既文化好適合我，唔駛扮大公司，唔駛裝專業形象，IN我既人都好實事求事，又唔會裝模作樣，同埋，佢地好TECHNICAL，可以補償返我當年工作環境所不能鍛鍊的。當年．．．都唔知時間都用了做什麼，開會，見客，開會，寫報告，作文．．．．唔知．．．．．

呢份工，返左兩個星期，已經慢慢地適應。

開頭，係好驚的，唔知驚乜，可能驚好似上次咁，唔知做咩勤勤力力都俾人覺得你唔掂。

依家，OK吖，都唔諗咁多，有嘢就做好佢。

不過，做左咁耐IT，俾人當JUNIOR係有D怪，唯一出路，SHOW俾人睇，真正的年資。

佢地好好，請返前身返來HAND﹣OVER，解答左我多年好多唔知既嘢，已當賺左。

衛斯理

2011-09-29T23:36:00.000+08:00

衛斯理，香港應該冇乜人唔識。倪匡筆下小說人物，我小學時和初中時的讀物／毒物，由小學4年級開始好熱衷去讀到中二中三開始慢慢睇少左，因為中一開始睇金庸，細個係去圖書館借的，好多係公共同埋學校圖書館都好難借到，咁多年間都冇辦法睇晒全套，當然啦，到我唔睇時衛斯理先生都仲晌度繼續探險緊。

咁多年冇睇，好多故事都唔記得，最有印象果D藍血人，透明光，老貓，其實連基本大致的情節都真係唔記得。多謝新世代手機同埋平板電腦，讓我有機會成套書DOWNLOAD重睇。衛斯理咁多本書，每個都係獨立故事咁滯，但其實出場人物有先後，所以最好就係有人將故事排好次序，而又真係有喎．．．好感恩。

今時今日睇返衛斯理，覺得驚訝的是，原來早期故事，係從60年代已經寫的了，在我讀小說的時候，睇到果D我依家睇來很不外如是的奇異事件，很不值得大驚小怪，不過如果係60年代有呢種幻想力，的確讓人很佩服，難怪衛斯理那麼受歡迎。

另一樣感覺是，這40﹣50年間，世界真的變得很快，睇衛斯理時，成日見佢打電報，感覺很膠，打乜電報吖，IDD都就快被收皮了，EMAIL都只用於公事，反而果D外星人用既設備，我地依家就日常都用緊，果D成幅牆咁大既SCREEN，一個手掌咁大既DEVICE，咪就係你屋企個電視，同你部SMART PHONE．．．唉唔係，外星人都係用CRT MON咋，部掌上設備有掣架，冇TOUCH SCREEN架，好落後的外星人。

還有，可能以前生活節奏真係冇咁急促，小說描述時間方面成日讓我感覺好奇怪，例如翻過一度8呎高既牆要45秒，仲已經夠時間避開D守衛，咁好身手，駛唔駛45秒呀．．．守衛咁深嚴既地方，居然中間可以有咁長時間冇人睇住．．．22世紀既今日，時間就寶貴得多，D人做嘢就認真得多了～～

而睇衛斯理最覺得煩就係，每個故事佢都強調自己自小接受嚴格的中國武術訓練．．．而佢又不停咁講佢唔駛做好有錢，好曬命囉。

我依家都係睇左20個故事左右，真係有排睇。

年年驗身，令你放心。

2011-09-27T17:22:00.000+08:00

早前驗身，某某指數比正常高出很多很多，0-55為正常，我6月時收到報告時，數值是166...

當時電話同我講報告位小姐話要小心D，最好去再驗一次果個器官有關既項目。對於呢件事，我雖然都唔算不以為然，但都只係記在心中冇即時去驗得詳細D。

後來，有位朋友俾左張COUPON我，可以免費驗其中一個項目，咁啱又係果個器官喎，咁咪去驗下啦；過左一個星期後報告出左，今次係110...跟住又俾人話我呢個情況好嚴重，又叫我驗得詳細D；其實我一直想有記得呢件事，只係一直冇做，同埋，我當時唔記得我第一次驗時，個指數仲高過好多好多！我都覺得應該驗多一驗，以免過幾日死左都唔知咩事；話晒，我生意又未成功，好多事未做，好多心願未達成，雖然我呢D人其實對社會冇乜貢獻，正所謂死左都唔駛恨，但我都唔想好似隻溝渠老鼠咁就死左。

就係咁我就專驗果個器官既數個項目，仲照埋超聲波添，都真係相當好玩的。然後，又過左兩個星期，醫務所仲用好故作輕鬆的語氣來叫我約時間見醫生，我心諗，之前D驗身報告都冇咁嚴重要親身見，讓我好不擔心，原來，我對自己既死，都有點擔心的。

見醫生，我本來想同佢講，其實果個所謂指數我有下跌的趨勢，但都唔駛我用果種感覺上好垂死掙扎的說話來為自己的健康辯護，佢已經話超聲波照出來我冇事，完完全全非常的咁健康，然後果幾首highlighted既指數，或者個超聲波話果幾句comment，佢都話呢d好普遍，唔駛理...

全個對話用左2分鐘左右，十分高效率。

離開診所之後，我晌度諗，其實，生老病死全部都好普遍，基本上，做人的確可以好看得開！

睇完個報告除左知道左我個人係好普遍之外，最大既得著係人比以前更看開，更樂觀，幾好呀！

希望個BLOG可以回復生氣的一章

2011-09-19T03:44:00.000+08:00

好耐冇試過間房可以四四正正咁放張頗大的書枱，然後坐正，感覺是很不同的。

坐正，相當重要。

現在個陣，好似仲好過之前好大間房果度～

坐得舒服，可以有心機坐晌電腦前記返最近發生的事。

一，四月時某天，突然發覺房間地下出現積水，見到水由天花及牆身流落來，在追查其間每天早上及放工回家要清理積水，有數天娘親仲去左旅行，冇人幫手，相當狼狽。最後證實是樓上街坊來水喉爆左，經修理後已經停止流水（注意我由頭到尾都係用流字而唔係滴字），但我間房除左張床同衣櫃原封不動之外，書架同書枱已經移開左去避難，其間決定將間房大執一次，包括傢俬的擺位（即係要做過晒），經過多個月之後，間屋終於變返整整齊齊。特別鳴謝三陪兄幫手找出兇手及幫我間房重建。

二，公司搬屋已經兩個多月，今次參與不多，可以話係置身事外，好彩我真係可以置身事外，如果唔係真係會好激氣；而我依家真係冇佢地咁好氣。

三，完完全全的莫名奇妙；其中一位同事，我覺得佢嬲左我，原因不詳，諗唔到為左乜．．．本來都係懷疑既啫，但後來無意中發現原來FB已經UNFRIEND左。要知道，今時今日既我，嬲我既人年終都唔少，排隊的話都好長龍下，而好多係我都唔知有乜好嬲甚至唔知發生咩事。我繼續做自己嘢，瞓自己的覺。

講住咁多先，留返D過兩日再講。謝謝。

鍾秋哲

2011-09-13T00:33:00.000+08:00

呢兩日，WHATSAPP收到兩個MSG，內容大致如下：

岩岩有個女仔（或朋友或FRIEND）想識你，我覺得佢幾認真既，就將你電話號比左佢，呢幾日佢一定會搵你既，他叫鍾秋哲。佢話：會讓你幸福快樂一輩子！

大概係咁，有D人會加大量表情符號穿插其中．．．．

我開頭讀左頭一兩句已經好唔對路（開頭唔為意係D 節日CANNED MSG），

第一，唔係佢認真就OK的，仲要只係「你覺得」，我就覺得成件事如果係真的就幾認真唔妥當。
第二，未經我同意就俾我個電話號碼其他人，都真係唔係幾好．．．
第三，改個名叫鍾秋哲，佢老豆老母都幾大整蠱。
第四，會讓人幸福快樂一輩子呢D說話，真係我自己都有得出賣～～
第五，最重要的，我其實真的頗不喜歡中秋節呢，鍾小姐，真係很抱歉了！！

祝大家中秋節快樂。

奇聞 from 松山

2011-09-01T15:39:00.000+08:00

13:58
松山兄: 燎兄
我今日聽到單奇聞

14:06
me: 乜

14:08
松山兄: a u ready?

14:09
話說有一個唔認自己係港女既舊同事
成日話自己比人針對
但我同佢相處又ok,無衝突
雖然好多人都小佢呢樣果樣
但我今日領誤到喇
佢唔係對我態度差
佢講咗單生活趣聞出黎

尋晚佢話我知佢要整jelly
我就:嗯~"咁啦,無咩特別
反正唔係整比我

14:13
me: continues

14:17
松山兄: 今朝見到佢話失敗咗,整唔到
我問點解?佢話因為結咗冰
我話"下?!!結冰?!!"
佢話"擺喺冰箱結咗冰"
我話"你整jelly喎!!!"
佢話"係囉,jelly都會結冰!!!"
我話"擺入冰廂,水都結冰啦!!!"

14:54
me: XDDDD
小學生都識整的JER LEI~

松山兄: 我好驚訝
好撚不安
XDDDDDDDD
佢覺得係jelly既錯呀!!!!

14:56
me: JELLY真不該。
14:57
羅拔臣個盒有教架喎，如果我冇記錯的話

松山兄: 蒜頭.狗.掃把.jpg

港!!!!!
14:58
隨咗識扮靚,乜都唔識
無內涵都算,原來連常識都無

me: 我小學三年班已經可獨力鍊成JELLY

14:59
松山兄: 聽講好難過喎
一般都會結冰

15:00
me: 放條火辣辣的肉棒入冰箱都結冰啦
何況JELLY

15:01
松山兄: 真係......
我唔知講咩好
低B無下限
腦殘

15:02
me: 咁佢有冇話你恥笑佢

松山兄: 無
15:03
因為我無表達意見
我唔當佢普通人看待

15:05
me: 令我諗起當年睇一班女乾炒公仔麵

冇煮個麵便落鑊
15:06
仲要鑊都未燒熱便落油落面餅

相當惹笑

松山兄: 睇過睇過!!!!
15:07
港女真係好撚神奇

七月（19）

2011-07-19T22:07:00.001+08:00

用在更新呢個BLOG的時間越來越少，其實正確來講是沒有花時間在呢度。

日子是不是很忙？是，但又不是忙得連上一下FACEBOOK睇下人地D BLOG的時間也沒有，只是很多時候發覺原來已經很怕在BLOG寫自己的事。

我其實沒有乜野秘密，但就好怕俾人知道自己的事，雖然我好明白基本上唔會有人想知道同埋有興趣。

古靈精怪的想法我時常都有，但寫左落泥我下次睇返可能連自己都唔明。

煩惱的事我也有很多，但我又好怕朋友會問長問短，雖然我好高興我還有朋友關心自己。

隨隨便便寫幾句也很麻煩，因為我前三句有可能同後三句前後矛盾，可能有D人睇到會抽秤我，我知道呢個世界不用人人也要去理會，問題是，我自己也是抽秤自己的矛盾的其中一個中堅份子。

好多時很想寫一些經營畫室的事，但很抱歉地，那些真的不可公開，很多時都是一些發牢騷的說話，例如點解D客咁喜歡BOOK左時間又甩底，或者點解俾少少錢就咁多要求？嗱，如果你係顧客，睇到我講咁多呢D，你係咪會諗，唓，咁巴閉咪撚做囉～～（OK，我知我的客人都唔會講粗口的）所以呢，呢D又係不講為妙。

嗯．．．話唔寫又寫左一二百字。

寫寫下又發覺都有D嘢可以講下的．．．

是咁的，話說早兩星期我終於有時間返老師度探下佢地，順便攞返未畫完果幅畫同埋攞返副架生返來，傾一輪計後我問佢幾時請飲，老師話，噓～兩個都結左婚囉已經．．．我望一望正在佢畫室幫手的佢個仔，同埋佢個新抱，噢原來已經結左，仲以為仍然係女朋友添．．．

老師有兩個仔，細果個基本上同我一樣大，只係細我幾日，佢女朋友（太太）我唔記得係幾時出現的了，不過計起來都應該有三四年或以上．．．之前都有跟我老師學畫，依家見佢幫老師收學費，派學費單。心入面有些唔知點形容的感覺，果個畫面，突然俾我好圓滿果種感覺，（當然對我而言應該是錯覺）好似細仔咁，好似突然間已經搞掂晒人生好多嘢咁．．．父母健在，屋企有物業，有家庭式的生意，娶了賢妻，一家相處融洽，一家人一起得閒想想怎樣令學生再多點，或得閒畫下畫，算是冇乜煩惱吧，煩惱不會沒有的，但我一時間竟想不到有什麼事情可以輕易攻破這個幸福的堡壘．．．．．．很可怕。

再睇返自己，不堪設想。

如果硬是要給點鼓勵說話自己的話，我這些是北斗之拳的健次郎或都聖鬥士入面果班青銅鬥士要越戰越強或垂死掙扎的成長方式才是我應有的成長道路；知道了OK了，我知道那些得天獨厚的條件，先天有好的家境永遠在故事不甚討好甚至有些討厭的二世祖角色是沒我份的了，我知道了，那些都不是主角的路，我的才夠熱血，我是熱血漫畫的主人公，OKOK～～

是呢，女主角什麼時候才出場侍服我？沒女主角的漫畫成何體統。

光澤紋不死鳥

2011-07-13T20:14:00.000+08:00

係囉，又怎會死呢？

江澤民不能死

2011-07-07T23:35:00.001+08:00

古老網絡笑話：「男人不嫖娼，對不起黨中央，女人不賣淫，對不起江澤民。」

很難想像，如果有一天證實江澤民死了，女人就算不賣淫都沒有對不起的對象，那就沒有女人賣淫了，沒有了妓女，男人便沒得嫖了，那便很多男人都對黨中央不起了！到時候還得了？

所以，江澤民不能死，就算死，也不能公佈。

上億的男人對不起黨中央，中共接受不了。

Art Fête: Art Fête 接受港台節目：「原來錢作怪」訪問

2011-06-09T21:39:00.000+08:00

Art Fête: Art Fête 接受港台節目：「原來錢作怪」訪問: "Art Fête 接受港台節目：「原來錢作怪」訪問"

兩週年～～

2011-05-26T00:14:00.000+08:00

不知不覺，突然發現自己晌依家呢間公司做嘢已經做左兩年，實在係估唔到！
件件件
本來只係避難既地方，變成左長期居所。

其實一直搵工想轉，但自從搞左間畫室後，發覺呢度雖然人工低，但勝在無人管得到我，我隨時行開一兩個鐘返畫室收貨處理緊急既又得。

而我亦一副不在乎既樣子，令到佢地唔知點樣有辦法令我聽聽話話，炒我唔驚，扣人工唔驚，加我人工我又唔太雀躍（主要因為果種數目太失禮了）。

而呢間嘢換上司又比尐做細既還要密～～綜合各方面，基本上晌我既角度呢尐係叫劣質管理，我只有從中大量吸取呢種反面教材，等自己將來管理自己盤生意時引以為鑑就是了～～

唔好問我點解唔俾尐意見公司或者自己做好尐．．．我份糧唔包呢種顧問級數既工作的，我同意做好尐將來升職加薪會有影響，但係唔會APPLY晌呢間公司度，因為第一，睇你工作表現既人會走得比你快，第二，就算佢會升職加薪都唔會多，所以，佢都係算把啦！！

十年前後

2011-05-04T23:44:00.001+08:00

寫了一篇博文，但沒有POST出來，因為感覺很負能量。

很難接受自己仍會表現出這個心情於人前。

最近的感覺讓我聯想起十年前的日子，我自己本人也說不上為何會這樣。生活上，十年前我開始出來工作，過著看不見太陽的日子，一天工作十多小時，而且因著各種各樣的因素，感覺上很孤獨。

如果論工作生活，其實比十年前有過之言無不及，日間替別人打工，夜晚回自己的畫室工作，連星期六日的時間也回到畫室工作，一星期至少工作116小時。從前放工會遊一下車河，跟朋友食個飯才回家，現在長期宅在畫室。雖然如此，其實感覺很充實，也不覺得什麼不滿，畢竟是自己選擇要做，是自己的事業，現在還沒有什麼回報，但仍覺得很值得。只是，感覺上跟十年前一樣，很孤獨。

最近常常夢見十年前的人，常常想起十年前的事。家中因為漏水，整理房間的東西時發現自己十年前燒了很多當時的歌，很想知道當時自己聽些什麼的歌，將它們全部帶回畫室，一邊聽一邊勾起很多事情。

很多時都檢討自己，其實，這十年來，有進步過嗎？

Art Fête: 「塗」出性別框框藝術作品展

2011-03-19T04:59:00.000+08:00

Art Fête: 「塗」出性別框框藝術作品展:

"呢個WEEKEND有好節目，

來看看學生們怎樣表達性別平等的訊息，

將性別平等這個訊息傳開去，

讓男性女性都獲得應有的尊重！"

＜無題＞

2011-03-15T23:58:00.000+08:00

3年前，我還在那一開始便做了七年的公司工作，那段時間很不順利，所有的工作都一團糟。
老闆找我講話，說：知道大家都辛苦，但為何不咬緊牙關熬過去？

熬，我是可以的。但是當我知道某些事情，和明白到自己那時候被怎樣對待，我是不會盲目追隨的。
我這個人其實真係的簡單，也沒有特別的要求，服從得來又會獨立完成各個任務，很多事我不是不知道，只是我不計較吧了。
不過如果當我是個傻瓜，只是單純的利用，那便只好說再見了。

當年在三十歲而工作了七年的日子，突然在想，今天我在這間公司的眼中突然變得一文不值，我可以找過另一份工作，那十年後，甚至廿年後呢？而且還是技術日新月異的IT行業，對未來真的很沒安全感，毅然放棄好像很穩定的工作，計劃轉行。

我沒有很天真的以為去到其他公司會舒適一點，但當年的計劃就是要看看外面的人和事是怎樣的，看看其他行業是怎樣做事的，所以先到了一間完全跟本行無關的公司工作，認識到原來真係有些上司是癡線的，然後便要走了，再到現在的公司，見識過原來自己的價值可以重新演釋，因為人工平，我可以覺得請PL其實好便宜，因為這個人工隨時可以搵十份八份同樣的替代工，我突然很不在乎，因為很不在乎，你才會變得很有價值，很無敵！不過其實我很無奈！

因為份工其實真的很簡單，加上我覺得佢冇出足人工俾我，有些他覺得我做得來的工作我都只是表面做些皮毛來交貨（不要跟我說我做得到做得好公司會給我更高職位和人工，我現在不會信這一套，尤其是我實際觀察分析過的公司），我覺得剩下來的時間是可以開發其他收入，由我最初驣多一晚出來教畫開始，以至我現在開了一間畫室。

開了畫室後的計劃是一步一步加多點時間落去做，讓畫室可以成長到可養起一家人，然後膠工可以幹可以不幹。現在事情也是順著方向走，只是工作量突然變得很大，大到開始時有些招架不住，但居然慢慢便習慣下來。
早星期我還在想著自己要熬過去，一邊要應付孤獨寂寞的情緒，一邊在處理突然既大量又惱人的工作，過了幾天居然已經習慣。
我還在想自己會不會其實已經癡左線。

在此很感激各位有心幫忙的人，無論是精神上或實際上，甚至以你不為意但用很特別的方法讓我又瞬間強化起來。
沒有你們怎麼成事？

突然，最近又想起首代目，每次遇到逆境時，我都看到跟你一樣對待我的人，而我也一樣從地獄般的境界瞬間強化提昇。
沒有你們，怎會有我？

謝謝了，這份力量我又要收下了。

皇上表示支持！

2011-03-15T16:02:00.000+08:00

將要接任國王的柏特，對克服口吃沒有信心，他一邊練習一邊哽咽着說，我在加冕禮會出醜，在讀聖誕文告會出大醜，我做不了國王，我做不了。哭了。這時，他的妻子從後抱着他說，你知道你當年向我求婚兩次我都猶豫，我不是不愛你，我是不想過王室那種拘束、多應酬的生活，但後來我想到你口吃，許多酬酢不會找我們，所以我就答應你的婚事了。

這段話講得真實又動人，我不覺被感動得鼻酸。未來王后這段話的含意是，你不要以為口吃是大毛病，如果你不是口吃還不一定可以娶到我這樣愛你的好妻子呢。另一含意是，不管你是不是會出醜，我都會一直站在你身邊，你口吃我愛你，你出醜別人笑你但我支持你。簡單而深情的話語。

這是獲奧斯卡獎電影《皇上無話兒》的其中一場戲。人生有許多事是身在其位的人不容選擇的，就像柏特接任王位，明知自己口吃當不了國王也要當，妻子明明不想有許多王室酬酢也要做王后，而且還要努力幫國王克服這個障礙。

當人生遇到沒有選擇必須去做、即使力不從心也要做的時候，有自己最親愛的人在一旁支持，是非常重要的。不管是多麼堅強的人，遇到一時無法克服的難題總會有洩氣的時候，這時親愛的人的鼓勵比什麼都重要。

我在人生歷程中，也有過因為要忠於自己的信念而面臨事業下滑的時刻，在是非對錯與成敗得失間我選擇前者，正當心靈感到脆弱而猶豫不決，最親愛的人說：不管多少人說你不應該作這樣的選擇，但我認為你的選擇是對的。

這聲音多麼重要。電影那一段使我目眩，因為在我身邊已沒有了這聲音。

從蘋果專欄轉載李怡先生的文章，看了不知那裡來的感觸。

最近算是比較辛苦的日子，之前也不是未遇過這種日子，不過其實今次的孤獨感還比較重。

基本上，我總是很一廂情願地以為(希望)某個或某些人會給我精神上的支持和鼓勵，當然我最後都知道所有事情我都只會繼續獨自面對、支撐和解決。

早數天跟認識很久的朋友說：現在很多人和事都很淡然，做到對人不會有要求，緣起緣滅，人來人往，我可以幫到朋友時便盡量幫了，幫到人總是開心的，那管即使將來朋友已記不起。人情冷暧是正常現像，淡化那些自以為是地認為我對你好所以你也應對我好的想法，人會灑脫一些。

每個人都會有他/她自己的生活，他/她要面對的困難，其實當你希望人家去關心一下你的同時，他/她也是這樣想吧。

那各位朋友，加油了！

你啊，又大一歲咯～～

2011-03-01T01:14:00.004+08:00

今日，又到了一年一度的生日。

其實，也沒有什麼特別的要說。

可能又會在發發牢騷。

朋友們約了我明天，應該是給我做生日，昨天跟家人吃飯，有阿娘，家姐，細佬，姐夫，小外甥。

嗯．．．跟家人吃飯時的氣氛很奇怪呢～～也聽到些奇怪的說話，我在想，是不是我有什麼不對呢？

我其實，也很佩服自己，很多事，很多說話，也當別人可能是無心之語，我也不放上心了，我EQ算很高了，比很多平常的人算是很高段數了。但其實，我還是會不開心的。

這種事這種氣氛，按記憶，不是第一次發生了。我也不知應該做什麼，不要做什麼應該是最好的吧，為著，就是不想任何一位家庭成員有任何難做之處。
我自問，我們一家人，好像沒有負過任何人。有些事，很難理解呢！

我常跟龍哥討論身邊朋友間的人際關係，大家都同意一個做法是，如果大家是相處不來，那沒必要，就少見面，或少些見面。我只是不明白，又不是有什麼大的恩怨，又不是滅你門，坑了你全副身家，搶了你的新娘／新郎，其實人生短短數十年，有什麼要結種無聊的怨？

我生日願望之一，希望身邊的親朋戚友，大家沒有什麼對不起大家的，就好好愉快相處吧，即使別人有什麼對不起自己的，學一下放下，學一下原諒吧，不懂嗎？讀些聖經佛經，都有教這些道理的。

所以，對於很多事，我都選擇了體諒，冇嬲。

本來今天，有客人BOOK了晚上的時間，最後，兩組客人都分別取消了BOOKING。
我倒是沒所謂，反正還是想回來做一點點東西，結果做了一晚。
沒有想過生日會這樣過，感覺不多不少有點落寞，其實，是真的很忙呢。
今天同事買了蛋糕請我跟另一位同事吃，我們都很快地完成儀式，可能同事反而覺得很沒趣也說不定。但真的很多事要幹呢～我切完個蛋糕，還繼續接BOOKING的電話。

基本上，除了日間的那份食之無味的膠工，我全副精神都放到畫室上。
有人問，不辛苦嗎？
當然辛苦，而且，回報還未到合理的程度，但整體感覺比幫人打工好，當日幫人打工辛苦完人家有權抹殺你的努力，當然可能真的有個人能力因素，但很多時，應該說是絕大部份時間，是其他理由，甚至不需要理由，你便被幹掉，被取締了，現在成功失敗，都是自己責任，即使仍有很多控制不了的因素，也仍有不公平的情況，但感覺心服口服得多了。

這些年來，尤其這半年，對社會，對生存，有更深的體會，對很多所謂好人好事，不是不相信他們，不是不相信還有這些存在，而是，你永遠不能想著要依賴他們，不要期望有人會體諒甚至幫助照顧你，因為，他們也自身難保，他們可能比你還可憐，可憐在，他們自己也不知道原來自己其實相當無能為力。
當這個世界，大家都認同了某些價值觀，是一件很可怕的事情。因為大財團搵得錢多，所以大家覺得要弄個基金，叫有錢人捐錢，搵到錢的回饋社會，有能力幫助沒能力的人，好似很合理的樣子是不是？但是，其實大家都有能力養活自己的，如果社會是有足夠機會的話，大家，只是需要那些財團覇權什麼的，俾條路行下．．．
自己搵自己應得的回報，享用自己勞力的成果，那才健康吧。今天受你施捨小恩小惠，還被LABEL，被人LABEL可能還不算什麼，可怕是有一天大家覺得被飼養才算生活愉快才算是合理，那便是一個隱性的奴隸社會了～～噢，想起來也覺得可怕，其實現在也離奴隸社會完全體不遠了。

我另一個願望，是自己能靠自己養活自己，不當任何人奴隸，不被任何人飼養。

今年開始，好多人叫我搵女朋友甚至結婚，有人話出年唔派利是俾我，很絕。叫我結婚的都很不負責任！
說起來，早年有人問我想幾歲結婚，而我就是說33歲，其實當時都是亂UP沒什麼根據～
今年就是33了，不夠時間了，too bad~~
現在呢，我一星期可以自由活動的時間接近沒有，一天到晚都在畫室，相信可以跟任何人發展的機會很微了，也不相信有人會覺得跟一個一天到晚不是在工作就是在想怎樣可以搞好畫室其他的事一概不理的人一起生活會很幸福愉快，一個比從前更加不見天日不特止，而且沒錢所以很沒安全感，又沒時間大家去玩呀去外遊什麼的，不用看也知道沒有什麼看頭。

如果呢，有人知道我這個狀況但覺得我仍很值得「買入」「加持」，我會認真好好地考慮發展而且會認真讓她覺得投資這個股份很值得也實際讓她得到回報好了～這個不算是願望囉～是一個承諾好不好～～那願望就算是有這種人出現讓我有機會考慮咯～～

我啊，又大一歲了，好像還很不濟，今年要好好努力了。

2011渣斗馬拉松

2011-02-28T23:18:00.000+08:00

今年既渣打馬拉松，報名果陣，我是有想過應不應報名，因我實在能做計我沒太多時間練跑。

但基於我自己常對自己說：很多事都是有心就會做，事在人為而已～～

嗱～就係咁，又昆左自己報名～～

跟去年一樣，報半馬，事關去年練完半馬後，十公里其實真的沒什麼挑戰性，而且跑十公里多人到好似行旺角咁多人，我咁怕多人，好自然抗拒再同D跑十公里的街坊一起散步（我沒有看不起他們的意思啊～～）

一如所料，我這半年是忙得連咒罵各界柒頭的時間也沒有，邊得咁多時間練跑？這半年練的日子很少，有機會練時的路線也不夠長，最多也只有十公里，是相當不足的，而我忙的程度是，連去拿馬拉松個號碼紙同袋紀念品都要朋友代勞．．．．

唉～～就係咁，便出事了～～

出發前一晚，我很早便睡，往年，我不是在打XBOX便是睇戲，基本上都冇瞓既，今年，一瞓落床便瞓著了～仲要SET左電話響都嘈唔醒，最後我的朋友打來我才醒，但換衫梳洗一下都已經夠鐘，唔夠時間食野了，最後只好去樓下間些粉買左難吃的麵包來吃。此乃其中一個影響今次馬拉松結果的事。

今年天氣很不錯，不太熱，也沒有早前那種凍，想起去年那濕熱天氣，很想死掉～
天氣很不錯的情況下，我開跑很快便調節好呼吸，跑得很順，個心仲諗，吖～～今年狀態唔錯喎～～
點知，跑左6﹣7公里，竟然開始肚餓～為免自己跑跑下餓得滯暈低，我過左十公里後見到果D健康飲品，就補充返D糖份，免得眼花花～然後很順利跑到西隧，仲諗今年冇好似舊年咁晌度散步睇風景～應該早過舊年少少返終點～～

過西隧出口，我照例走路不跑，免得太累跑不下，誰知道行完上斜想再起跑時，竟發現雙大腿的四頭肌都有少少抽筋，然後我拉一拉再走一段，諗住再跑，之後再起跑，SHIT～～～～連小腿都抽了，應該是心理上驚大腿再抽而用左小腿肌肉．．．．

就晌咁既情況，我只好全部港島段，都是用走路的．．．鳴鳴～～～

其間．．．仲有有線電視訪問我（只因我是在散步，記者知道我可以詳談吧．．．（膠））

好不容易走到皇室堡外，嘩～～身邊好多人同你打氣喎～～為左不要辜負群眾對自己的熱烈支持，同埋不失半馬選手的覇氣，只好再度提步向還有二百米的終點進發～～～一個轉彎．．．．小腿又抽～～而且仲係真抽～咁只好又慢慢跛下跛下咁行返去了～～

今年成績嘛～～三個鐘多少少吧～～大會時間唔知．．．因為不在列上～～

照舊，又係冇乜點練既小安迪又是兩個鐘十多分鐘就返到終點，仲問我係咪好唔憤氣，其實我又唔係，至少佢有打網球，咁每次走動都兩粒鐘，肌肉應該習慣兩小時的運動～而我，日日晌畫室度扮藝術家，係咁上下了～～

今年，算啦，唔駛俾人抬返去咪當表現好兼夾有體育精神囉～～頂，仲咁阿Q。

寫信給十年前的我

2011-01-22T11:48:00.000+08:00

給2001年的我：

這封信寫了很久，但想說的很不好組織。不過我真的希望可以在1月23日前給你寫這信，即使你這段時間大概其實不會有太多空閒時間，可能連這信也會擱在一邊。

現在這段時間你是很開心的，好好享受現在的日子，無論將來發生什麼事，也請好好記著這段日子。

有一件事是比較迫切的，在你現在的那一年的明天，即是一月廿三日，是年廿九，你今年沒有年卅，所以明天晚上你會依舊到祖母家食團年飯。你現在問問自己，你其實明晚吃完飯想做什麼，你不用告訴任何人，你自己不會騙自己的（雖然後來你擅長的其中一件事就是自欺），想怎樣安排便安排吧，其他的支節都不用理會，有些答案不用理會，明晚想怎樣直接講便可。

可能你不會明白這件事有多重要，說實的就算現在的我也不能確定如果明晚你做的／不做的跟我那年的不一樣，之後的事會不會變得不一樣，但我希望如果你做事能按自己心意而行，那至少自己不會覺得違憾。

你很應該明白，我們從來都不是一個喜歡預知事情的人，因為那種失去幻想和期待的生活會變得很乏味，所以事情經過我不會說的，而且那也不是重點的事情，要知道個別事件的改變，也許真的會引起蝴蝶效應，但人生中有些歷煉才會成長，未卜先知地躲避某種事情並非好事，事實上也不能一一避得過，所以，倒不如分享一下我這些年從地獄學會的一些心得，也有些忠告可以說一下，對你來說比較實際一點。（放心，地獄只不過是有一點誇張的形容）

無論明天的事是照原來的歷史來走，還是已向一個我想像不到的路線發展，人的一生，總會遇到很不開心，很不如意，仿如被人從崖上一掌打落山的事，請謹記，這世上沒有誰對你不起，凡事總有因果，可能根本不是你的問題，有些事發生了，自己檢討一下，問心無愧，那便好了，不要執著，事情總會過去，只要放開了，就像風穿過身體一樣，舒服，簡單。

你身邊有很多好朋友，好好珍惜，好好對待。朋友有需要時，能力所及，多幫忙，但不能有希望得到回報的投資心態，朋友們都有自己的處境，自己平日多提升自己的能力，能助人也能自助。

工作方面不用擔心，你不用很久便找到一份工作，也有很好的上司老闆，你會學到很多工作上需要的知識和技能，好好學習，好好工作。但請謹記，好好安排時間，工作以外的時間好好休息，和進修，那便不怕到了某一天發覺自己的價值只限於一處地方。畫要好好畫，現在正在做的教畫PART TIME工作也好好一直幹下去。

日常生活可以的話節儉一點，最好不要太早買車，因為某個原因，我知道你是很想買很想擁有，如果真的要買那沒辦法，說實在養車的日子也很好玩，但留些錢作儲備也很重要。

有一方面我反而需要你的幫忙，未來如果有事讓你覺得創傷很大，希望你因為我之前的說話而變得更懂得面對，變得更堅強，不要太執著，早點學懂放下，不要失去對人的信心，不要失去愛人的能力。你可能會遇到很多你覺得莫名奇妙的人，嗯，我不知怎說好，你便隨遇而安吧，保持一顆平常心對待所有事吧。

最後還是要忠告多一次，人生才短短數十年，很多事實在沒必要太在意，做一些能力範圍內的，有意義的事，樂觀開心地過活，認真面對自己，不要自欺欺人。

好好迎接新一天的來臨，希望一切順利。

2011年的我

2010看似驚天動地其實很平淡的總結

2011-01-02T22:43:00.000+08:00

在回顧2010年之前我都會看看自己這一年來寫了什麼鳥事來，然後發覺全年只寫了23篇BLOG，而且有部份被視為呃文之作，包括其實無內容的BLOG文，或者一篇拆開上中下集此類既古惑但其實很體貼的技倆。

BLOG文數量同我人工一樣，少了一半。最重要係我2010年頭沒有定下來年大計所以冇得睇返我做到幾多同做唔到幾多。

不過原來，所謂大計不大計，唔會寫左就做到，唔寫就乜都做唔到的。

2010可以分成上半年和下半年來看。

頭半年實在冇乜特別，除了返工和返學考試，基本上很平淡和很窮的渡過。

工作方面我繼續我既惡晒搏炒模式，可笑的是，全公司話事果D沒呢個打算，世事就是如此的諷刺，一份工踏踏實實認認真真一百二十巴仙努力地做上級沒有很賞識，反而呢一份每天做完就閃，不想做的是旦做的，完全沒有人說你半句不特止，仲會覺得你工作認真聰明醒目，無他也，公司大部份的人尤其是經紀，程度真係有目共睹，我資質平庸但係同佢地比我以為自己已經係全世界最聰明既人，自信心即刻返晒來。

上半年工作總括來講，真係無乜好講，一份食之無味棄之可惜既雞肋工，人工超低，但貪佢冇人管我，專登遲到冇人吹得我漲，其間仲俾錢請我去讀左個course，房外班智障經紀可以隨時隨地爆佢地唔需要申請同擇日(雖然我一D都唔覺得好玩)。其間不停諗有冇其他兼職可以做下以幫補家計同埋交學費。

就晌我諗諗下其間，在踏入下半年時，機緣巧合神推鬼使之下開了自己的畫室-- Art Fête
，(嗯嗯~~終於晌度賣廣告了~)，有關呢間畫室既成立經過還在連載中，有興趣可以去 Art Fête 度睇下(嗯嗯~~大家最好就去睇下啦)，就係咁晌下半年開始就好忙同埋開始好大壓力喇。

基本上由決定開畫室開始，就忙過不停，腦好像不曾停過下來，實在經營一盤生意是有很多要兼顧的，和我合作的還好是家姐，相信因為咁已經減少了很多問題。畫室由八月開始經營，扣除中間有些日子有其他重要的事例如四爺和澤少結婚外，印象中我應該沒有放過假，公司我是間歇性請病假和事假的，但最後都會抽時間做和畫室有關的工作，真的找一天出外走走的時間是沒有的。尤其中間十月和十一月做團購客的時間是相當可怕的，星期六日才是真正工作的日子。當然，其實我希望以後都這樣地忙，不過不要常常做團購客才這樣忙才好。

總括下半年，我大部份時間都放了在畫室，其他的事都很少理會，也趁這個時間多謝家人和朋友們的支持和體諒，尤其是娘親大人，我放在屋企的時間的確很少，也比從前更少回家吃飯，有時只好叫她出來佐敦吃，然後我繼續在畫室工作。畫室的確是一個很好的地方，在沒有學生和客人時我可以完全獨處佔用所有空間，可以諗野，畫畫，尤其現在是冬天，不開冷氣很省電！
嗯...畫室，最好每分每刻都有客人才好~~

今年我的好友四爺和澤少都相繼成家立室，很循例地，上了岸的人都喜歡拉人上岸，他們倆又在關心我的人生大事。嗯，不需要關心我的，你們的太太都是一等一好太太，請好好珍惜。這回事從來不在我掌握當中，每當我伸手想去掌握，就是準備承受崩潰的時間。所以，保持現狀已經很好，應該說，除了保持現狀，做甚麼也是一件很差的事。況且，現在最重要的時做好自己的事業，我的女人可不要跟我一起挨苦。

所以，我今年的目標是搞好畫室生意，做到好到可以辭掉那份雞肋工，還可以支付自己和家姐的人工還有錢剩便好！希望可以一個人去一趟旅行，然後有幾次要跟好友們一起去。每週可以拍多些照片，多點欣賞身邊各樣美好的事物。我希望自己沒有給身邊的人太多麻煩，希望家人和朋友們都愉快的生活。

娘親今年六十大壽，希望她以後二三四十年都過著開開心心無憂無慮的生活。

本報訊：去年聖誕借錢于友今年兄弟成襟兄弟

2010-12-25T12:06:00.000+08:00

聖誕節有人好大方咁借錢俾朋友溝自己條女，所以兄弟變了襟兄弟，情人變成了阿嫂，故事相當淒美動人！

好鬼鍾意個MV！

充滿計劃之外的平安之夜

2010-12-24T11:59:00.007+08:00

本日中午，手痕致電舊公司珠海分部。跟接線生舊同事吹兩句水關心下近況之後，她告訴我CONNIE呢個星期落左香港，然後佢將條線TRANFER左俾CONNIE，我問佢幾時返上珠海佢話聽日，我問佢夜晚有冇約人佢話冇，只係有另一位珠海同事都晌度，就係咁我就叫左佢地一齊食飯。

約完覺得唔對路，因為今晚係平安夜，諗去食咩係好麻煩，最後冇諗，諗住到時先算，覺得要避開多人既地方，我好怕多人。點知原來另一位同事想去星光大道！咁咪約佢地去老尖，問佢地食乜大家照舊冇乜意見，最後經過大快活竟然有人提議食，我雖然覺得好奇怪但其實又都OK。食完就向尖東方向行走出發。

途上影相其間竟然無約過既情況下遇到二公子及他的女友，二公子表弟及她的太太四人，感覺像玩RPG中途有同伴加入的情況。晌中間道果條橋發現警察話星光大道好多人然後封左唔俾入，改道去1881又話多人封左，發覺咁樣都行左一晚其實好攰，大家行去佐敦送舊同事去搭MTR，跟住去翠華飲杯嘢後散水。

就係咁，本來平安夜自閉一晚反而係見左好多人，同埋上次聖誕出呢D咁多人既地方同人迫已經係19幾年前仲讀緊書既時候。祝大家聖誕快樂，阿彌陀佛。

Art Fête: 藝術家巡禮系列 - 俄羅斯插圖師Самойлова Виктория

2010-11-13T21:57:00.001+08:00

Art Fête: 藝術家巡禮系列 - 俄羅斯插圖師Самойлова Виктория: "
俄羅斯插畫師，作品浸透著黑色童話氣息，顏色偏向低沉，鮮艷度比較低，但配搭調和，不突兀。
作品角色造型獨特奇趣，表情大都帶點羞澀含蓄，而且隱隱表現出落寞和孤寂。

http://www.revision.ru/work/24897/"

唸唸碎。

2010-08-29T04:41:00.000+08:00

很久沒有寫自己的blog。

不是沒有什麼想寫，而是，不知應不應該寫。畢竟，我的文字其實沒有多少個人看，但確實曾經搞出了一些風波。風波在我來說很大，但郤是無聲無色的。
每隔一段時間，便會檢查自己的心理狀態，有沒有感到開心，有沒有不開心，是的，這些直接的感覺，我也要問一問自己，還要求自己不要自欺，才可以知道。

多種的心理防衛方式當中，我發覺我用得最多的，是抑壓。最用能量的一種方式。如果可以量化和跟其他人比較，我的心理能量，是不是很高水平？

檢查了自己一下，發現有巨大負能量滋長，也同時郤發現自己要求自己越來越正面，自己也表現得越來越正面。嘿，光明與黑暗，同時強大起來。我會不會好似龍珠入面既天神一樣，接受不了自己的黑暗，分裂出一個魔王出來？

我很想有人可以傾談，但是還有誰我可以將心底的說話都說出來呢？又其實有多少人願意理解我？在途上可以相濡以沬的同行一個也沒有的寂寞感，又再湧現。
對於和別人的距離，走開了一少步，我已經覺得偏離了航道，儘管我從來沒有跟人說過自己的航道，事實上連我自己也不知道。所以，又是我的責任。

我需要一些宣洩的渠道...但可以是什麼？
我很久沒有去跑步，打波，做運動了...
如果，要我分裂出另一個我，不如，給我一個州替身人偶。小時候，有一套卡通叫神奇小子，小主角要帶上頭盔，襟章變身為神奇小子出動時，便會啓動他的人偶，用來掩人耳目.....

替身人偶，最好給我十個八個。

替身人偶，本來我至少要他媽的十個至一打，後來想深一層，其實我只雖要一個替我返工賺錢，其他的事例如睇書做運動約朋友飯局去旅行等，都是由我自己做好。嗯...錯晒...我都係要至少一打，幫我返12份工，咁咪可以有數倍既收入。

仲有...留一個陪我傾計，咁可以唔駛搵個樹洞講嘢。

快樂之伸延

2010-07-10T04:50:00.003+08:00

讀到ck的這篇 - 做左人老豆阿媽之後

想說的不是對於文中所說的生左小朋友後工作不工作的問題，對我來說是很遙遠的事，而且現實是你其實沒有甚麼選擇，正如文中所講，如果你可以為揀出唔出去工作而煩惱，呢個其實係一個happy problem...

讓我共鳴的是最後一段：就係自己都唔happy，跟(根)唔會有能力帶到快樂俾身邊既人。要人開心，首先要make sure自己唔好有委屈既感覺先得。

非常同意的。我很重視所有人際關係，盡量希望身邊所有人都開開心心關係良好。人越大經歷越多，尤其近十年發生在自己身上或朋友身上的都影響極深，明白了幾個道理，
一. 人不能討好世上所有人，總有為難的時候，也輪不到你保持中立。
二. 即使有一天其中一方決定中止或丟淡雙方關係，也不要惡言相向，連侮氣說話也不要說。
三. 所謂是非黑白，除了大是大非的問題，很多時都各人有各人標準，各有各看法，根本沒有因為意見不同而傷和氣的必要。
四. 沒有將自己的想法硬加諸別人身上的需要，你覺得你是為他好，世上所有決定的後果你真的能預測嗎？
五. 尊重別人的想法很重要。
六. 做人不能太自我，要學會放下自己，多在別人角度去想，也多為別人設想。是的，放下自己，做人是比較容易快樂的。

近年發生的事，讓我很珍惜身邊的朋友，我亦持著上述的理念原則去對待他們，當然，不是每個朋友都欣賞。又當然，我沒有強迫每個人都了解我的做人方針。
看到ck的那段說話，除了同意，還有是在想：我其實make唔make sure自己沒有委屈的感覺？
加上，是日四爺跟我說最近的其中一件事.....他是覺得我太維護一位朋友吧...那一種太沒所謂的遷就讓我感覺上很沒骨氣嗎？

嗯，又真的沒有委屈的感覺啊....連四爺用少許責備的口吻，我也不以為然...是啊...其實真的是一件太小的事情，實在沒必要加強呢件事的嚴重性和麻煩，是很容易解決的問題。

對於我這種態度，我只要感到開心，我會繼續這樣對朋友的....

當然，可能會有人反轉來解讀，就是我只要感到不開心，我其實可以收回所有的付出，我這樣說穿了也不過是其中一種自私的自我滿足，well......也是可以這樣解讀的，這種說法是解得通，也很黑暗，cool~~~

會有人明白的嗎？

致命來電

2010-06-30T01:56:00.000+08:00

昨日，如常接到了一些訪問或推銷來電。

來電人：請問閣下身邊有冇60歲以上既老人家？
(我明白佢問乜但下意識還是望望身旁那兩個女同事.....忍唔住笑左)
此外，問題設定得實在太低水平，我呢種長期處於sales defense狀態既人，一定會答：冇。

來電人：咁老人家係咪同你一齊同住一間屋？

連我都冇耐性同佢胡扯下去，立即答：(好唔耐煩)都話冇60歲以上既老人家咯！

來電人：打擾晒(收線)

即係呢...我唔係話想要求社會上個個人都好醒好精靈，我自己都係呆呆滯滯果一類亦冇理由咁要求，但係...唔好連自己做緊乜都唔知唔好照住手上份問卷清單照讀，俾少少logic諗下野得唔得？

見到個社會咁真係好心痛。
如果佢係我既親朋戚友仲立即有致命的感覺。俾我死左佢罷啦。

防潮箱

2010-06-23T20:54:00.000+08:00

尋晚，娘問我做乜唔買個防潮箱。

嘿，仲好講，其實我早就去睇過，但今個月先去攞返先前拎去抹既相機和鏡頭，仲邊有錢？

知道我搵幾多又知道我俾幾多你，做乜仲提呢d傷心事？

仲問我星期六食麵包係咪因為冇錢...係架，唔又想食太多又想慳少少。

一諗到咁，仲俾人問呢d問題然後又覺得我成日去消費，真係有點想發脾氣既感覺。

我計來計去，依家仲未窮死，究竟點解？

積極d，諗辦法！

除左要買防潮箱，仲有買相機背囊，買flash...換notebook......居然只係諗到要買呢幾樣嘢...其實我已經無欲無求。阿彌陀佛。

努力不工作計劃(三)

2010-06-11T02:21:00.001+08:00

<LONELY PLANET> - 黃照達

寫努力不工作計劃前，其實應該要介紹下呢本書 - Lonely Planet。

這本書，本來是被走漏眼的。第一次經過書店，見到個名，以為係旅遊書果本，冇理到，行過左。爭D走寶。

第二次再行書店又見到，無意識狀態下攞上手翻兩翻，發覺原來係漫畫，公仔仲好熟口面，係呢個blog既主人：http://www.ok-head.com/blog/，由於其實一早好鬼鍾意呢個作者既幽默和獨特作畫風格，而且冇諗過佢會出書，基於買書防衛力過低加其實都只是數十元的價錢，唔小心又捧左返屋企。

書的內容主要係講主角有一日突然被辭退之後量地其間的經歷，對周圍環境的觀察，對生活的看法以及一些狂想。

書中有些地方讓我很有共鳴感，例如：

- 被炒/辭工後其實感覺很爽！

- 辭工後第一時間出走。

- 常常覺得生活很刻板，很怕重覆。(其實係咪真係有人鍾意日日都係咁果種「穩定」呢？我完全simulate唔到果種人既想法！)

- 覺得個城市(d人)很沒趣。

而努力不工作計劃呢個名，係取自書中「不工作計劃」呢個term，不過我份人其實做事有點努力，所以努力地加了努力在前面。

順帶一提，作者在FACEBOOK開左一個叫「不工作計劃群組」，有興趣可以JOIN，不過其實冇乜用的，你還是要工作的。

努力不工作計劃(二)

2010-05-04T02:18:00.000+08:00

辭退左果一份膠工之後，我休息了四個月，洗晒d錢，然後找到另一份做IT的工作，但已由一間IT公司轉到一間非IT公司。新公司工作量不多，人工又KEEP住我原來的水平，本來，事情算係向住我心目中所想的方向走，但中途總是有些波折，那一個上司似乎因為我的遊刃有餘而覺得我唔盡力/覺得用唔盡我而覺得不滿/覺得唔抵，大家互相折磨左大家幾個月後佢頂我唔順而叫我交辭職信俾佢，就係咁一向懶既我居然一年內遞交兩封辭職信，實在係宇宙奇聞。

而晌我遞左辭職信冇耐，二公子就回報佢公司再搵人，由於我窮到已經承受唔起冇糧出既日子(請注意：我只係承受唔到冇糧出既日子而唔係冇工返既日子)，即使人工得返一半，我仍然一口答應，其實我都已經叫高左少少價，不過我又知佢都係係咁以好似加返少少咁...

呢間公司咁既人工我都照做有以下原因：
1. 因為當時為勢所迫
2. 佢唔係IT業，而佢IT的工作只佔少許，我可以學果個行業既其他嘢。
做落之後發覺
3. 以我既標準，工作量超低，我成日話忙，因為我想維持呢個狀況。
4. 管理層唔知真傻定假蠢，總之我可以控制部份決定，例如成功叫佢請多個人負責IT同埋其他濕碎嘢，實際上我充滿了冗意！(而我其實懷疑我既演技係咪真係呃得下人。)
5. 因為 3和4，我可支配的時間其實很充足

經過這多個月安定下來，應該有資格寫一份努力不工作計劃：

1. 所有定義為TIDIOUS的工作，諗辦法唔駛自己做。例如，省略佢，因為做來根本多餘，省略唔到的，交俾其他WORKING LEVEL既人做。留些時間給自己做應該做和有意義的事。

2. 化繁為簡，簡化所有工作程序，免除所有好睇唔好食的工序。可以自己話事的，自己拿主意簡化，拿不到主意的事，平時多點宣揚簡單的好處，甚至推銷簡單化主義給話事人，這才是顯露你在工作上的價值的事。

3. 以上兩項做到的話，日常工作應該可以省下不少時間。而必要做的事，用最簡單直接的方法完成。仍然很忙的話，用你的身體語言向話事人表達你正在OVERLOAD，例如，向住佢咳，最好咳出血以加強說服力；咳血污糟果頭嗎？可以扮暈，重點是晌老闆面前。

做到以上3點的話，那你應該
4. 準時返工及放工

5. 每星期真正工作時間不應超過25小時

6. 每天預留一小時思考

7. 每天至少做一件令自己開心的事

8. 發掘自己真正的興趣，然後向著專業的水平進發，但專業得來不可失去樂趣(專業和樂趣沒有抵觸，但很多人一擺出一副專業的臭口臉便變得很沒趣)

9.當你那興趣可以專門得創造收入時，那便嘗試一下以興趣來維生吧(重點是不要以興趣為工作，工作兩字不能亂用)

以上計劃只適用個別人仕，慎用。

努力不工作計劃(一)

2010-04-30T14:49:00.000+08:00

好幾星期之前，我在PLURK寫了說想DRAFT一個努力不工作計劃。

WELL~計劃喎，自從我第一份工辭鬼左之後，我已經唔駛再寫PLANNING，PROPOSAL，PROCEDURE，INSTALLATION GUIDE，USER GUIDE，寫REPORT，寫MINUTES，甚至...EMAIL，的確誇張地連一個正式D既EMAIL都冇寫過咁滯....嘩，感覺幾爽呀！！(係，從而令我D僅存本來都係得少少既語文能力都冇埋)

依家搞到想學人寫個計劃，真係唔知點寫！

不如，申報左自己個狀況先：

話說，小弟當年初出道在一間IT公司一服務便服務了七年之久，臨尾果年相當不如意，而且當年快將三十，開始檢討自己起來，快三十才檢討自己有人說太遲，其實我一直都有檢討，不過之前一直不覺得沒有問題......嗯，更大可能是我的強項─自欺欺人之故......ANYWAY，到了那時候，我覺得：

1. 在這個工作環境學到的SOFT SKILL差不多了

2. 要學的TECHNICAL SKILL在這裡沒有時間學

3. 在工作，學習，家庭，朋友各方面失去了平衡

4. 收入和工作不相稱(ICAC唔會捉我的...最多恥笑我)

5. 真正想做的工作不是這種工作，簡單D講.......入錯行

6. 繼而令我......不想工作

然後，開始諗其實自己想做乜。我平生有兩樣技能係學左好耐的，一是畫畫，二係學拳。

我冇諗過教拳，又冇諗過可以用拳頭來搵兩餐，我都曾經好似黃曉明咁問宇宙最強甄子丹：「一個人打唔打得低十個人......？」我師父同宇宙最強都係答(慢條斯理地)：「至好就唔好打交啦。」我又好鬼聽話，學到一個階段後就冇同人打交......實在我唔係好清楚自己究竟有幾打得...或者有幾唔打得，我又未有資格教人......雖然當年辭職後，忽發奇想：不如去打下黑市拳吖......但係我怕受傷怕痛，都係算啦。

剩下來，我只有向畫畫果方面諗......諗諗下，其實畫畫先至係我既本行，我未做IT之前，已經教左好多年畫啦，咁我個腦就諗左好多呢方面既可能性了。

要實現呢一系列既可能性，並非一朝一夕可成，最重要係，如果還留在果一個做了七年而且有點柒的公司，就直至死的時候都不可能實現(一直在那間塑膠公司工作就只有做死一條出路)，所以，第一步係，辭左果一份膠工！

(待續)

書枱

2010-04-07T18:00:00.000+08:00

書枱是很重要的，至少對我來說。

自從那年搬離大間頗大的單位，搬到大圍後，便一直沒有一張讓我可以「做到野」既枱。

細個果時，屋企好細，冇屬於自己既一張枱，一個屬於自己既領域，很想擁有，那怕只不過係一張2呎半乘2呎半既電腦枱，果時仲要用CRT，基本上紙都放唔到一張。

後來搬左一間大D既屋，終於有自己一間房，真係好開心，間房仲唔細既，可以擺一個衣櫃，一個大書架，一個大雜物架，一張床，一張電腦枱，仲有一張大書枱，房其實唔算好大，但真係都幾實用，晌香港一般既家庭來說，我其實已經過份地分配左太多地方(嘿，鬼叫你班人炒貴晒D樓仲要容忍班地產吸血商人起D鬼死咁唔實用既樓呀？)

果陣時，真係可以專心坐晌度做野架，BLOG都寫多幾篇呀！

後來，又要搬屋，搬到一個間得豆膶咁細既房，除左方一張床同埋個衣櫃之外就乜都放唔到，然後我到IKEA買左一張枱仔，只係放到NOTEBOOK之外，紙都放唔到一張了~~(有人話，間房放到床加個衣櫃已經好好...嗯，我只可以話，又係有班人以高價買籠屋既後果囉，籠屋都賣到咁好賺既價，我係建築商人，我都起間籠屋俾你班貴族住啦，係咪？)

幸好，住左一年半，又搬過，搬到一間間房大返D既房，不過雖然間房大返，但係今次無論點擺，都擺唔返可以放到一張大書枱既設計。

張書枱，唔夠我做野。

我搬入來一年多，已經改過枱面上既擺位好多次，今次再徹底D，先騰空隔離書架既位置，然後將D唔應該放書架既野都放埋落個書架度，以便我張枱可以有位寫字做野用繪圖板。希望今次可以做返書枱應有既效果啦，同埋，張椅係唔多舒服囉，又冇錢換喎，虎BI同咇咇又唔夾錢喎，佢地都有份坐架嘛..........

假期，用左好多時間做呢D咁既嘢。希望之後可以專心執行個計劃啦。

Blackbird Fly

2010-03-31T03:01:00.001+08:00

我喜歡攝影沒錯。
也不是近年時興數碼單鏡反光機才發生的事。
不過，我攝影技術唔算好。數碼相機出現前，所有有關攝影的事，我一概不知。
但不代表我唔會影，細個果時我係會搶住左阿娘部機來勁影的，事實上係有d浪費菲林。

數碼化是一件好偉大既事，而數碼化之後仲普及化就更加偉大了。因為，我呢種成日扮麻麻地有錢但其實好鬼窮既人。晌若干年前就可以自己擁有一部相機，仲唔駛買菲林，而且唔駛晒相，因為有d相如果影得衰，我會凝住影相舖既人會取笑甚至恥笑我。咁樣，我多左好多機會去學點樣影得好些少。

用過數碼相機，累積左少少攝影知識，就唔怕浪費菲林了。

最近除左攞返阿爸同阿媽既已故好友既相機出來檢查攞去清潔諗住攞出來影下之外，仲有幾部相機相買來玩下。其中一部係blackbird fly。

http://blackbirdflycamera.com/

呢部嘢我都唔效果上同其他lomo有咩分別，但係佢可以影24x24mm/36x36mm，睇見兩組數字都知係正嘢~~嘿~~正方型相既構圖好好玩的，好想試~~

嗱，有時用下呢d機，我先可以話俾人聽其實我好藝術既，咪以為我冇藝術家脾氣就以為我普通料！

同埋唔好問我呢部機咩野spec，sharp 唔 sharp，你問我部機型唔型我反而會答得好快！

影到咁sharp想割喉咩？

決戰！馬拉松2010！結局篇！

2010-03-28T04:09:00.000+08:00

承上篇，今年跑之前冇打XBOX，但係想早瞓都瞓唔著，真一件折墮的事。然後懶係浪漫感性咁趁自己生日零晨放左套情書出來睇，睇完勉強地瞓30分鐘，就去左沖涼同食超早餐！唔係超值早晨全餐。跟住落地鐵站會合小安迪出發到尖沙咀去！

跑半馬晌尖沙咀為起點，而且冇跑十公里咁多人，地鐵唔太迫，好容易就去到目的地，仲係咁多年來最得閒，可以影相添！

強烈聲明：我對跑鞋係橙色，你最多可以話係橙紅色，但絕對唔係紅色。

我唔想有日被打人打斷雙腿！

是日攝氏24度，相對濕度93%，好可怕！

半馬路線由尖沙咀開始，由西九龍走廊跑到荔景咁上下，然後回頭，向西隧一直逃跑，過了西隧後，經中上環金鐘灣仔銅鑼灣跑到維園完成這個長跑，我睇新聞有人仲有情人終成眷屬，實在可口可樂，好得幾耐。

呢條路線我當年跑10公里時跑過西隧同埋過海之後果段，改路線後都冇再跑過，今年可以再戰西隧真係好鬼興奮！

10公里多人跑唔出奇，原來半馬都比我想像的多，仲遇到一D多年冇見既舊同學，例如志偉，同埋本網誌名人小勤勤。小勤勤仲係跑挑戰組，比我早半小時出發果組，我跑左3-4km果時見到佢，當時佢已經過左10km果個位，咁佢都跑得好鬼快，我冇叫佢或揮手，費時阻住佢啦，同埋我之前都有提過，佢大個仔喇，唔再放我在眼內，一陣佢唔應我，咪好自討沒趣？唔制~~我知道有跑半馬的仲有中學同學咸濕律師，同埋消防隊目傑王，當然仲有幸福寶寶小安迪。

是日天氣好熱，是的，一般來說24度我已經覺得好熱！而且仲要跑21公里，我一開始已經比平練跑時再跑慢一點，即係留力，事關成條路我唔係好清楚D高低起伏，如果後段不慎老抽，咁就唔係咁好了，雖然抽筋我細個時日日都抽，抽到當係正常大小二便既事情，但一來太耐冇做運動做到超出肌肉上限，二來是日本人牛一，我想減低見報風險，一個唔小心仲上埋A1「青年生日參加半馬，練習不足不支命危」，你話幾咁大吉利是呢！

我慢慢來，跑到某些地方甚至只係行路，例如供水站，因為果d地方好多垃圾(紙杯)晌地下，仲成地水，一個唔小心仆街點算，留住蚊飯跑步一D都唔有型，我唔做呢D事！又例如上斜，留力吖嘛！又例如塞人既地方，的確，我見到好多地方會有大量既人突然係行路唔跑，咁...我呢D隨波逐流既人，見大家都行，咪又陪大家行囉！就係咁，我本來目標係2小時20分內完成，點知2小時50分先完成。我留力留到終點，跑完比練習吐路港來回果兩次更舒服！

而我既目標時間，都俾據稱完全冇練過既消防員同埋只係跟我練過弓一次既小安迪完成左，咸濕律師有努力練過又夠咸濕，亦都在我個目標時間內完成了。

跑完後被新女友迎接過的幸福小寶寶小安迪就打給我會合，然後，就回九龍了。

是次成綪太不滿意了，明年要認真了，怎會真係參加賽事時比練習時還要hea，這是什麼道理？

生日快樂

2010-03-09T01:50:00.000+08:00

今年的生日感覺上，比較跟往年不同。

今年生日，碰巧元宵。

今年生日，也碰巧是一年一度渣打馬拉松的日子，碰巧我第一年跑半馬。

好像很特別的說......

我多謝朋友在26號晚搞了一K會，但朋友說只是想唱K。無論如何，也是感激的。

我還暗地裡替小外甥吹蠟燭，因為佢生日日子早我兩天。問你怕未，嘿~~

也多謝收到了生日禮物！

話說回來，生日禮物在我的人生內有一個特別的現象。多謝。

很多年前，有人問我計劃在幾多歲的時候結婚，我想了一會答道三十三。如果真的要按這個答案來計劃，餘下的時間只剩很少。我其實當年不是隨口o翕的，不過人生不會跟著我的藍圖走也是正常不過的事，尤其像我這一種男人。

28日零晨，我本想早一點睡，以免清晨跑半馬時精神不夠，結果我不知是不是太早瞓還是有點緊張不能入睡，然後開了一套戲來看。心裡想看「生日快樂」，但我冇這隻碟，結果看了一遍「情書」。「生日快樂」我很喜歡看，有超無奈的感覺。每看一次，都有些體會。

「情書」我買了數年，一直沒拆來看，故事早就知道了，看的時候還是精彩，結果看完「情書」睡了半小時便洗澡換衫落街食個超早食餐，便去跑半馬。

半馬會有專題報導！

完成半馬，再食左個早餐，又回家睡覺。

下晝二公子找我落老深食維記(又食！)我順道去黃金買過個router以解決上網斷線問題，然後出MK替手錶換電，手錶在我生日前的晚上用光了電池，讓我有少少唔安樂，事關手錶對我來說有些說不出來的關係，不戴在身上會很不安，當然停了也不好，所以拿拿臨攞去換電了，其實我很想買過隻來換左佢，不過，呢些年來真係好窮就是了。

還不只，事後看到一塊上兩代的網球拍，意思即是價錢很相宜，而且重量好像很適合，很輕，見自己生日，買了下來，以後，我可以用天下間最重和最輕的球拍來打，嘿~~

基本上，晌咁莫財的生活下，已經算洗了很多錢！

不過，多年來我也這樣說，如果用錢可以買到開心，那已經是值的了。

今年特別多人跟我說生日快樂，可能知道我有這樣的需要吧！多謝各位有祝賀過我的朋友們。

我也祝大家快樂！

關山月美術館

2010-03-01T17:46:00.000+08:00

話說，授畫老師話我知，深圳有個畫展，展出既畫好鬼大幅，平時佢叫我去睇既畫展我唔會咁有intension去睇，不過基本上咁大幅畫唔係去歐洲D藝術館係好少睇得到，咁我就有D興趣。而且個畫展晌深圳度只係展到上個星期日，咁我上星期四，就請左日假到深圳去行行。

我之前唔知有間咁既美術館，原來外形仲幾型幾和風既，真係失覺晒！

內地畫家功底都好扎實，好有參考價值。展出既畫都好大幅，最細果d都至少十呎八呎走唔甩，香港畫唔到呢d畫，主要係無咁既地方，同埋香港人，邊有咁多時間畫畫，要搵食架嘛，明唔明我講咩，我即係話畫畫搵唔到食囉。

呢個畫展，主要係題材唔係好啱睇，主題係中國重大歷史事件，畫既畫唔係打仗呀，打日本人打洋鬼子，就係d大粒佬開會呀之類...有d畫到個天仲係鮮紅色既，嘩，鬧鬼咩！

過濾左d內容，只係睇場面構圖既處理，都係相當有價值既。

斷線朋友

2010-02-24T15:22:00.000+08:00

近兩日突然大量湧現潛伏了很久沒有出現的朋友。

昨日朝早淫詹就打電話來，主要係問上網斷線的問題。然後吹了一陣水。短期內應該要搵佢食下飯。因為佢講野好好笑。

早兩日傑王又msn我，又係討論上網斷線問題，問我換邊款router好。

之後冇幾耐TC舊同學翹哥又msn我，佢應該知道我最近又係成日斷線，然後介紹我去dd-dwt度搵果d firmware，話稳定同埋勁好多。多謝介紹。

昨日臨近收工，有一個舊同事又打來，佢生意上有d意見問我，又係同IT有關，不過好彩唔係上網斷線問題。照舊又問我做乜唔做返IT工，唉，我照舊話，IT有乜好做喎~~不過佢今次提議既野我都有D覺得可行，但係太大型，要D時間和比較多資源，但仍可以諗下。

點解咁多人同我講D IT 嘢？其實我對呢個LEVEL既問題冇興趣...但幫人係OK的。

講開上網斷線問題，近來好多人有同樣情況咁，其實係咪有咩事發生左呢？
去SSP睇過D ROUTER，唔知點解LINKSYS好似得返幾檔賣，突然變得好唔主流咁，闔街都賣TP-LINK, D-LINK，D-LINK還好，TP-LINK真係唔好用囉，不過中國牌子好似好多人買好勁咁。

嗯，本來都決定換一換隻ROUTER，不過都係試埋翹哥講果度D FIRMWARE先。

團年

2010-02-12T11:46:00.000+08:00

年尾了。

早兩星期已經跟一眾舊同事和好友們在我家打邊爐來團年。
然後公司也吃了團年飯。
一星期前跟家人吃了團年飯。
昨日和二公子找龍哥出來飲茶團了年。
昨夜跟師父和師兄弟姊妹們團年。

今年由不算太好至現在生活仍很貧窮但算開心，來年希望會更好。
龍哥的爸爸當年說我這兩年開始做些搞作會成功，我今年就開始搞吧！
停了一年多沒有到師父處練功，拳頭恐防有些生鏽，來年將會把拳頭解封了，嘿嘿！

虎年來了，虎bi坐大！

iPad

2010-02-03T21:44:00.001+08:00

比恥笑iPad係衛生巾更具恥笑能力的圖

好嘢！

好多人以為我係APPLE FANS，因為我由iPod Mini開始，就很喜歡用iPod，繼而出了iPod Nano，然後係iTouch，以上都係每個系列的第一代。其實每一次讓我覺得有購買的衝動都是因為她的嬌小玲瓏，好老實講，初代iPod我真係冇興趣，click wheel我唔覺得好好玩，一部容量好似當年一隻standard HDD容量既MP3機我又唔需要，而果部初代iPod又好巨下。講到尾，我係好膚淺，我係睇外表。

當年呢一類所謂gadget叫科技產品，仲未叫潮物，所謂科技產品係被一眾崇尚高科技既所謂高科技人仕所潮拜，而呢一類所謂高科技人仕都有一個共通點，係specification oriented，即係買乜都睇spec，睇下件嘢用咩cpu，有幾快有幾勁，有咩function，越大越快越多越好，即使果d嘢其實對佢(或你)來講冇乜用。呢個世界就係咁，被需求既總係比真正需要的多，還要多很多。

相比起來，依家叫我買呢類gadget即係手提電話，隨身聽，netbook，pmp，相機就弊加火喇，冇寫錯，係弊加火，因為問我果個真係可能會火火地，因為有關佢地問我果樣嘢我通常都唔知，重點係佢地理所當然地以為我知。好彩踏入21世紀，上網真係方便左好多而咁好彩我其實係google.com既fans先係真，上網搵嘢尚算快，好多資料一search即有，讓我不致於露出馬腳。我自己買嘢，講真的，先睇外表，再試下好唔好用，即係所謂就唔就手，大家都唔係好信IT從業員居然從來唔用數據來support自己，係喎，所以咪轉行囉！

就係囉，所以我買APPLE產品都係因為佢外表順眼囉，其他嘢真係唔突出。以隨身聽來講，音質好一般，尤其配合係佢個爛鬼headphone。論功能，佢連收音機同錄音功能都欠奉，當年真係俾人踏到乜咁。講起收音機，原來我預科之後已經再冇聽電台既習慣，因為怕嘈，怕人晌我耳仔邊講d唔好笑但係講者笑得好大聲又好難聽即冷笑話。又唔知點解，近年DJ好跨媒體，暴光率極高，剛好果班從業員又好討我厭，實在很難得。

我唔係APPLE FANS但係STEVE JOBS真係讓我很佩服。
他當年重返APPLE後當即令APPLE起死回生，從marketing來看，他十分成功，除了iMac改變了人們對個人電腦的形象，app store也改變了消費模式及用家的行為。以一個生意人來說，經營手法很厲害，厲害在於，好有宗教味！而且仲係邪教feel~~做生意，咪就係要學呢d囉！唔係點發達呀！

用Apple既人好似入左教咁一d都冇講錯架喎，講緊仲係十幾年前，當年用Apple d人先厲害，直情當用PC既人係異教徒咁滯。當年我仲讀緊中學，scanner係一部好貴唔係咁普及既device，教我畫畫既老師用mac來做稿，有scanner，我問佢借，而當時佢部機係俾緊一位姐姐仔用緊，咁我想scan d嘢，咪請佢幫我scan然後儲落隻floppy俾我，佢一邊好厭煩地做一邊話個file用pc開唔到，好唔想幫我咁，語氣相當不屑！雖然當年mac同pc係完全不相容，但係JPG FILE就係兩邊都可以開到啦，真係仆佢個臭街，自己唔識就算啦，你迷信你既事啦，我尊重你既宗教你都要尊敬我用PC架嘛，咁PC係平D吖嘛，而且我無宗教信仰架嘛，其實都唔緊要，最重要係佢囂屎過我，以我當年年少時代既囂張程度，佢居然可以串過我實在為我所不容！

依家諗起都仲係好激心！而我都真係好記仇！

亂腦物

2010-01-26T02:14:00.000+08:00

- 前數晚某個入睡了的晚上，發惡夢，很少有。醒來心仍跳得很急，我很少這麼心急。

- 上星期六原來是1月23日，難怪上星期開始整個人都在忐忑狀態。

- 而且還發惡夢。

- 罪疚感是很可怖的，最可怖的是自己也懷疑自己有錯。令我想起jojo第四部其中一個替身使者的替身能力，讓別人產生罪疚感而出現一把鎖在身上，罪疚感越大，鎖越重。

- 還好我是真的問心無愧。

- 但我成日唱陳奕信既於心有愧...

- 星期六在畫室樓下碰見舊同事，星期日在又一城碰見暑期工的大哥，在城大又碰見另一位舊同事，今日碰到一舊同學...一連碰見那麼多舊朋友，是很邪門的事。

- 教阿娘用電腦，用windows explorer...解釋folder既structure，既然用族譜來會比喻，root係祖宗......教學能力又再進化。

- 思維方式還是不夠狂，門還是要再開大一些...不，要拆左度門...不對...跟本就冇門...

- 原來塊森栢斯重320g，依家出面賣緊果d 290g已經算重，原來我係用玄鐵重劍的。

- 睇完成套網球王子，他誇張我沒有怪他，節奏快我其實嫌太快，但總好過那些一場波踢幾年的漫畫，人物性格描寫不太深但還過得去，故事很熱血挺有感情就是了，畢竟近年令我有意欲連續看下去的漫畫是很少的。

- 星期六外甥仔來了畫室，他被我抱住然後同佢阿爸阿媽揮手說再見，諗起就想笑。

- 廖老師其實太喜歡她的外孩，抱住他跟佢班學生或家長打招呼，很有炫耀的感覺。

好了，清左d亂雜既腦廢物了！

雙魚男

2010-01-21T12:57:00.000+08:00

在網絡上無意中看到的，嗯...說得雙魚座的男人有點可怕！但又好似講到似層層~~

他是十二個座中最復雜、最模糊不清、最浪漫的男人。
　　他是一個來自天堂裏的夢想家，帶著詩一樣的靈魂。他一雙撲爍迷離、水一樣的眼睛，帶著男人少有的浪漫的期待和神秘的渴望。他不是生活在乏味、冷酷的現實中的人，只要有機會，他就會飄蕩在雲霧般的幻想的天堂。
　　他富有博愛的慈懷和寬容的精神，他有海洋一樣寬闊、跌起不定的感情。他有著善良的心腸，他對落泊失意者充滿了慈悲情懷。他看起來迷糊不清、沒頭沒腦、沒有邏輯、沒有目的。但是，他卻有超人的敏感和神秘的第六感覺作導航，富於幻想的創造天才。
　　他看穿了人生的悲歡和終極目的，他看起來一副無助、柔弱、任人宰割的模樣，但是他狡猾、詭秘。正是他的軟弱的逃跑主義，人們忽略了他的能力，這也成了他勝利的秘密武器。這個狡猾的魚兒實踐經驗多，他不鬥爭、不努力，但是什麽幸運的好事都沒有少了他，好像上天寵幸他無助於事的溫柔的天性，他總是在上天的配合下麻醉了別人，不知不覺地、隨波逐流地安排一切。
　　他沒有堅強的意誌和忍耐、承受力，也沒有強烈的功利主義，他用玫瑰色鏡看待生活，他通過藝術、幻想的世界裏尋找自己的天地，有時，為了超越冷酷的現實，他尋求夢境中燦爛的光彩，沈湎於煙酒、女人也能夠讓他到達夢想的世界。他的內在世界總是敏感、多情，無論感情還是行為，他都變幻無常，就象一個隨著光線變化、色彩斑斕的變色龍。他的天才來自他的感覺，他根本不願意用理智去分析，只要感覺不愉快，他就會立刻逃跑。
　　他的性格如同他的符合――兩個遊向不同方向的魚，它可能會升華到高尚的境界自我犧牲，也可能會沈到海底去自我墮落。一方面，他隨波逐流，他不願意面對冷酷的現實，他很難逆水而遊，在困難的處境之下，他是一個臭名昭著的逃跑主義。另一方面，他沒有強烈的功利主義，似乎他不容易在殘酷的政治領域和商界中成功。但是，一旦他走入商界和政界，他有讓人出乎意料的生存和取勝的能力。這些卻是來自他於生具來的“大智若愚”的佛性。他很少自私自利、自我為中心，他有寬闊、博大、仁慈的人生智慧，他用心靈感應和靈敏的直覺準確地把握方向，引導他在激勵的競爭世界不戰而勝，走向極端傑出，那時候，他是浮出水面的魚。
　　他不完全誠實，他總是捕索迷離地讓你琢磨不透，仿佛他是刻意欺騙你。但是，連他自己也不明白自己，他到底要什麽，他想幹什麽，他的出發點是什麽，他也不了解自己，因為他的大量時間用來使他自己更迷惑。他是現實生活中一個脆弱的“糊塗蟲”，他不但容易被迷惑和欺騙，他還善於自欺欺人，他最拿手的是迷糊他人的催眠本領。
　　他沒有強大的自我，他博愛、溫順、寬松、善良，他有不可思議的結識新朋友的本領。他沒有強悍男人的支配欲望，更沒有不可改悔的大男人作風，他對人一視同仁，他不計較小節，他還能夠放棄自我，改變自己去符合別人的需要。
　　他狡猾、詭秘，沒有清晰的處事原則，缺乏辨別力，又不受現實和道德的約束和規範，他常常不能堅持立場原則，經不起誘惑而變化無常。他是個隨風而倒的“墻頭草”和變幻不定的變色龍，再加上他迷迷糊糊的個性，這讓他成為十二個星座中不可靠、最難以把握的人。當你得到這個“狡猾的雙魚”，你就明白自己“花了一分錢，得到了兩條魚。”

每個人的都會有正負兩面性，平時我們經常看到的那一面只是因為它占據了主導地位而已，但是在不同的場合和環境下，另一面也偶爾會爆發．
幸運的是：沒被別人逼到走投無路時，魚基本上都是正面的魚．
有人說最沒用的男人，就是雙魚男，一評價到他們，就是什麽浪漫，溫柔，軟弱啊，之類的，講的都是其中一條魚拉，怎麽忘記雙魚是有兩條的呢？
如果說最霸道的星座是獅子，哪，見過鯊魚嗎？或者殺人鯨，如果有見識過雙魚男真正發起脾氣的朋友，應該知道我講的是什麽意思了吧！到時候獅子都要變小貓．
平時雙魚是不發脾氣的，因為會顧及別人感受，通常都將氣都壓在心中，如果哪麽一次爆發讓你遇到了，我只能說可惜啊.
如果說雙子是最聰明的話？哪，雙魚男到哪裏去好呢？只不過有時候雙魚男的聰明都用來講笑話，或者無聊的想一些不知道如何說起的東西．或者就僅僅是因為不想讓人知道而已，魚男一向不會讓別人了解得太深，如果他主動讓你去了解他了，就說明他非常的重視你．不過，如果說聰明如果是有層次的話，雙魚男的智慧最有可能接近神，唯一能看見宇宙的．
吸引力？不好意思，這裏要講的外表只能說和天平男，射手男打平而已，不過，水系的最後武器是什麽，沒錯，一雙眼，巨蟹有電眼，天蠍有可怕的眼，而雙魚男呢？一般外邊都說什麽迷惑啊，糊塗啊，之類的呆呆的目光！其實，那才是最恐怖，因為你不知道它在看什麽，可能是你的外表，可能是你的內心！不過，雙魚天生的吸引力可能就是哪條天使一樣的好魚，不過本文主要談哪條惡魔魚！狠毒！沒錯，別以為那是天蠍的專利，其實，當雙魚男真的壞起來的時候，哪種狠毒真的很可怕，殺人暴力傾向第一名不是亂給的，天蠍也只能做第二！我深有體會，因為還是哪句，別以為雙魚男平時好像好欺負，其實，是他不和你計較，如果逼瘋了，那是絕對的不計後果的，哪時候你不會看到他的軟弱，不會看到他的猶豫，我也發現了我這種暴力傾向的基因了，我有時候也有點怕自己．
當然，心計來說，絕對和天蠍是同一層次的，可能還要深藏！因為雙魚的內心活動更多.玩陰的不要找天蠍，更加不要找雙魚，除非他不和你玩，他和你玩，你絕對鬥不過他！
而且雙魚男的報復心其實很強的，（恩怨分明）還是哪句，如果你真的讓他覺得一定要報復你，哪，我只能說，你將要受到最可怕的報復.
其實雙魚男最可怕的是你所無法猜透的本質，很多人喜歡研究他們，卻無法真正了解，因為，本來雙魚就非常神秘的，加上隱藏著的那條魚到底是條什麽的魚呢？（１１個星座）你慢慢猜，，，，
其實，我發現沒多少人關心和研究過雙魚男，很多都是一筆帶過的評價，反而老是說什麽獅子啊，天蠍，魔竭男如何如何啊，我所講的，可能很多人覺得在亂吹，不過如果是和雙魚男打過交道的人，應該會同意我所講的，當然如果見過第二條魚的，就不用說了......
他完美，卻無法擺脫自己的心魔……
他理智，卻無法控制自己的感情……
他執著，卻無法停止內心的煎熬……
他聰慧，卻不愿濫用自己的天賦……
他重情，卻很少計較自己的得失……

- 只要感覺不愉快，他就會立刻逃跑 - 的而且確，我一感覺唔開心，即係覺得原來自己晌度係咁一文不值，覺得被傷害，覺得唔應該再晌度獻世，咁咪走囉...

- 他看起來一副無助、柔弱、任人宰割的模樣 - 噢...一副可憐的死相~~我睇起來又係幾好蝦架喎~~

- 他不但容易被迷惑和欺騙，他還善於自欺欺人，他最拿手的是迷糊他人的催眠本領。係喎，要呃人先要呃自己~我係自欺欺人吖...如果唔係生活得好辛苦.....

- 平時雙魚是不發脾氣的，因為會顧及別人感受，通常都將氣都壓在心中，如果哪麽一次爆發讓你遇到了，我只能說可惜啊....嗯~~百年一遇仲罕有過金融海潚，咁都見到係好彩...咩嘢可惜呀~~我係好多年無發過人脾氣，最多係發自己脾氣，依家我都唔知如果我發脾氣會有幾屍橫遍野...

- 雙魚男的聰明都用來講笑話，或者無聊的想一些不知道如何說起的東西．..其實我講嘢唔係太好笑...

- 或者就僅僅是因為不想讓人知道而已，魚男一向不會讓別人了解得太深，如果他主動讓你去了解他了，就說明他非常的重視你．...原來係我不讓人了解，等我仲覺得冇人了解我，SHIT~

- 不過，如果說聰明如果是有層次的話，雙魚男的智慧最有可能接近神，唯一能看見宇宙的．嘩~~~世事都被我看透了！

- 其實，當雙魚男真的壞起來的時候，哪種狠毒真的很可怕，殺人暴力傾向第一名不是亂給的，天蠍也只能做第二！...係，我係有打過讀托兒所同學既紀錄，仲見家長，即係我老豆，不過晌我屋企呢件事似係光輝既戰績多過係人生污點，係囉，如果打輸先至係污點吖！幹架這回事，我係好狼死的，但係我大個左之後都冇乜出過手啦！同埋中學時跟師傅學藝之後都打得斯文左啦。唉...都冇人撩交打...無理由隨便打人啫...咁唔啱架嘛....

零九總結‧昨年大小事回顧之生活篇

2010-01-12T12:37:00.001+08:00

零九年頭阿娘親決定再搬屋，由新界搬番出九龍，凡事有辣就有唔辣，住九龍真係好鬼方便，但係就冇得再晌屋企門口燒嘢食同埋畫畫了，虎bi就冇得偷走出屋外面跑來跑去因而令到佢缺少運動更加肥。而且要拎多左錢返屋企俾阿娘供樓，本來好似我呢一d頂天立地既男子漢覺得好應該，不過撞啱我事業處於谷低就倍覺辛苦。無論如何，生活模式一定要改變，例如唔需要再在別人面前扮窮，真係窮唔駛扮成個人即刻實在晒真實左立體左，由於真係窮，好多玩意都會減少，例如高消費運動wakeboard，好彩仲可以打下網球呢一種七十年代時既運動；晌呢度真係好想quote一段歌詞：

基本上我只是一個隱蔽的青年

如果你決定要和我發展

我們也許不會經常見

如果見　我也只會帶你流浪到海邊

然之後告訴你我的一個重點

我的重點是我沒有錢

所以先至帶你到海邊

嗯~~係咪好浪漫呢 XXXXDDDDD

總體生活上，就正如句歌詞咁講：我的重點是我沒有錢。......簡而清！

年中時，阿娘突然話想收養多一隻貓仔來陪下虎bi，所以頑皮既小貓咇咇就登場了！
咇咇暫時仲係好細個，好嗲人，所以我好多時候攬住抱住咇咇，佢都由得我，虎bi就大部份時間都推開我，真係令人好心淡！呢年都係好多時候想兩隻貓搵人傾計都係同兩隻貓女傾下計咁，其實都唔算傾計，因為虎bi真係唔出聲應我，而咇咇就只係識尖叫，可能係嫌我太煩人！

年頭小外甥來到呢個世上，小外甥最犀利既地方就係鍾意笑，絕不鞋口鞋面，希望佢大個左之後都仲係咁鍾意笑，同埋講得笑，有多d幽默感，講多d冷笑話都唔緊要，講野無聊d都唔緊要......不過我驚佢咁樣會俾佢老豆鬧......
見到家中有小成員，尤其呢d後左一輩既細路，都好想教晒自己識既所有野俾佢，雖然我只不過係佢大舅父而唔係佢老豆，不過都突然明白到人類社會既真義，亦即係火鳳既孫策成日講既繁衍的意義！
可能，每個男人都潛藏著要找一個承繼人既心理。

自從年多前要再搵下工之時，晌好多求職網站登記過，佢日間中(即係每天)都係send一些為你增值既課程俾你叫你去upgrade下，就係咁，機緣巧合再配合各因素理由和原因之下，我都報讀左一個學位，好多人都話讀我果科只係讀個學士學位冇乜用，都係搵唔到工既，我都知，其實我仲知讀書其實事實上係冇Q用添，其實打份牛工都係冇Q用咯(好似得罪左好多人咁)，事實上，請你返來做野果個人，出糧俾你果個人，可能唔會比你有用幾多(嘿嘿~~已經得罪晒全世界了~~)。嗯，我意思係，做人，眼光放遠些，讀書，唔好只係為左搵到份工，重點亦唔係為左搵份工，呢個世界好多野做，亦唔係個個人需要打工或適合打工，如果個個都只係打份工，咁邊個出錢請你做牛做馬做生做死揼石仔呀？而識多D野，主要係為左識多D野，識到既野，點樣幫你對人對事解決問題改善生活先至係王道。不過，王道還王道，如果你都係認為讀書係為左有份不俗既工作亦無可厚非，皆因請你做野果個都係覺得有張沙紙簡單D，當然啦，佢都冇時間睇你咁多野，梗係睇D最表面最膚淺既野先！唔知點解無啦啦講呢D，主要我想講，我讀書只不過係因為我想讀，覺得讀左會有用，但係無諗過因為讀左呢個學位而對搵工有咩幫助，就係咁！

無錯，昨年生活既改變呀各樣呀，就係咁多！
本來想寫下自己既感情呢方面，但係呢方面我一向唔會講，有人問都要睇下係邊個問先至答，答幾多成又係要睇咩人，雖然呢度冇人睇，但係都唔好晌度講呢個topic。

昨年既回顧就係咁多。

下回再見。

零九總結‧昨年大小事回顧之工作篇

2010-01-06T23:02:00.000+08:00

檢討完舊年訂左既計謀做唔做到之後，即係講左一輪廢話之後，我又想回顧一下各大小發生過既事。

講左最大改變既工作先。

年頭，上一份工作還在試用期中，是一份奇怪的工，簡單的工作內容，理應輕鬆渡過，但工作生活很不快樂，那段時期是在這些年來最瘦的，因為完全冇胃口。試用期那位所謂阿頭話勉強俾我過，我實在冇諗過我係咁既水平，自信心插水度同當日匯豐插到落三十蚊有異曲同工之妙，最衰我既自信心就冇得好似匯豐咁叫人供股吸水。

當時每日既生活就係準時返工，完成d日常檢查工作，然後好希望有同事打電話來叫我出去幫手，讓我唔駛留晌IT房度。食飯自己去食，但係其實冇乜食野，有段時間係買個麵包去球場食，有時間餘會去機舖睇人打機，做咁耐野從來冇試過覺得冇錢食飯都唔夠冇心情食飯咁辛苦。

當我發覺佢對我咁唔滿意但其實我做到140%都fulfil唔到佢之後，我都已經開始一邊搵過另一份工，一邊慢慢地迫自己練成金鐘罩第十二層諗住未搵到工都唔會俾人打傷，可以再生活多一年半載再謀打算，我那位幫我練金鐘罩的上級已經捱唔住，叫我俾辭職信佢，聽到呢一個喜訊的時候，我差在還沒有高聲叫好yeah出來！

我做的兩間公司都有一個很不知道係好定唔好既共通情況，就係辭職係兩個月通知。辭職後的那兩個月，其實，真係輕鬆不少，仲可以食返中午飯。而晌好早的時候，我已經多方面搭路去搵其他工，分別有二公子做果間公司，一位師兄在敵視妮話將會有一個IT的空缺，我細佬有個老師請人做空氣污染研究，等等......而最後最快有消息的係二公子，雖然佢公司出手太低，令我人工驟跌一半，但我貪份工唔太忙，有新野學，切合我很想轉行既願望，而且有足夠既自由度，即係冇人理我，啱晒我呢一類唔管得又相當唔話得既青年才俊。就係咁，我就轉左入一間同IT完全無關既公司工作了！

晌呢度，老實地說，是沒有什麼大發展的，人工低，沒機會，但勝在多時間做其他野，同事相處融洽，可以勁講無聊野，呢d都係多年來做唔到的，係囉，都唔知點解以前d同事大部份都懶係正經咁囉。我諗，呢個工作環境，對將來會發生既事的可能性係大好多，呢個係我一直感覺到既。

唔計那一些心目中有初步構想但未有實際計劃既事，工作方面就是這樣的。

零九總結‧昨年計劃檢討篇

2010-01-04T17:34:00.000+08:00

往年的年結都在12月尾寫的，今年破例1月才寫，只因為我是懶到極。

首先睇下舊年訂下既野做唔做得到先：

請參閱「二零零九‧計劃始動」

1. 可以安排到時間做適量運動，呢樣昨年情況已有好大改善，今年要KEEP住之餘，再令自己健康D！

- 嗯....2009我繼續keep到做適量運動，有跑步，行山，打網球，雖然我冇去師傅度，但係我都有練下的，你知啦，好多年前都開始講，仆街真係通街都係，唔keep好d身手，想揼x佢地時d手法唔夠華麗咁點算呀！年尾時報左渣打馬拉松既半馬項目，為左唔好大出洋相，跑步認真加操，依家跑10k8k已經係基本了，尋晚仲試跑來回沙田大埔，全程21km，完成左但好攰囉！

2. 保持充足休息，自從轉左新工後，因為要返好早而我又決心改左遲返工呢個習慣，所以我早左些少訓同埋KEEP到早起身，呢個會KEEP住，另外，原來我一直睡眠質素好差，因為有人話我知原來有發夢就即係個腦冇休息，咁我好似晚晚都有發夢，咁就即係好差喎，我唔知點樣可以令自己唔發夢，不過，「訓得好」都當住係今年其中一個目標先啦。

- 「訓得好」嘛，都訓得幾好架！今年希望可以再早少少起身啦！

3. 節流，由於我一直以來實在太大洗，冇辦法啦，骨子裏始終都係偽富家子，對錢既概念好薄弱...不過今時唔同往日，屋企環境有改變，而昨年既環境亦令自己意識到唔可以咁樣，所以今年洗錢既態度會有改變，真係要慳D洗囉，不過唔代表我再扮唔到富家子，我要我洗既每一分每一毫都要有相當既價值甚至超出本身價值，唔可以洗左錢但人地仲以為我CHEAP。

- 嘿！都冇錢洗，想唔節流都唔得啦！

4. 開源，淨係節流係唔可以既，我仲應該諗多D方法去擴大收係來源，依家除左正職仲有教畫，教畫果度應該仲可以搵多D錢，另外之前構思既野可以具體做D野，呢一方面只要正職穩定下來，唔會再惹太多麻煩咁就可以開始了。

- 暫時教畫呢一方面係正面發展中，平日夜晚開多左一班，又真係收多左少少學生，我會繼續俾心機教，教出一批又打得又睇得既學生做生招牌！

5. 早日有幸同淫詹飲茶，講起話我既願望都係同好多男人一樣要媾盡個世界D女，點知佢一句就鬧我：「好心你咪扮野啦！其實你心裡面都係追求一份真摰既愛情，唔好晌我面前扮浪子啦！」淫詹一句踼爆實在過份，我話佢佢咁話我，真係好悲囉，佢話係好慘架，扮壞人扮唔到俾人話其實真係仲慘過做壞事俾人指責喎...

- 根據一直以來既觀察，做壞人很明顯是有絕對優勢，做壞人做錯事理所當然之餘而佢改過既時候亦被大力地原諒，相反做好人做錯少少已經為人所唾棄，因為做好人做對的事是理所當然就是了！講左咁耐，我咪又係得個講字~~

6. 又係淫詹，佢話睇左幾年燎原誌到今時今日仲會睇到我講D陳年往事，仲要遊走虛幻同現實之間，有時唔係好明，同埋真係睇到火滾喎...我都明既，又真係好悶既，所以今年開始我希望我唔會再寫果陣時既野，而其實我亦真係冇理由要再寫。而我，又諗其實都應該俾多D新元素入黎，我暫時都係諗到，晌度寫情色篇... 即係寫咸故，以回應同埋滿足好似淫詹呢一類忠實長期讀者既訴求。

- 我係少左講陳年往事啦，不過冇寫咸故俾大家睇囉，讓大家失望了！

7. 最後我都希望有野唔駛做，老細又吹我唔脹啦。

- 老細吹我唔脹是做到的，有野唔駛做就做唔到...因為的確少野做到自己都覺得唔好意思。

舊年寫既野就檢討左了，下篇會真係回顧下發生左d咩世界大事了！

毀滅聖誕

2009-12-29T17:22:00.002+08:00

今年聖誕，沒有派對，連朋友見見面都沒有。

做了些毀滅性工作。

有兩幅畫，畫了之後很不喜歡，本來沒甚麼大不了的，但越看越不順眼，不看也不順眼。

多個月前到深圳大芬村時，就順道買了兩罐gesso，現在就趁著這個普天同慶的日子，把這兩張畫毀掉。

之後再在上面畫些新的，多浪漫！

其實幅畫構圖唔錯...不過...畫到後尾自己見到都唔開胃。

毀滅吧！

本應是第一幅畫人像的油畫...畫到後來被老師叫我加條手巾仔(=.=")，後果可想而之......

再見了，核突的女子！

就係咁，聖誕節就過去了！

SPECTRUM

2009-12-22T17:21:00.000+08:00

那一天，到又一城去，到Page One。

看到了Spectrum 的第15。

居然就從書架拿了下來。
(小弟買書有個壞習慣，每次一定唔會買一本，所以拿下了一本之後，開心既事一不離二，二不離三，捧著數本書去付錢。)

Spectrum是一本插畫集，每年出一本，今年其實應該是身第16集，但我沒看過有地方賣。

認識這本畫集，是我還在讀書的時代，學畫畫的畫室有個大家叫他做神童的同學仔，在新一集出了的時候拿著一本，所以有機會看一看這些我從沒接觸過的書種，對，那時候我從來不知道世上有呢一種數百大元但是沒有文字覺得唔係咁抵睇的書本，畢竟那時候我跟其他男仔一樣以為世上只有衛斯理金庸和古龍，還會認為衞斯理真有其人(當然還有外星人也是)，而且質疑郭靖咁打得點解宋朝仲會唔掂當，認定成日咳到吐血既人先至係身懷絕世武功，例如小李飛刀李尋歡，當然大家一致認為無出過場既小李飛刀的娘親小李老母先至係武林至尊。

講到離晒題(咁先似係我寫)，話說我自從睇過呢一本畫集之後，覺得驚為天人，無論如何想買番本返屋企擺下以作扮有品味扮有風格咁話。當然，買第一本時已經係幾年後有份part time的時候既事，事關本畫集其實對一個學生來講(或者只係針對我呢一個窮鬼來講)，係好貴的。儘管本畫集咁貴，當我有左少少臭錢同埋知道本書晌信和地庫間賣美國漫畫既店有得賣之後，每年佢出既時候果一排，我每日都會去信和睇下本書出左未，如果出左又會等一兩個星期睇下佢減左價未...呢一種咁早顧夜盼，到有既時候又睇多一陣先入手既古怪行為，我是認真地想打自己一鑊的。(不過我打人好痛，而我自己又好怕痛...一直冇咁做到)

買呢一本書既習慣，我一直冇改變過，當然，我是挺專一的，直至有一天.......信和地庫果間舖頭，變左，變左賣另外一種野，之後，我再四出尋訪，想搵專賣呢一類書既地方，都搵唔到，Page One係有，但唔見有最新果本...唉，本第15，早數星期都唔見有...果日咁啱見到有咋~~

我曾經上過amazon搵，係有呀，但係運費好貴，覺得唔抵....我仲諗過，不如做代理呢類書，可能仲會因為搞呢一門生意而發達添，唔小心就白手興家，幾好呀。

十二月的十二

2009-12-03T02:00:00.000+08:00

每年一踏入十二月就覺得好唔舒服。

幾時先可以治好呢個病？

想起那年唔返學走堂的事

想起play station

想起健康工房

想起指甲鉗

想起大家樂的白汁雞扒飯

想起那套文具

想起其中的原子筆寫不出

想起她說要拿回去換

想起然後她將她一直用開的原子筆先給了我

想起她說換了之後才再交換

想起那支原子筆現在還插在我書桌上的筆筒

想起那張聖誕卡她留的數行說話

都已經是過去的事了。

繼續跳樓

2009-11-26T18:00:00.003+08:00

來，繼續跳樓。

10. 無味關懷 - 張智霖
他送贈你的愉快，註定我失敗
一邊很傷，一邊還替人高興，很複雜的心情~~

11. 傷心者的眼光 - 張智霖
原來是我平凡全不配屬你，沒有解釋只可分離
唔太好聽的一首歌

12. 天氣的錯 - 鄭伊健

懷念錯期待錯旁白說錯

係囉...乜都錯~~錯晒！

13. 別要我放棄 - 張智霖
有點唏噓，無犯罪我怎麼不可進取
唔明點解會擺落隻碟度，可能個歌名有鼓勵性~

14. 愛情已死 - 張智霖

沉睡到清早總要清醒

以前成日唱住呢首歌，結果好鬼一語成讖。後來仲做電話鈴聲好多年，死都唔換。

15. 無聲仿有聲 - 謝霆鋒

我心痛　但妳聽到嗎
又係唔太跳樓既歌....

16. 誰說我哭 - 張智霖

捱慣了孤獨，多於祝福；誰意料有童話結局，只因太習慣心足，那敢心痛

聽多幾次再捱幾刀都得呀！

17. 多謝關心 - 張智霖

關心都只當憐憫　誰需要憐憫

用來發侮氣既歌，呢種態度唔係咁好。

18. 祝君好 - 張智霖

寧願沒擁抱共你可到老

呢首歌，很偉大的愛，係一首終極跳樓歌...當有一日有人要求你唱俾佢聽時。

成隻碟就係擺左呢18首歌落去，其實我記憶之中仲有一隻王傑系列既跳樓歌...

不過...王傑果D...都唔駛揀既...差唔多首首都係...

除左果一首《我唔講粗口》。

跳樓歌

2009-11-25T22:45:00.000+08:00

早前貼了張智霖既《你太善良》，有朋友回應佢其實最鍾意《祝君好》，讓我想起當年我燒了一隻CD，放左好多張智霖同其他數個唔同歌手既歌入去，然後用marker寫上「跳樓歌」三隻字。

「跳樓歌」好似好故名思義咁，但其實當年我唔知點解會用「跳樓歌」來label隻碟。當年晌一個極度情緒低落接受唔到現實好無所適從既情況下集成呢隻碟，咪以為「跳樓歌」會將天下間最慘情既慘情歌放入去，實情係當時成日聽「十指緊扣」加一系列至冧舊歌所成。

前晚將呢隻封印左既CD搵返出來，翻聽，事實上我又真係唔記得放左D咩野歌入去。

為了呃字數，不如就將成隻CD既TRACK LIST同大家分享下。

1. 怎會如此 - 張智霖
我盡力過郤也鬥不過天意的微妙
道盡接受唔到現實，盡顯不知所措與無奈。

2. 愛如潮水 - 張信哲
你該知道這樣會讓我心碎
唔知點解果陣時會放呢首歌，依家諗返唔覺得可以反映當時心情，可能只不過喜歡聽。

3. 笑中有淚 - 張智霖

為何讓我動情與著呆，彷彿不知所措是應該

都係盡顯不知所措與無奈啦！

4. 愛後餘生 - 謝霆鋒
請不要說改天再會，何不乾脆說下次失陪；讓那張溫暖床單曬乾，路過的地方別再躺
叫自己要放低，但係又唔係咁易吧。

5. 曾經愛過 - 張信哲

妳怎麼能夠一筆帶過，忽略我的感受

唔聽返隻碟唔記得有呢首歌，歌詞寫得幾到...不過太露。

6. 暫停的故事 - 張智霖

到底這段情，究竟算暫停，或算是曾經

當時成日仲抱住一絲希望

7. 非走不可 - 謝霆鋒
踏上分手這條路，才令我突然看到，你的天空宇宙只夠我流淚，不可跳舞
就係囉...非走不可...

8. 寧願沒有愛情 - 張智霖
怕了再去愛別人我竟傷得那麼深
嘩~~幾緊要呀~~

9. 早知 - 謝霆鋒
由從前早早知道這傷感結果
覺得呢首係佢唱俾我聽的~~

由於太長，下篇再續！(又俾人話我呃文了~~)

休養生息

2009-11-23T15:20:00.001+08:00

自從離開了那地獄已經一年零五個多月了。

期間休息了(真係冇嘢做)3個多月，去了一趟旅行，找到了另一份其實挺不錯的工，可惜直屬上司是個怪胎外星人，相處不了(佢頂唔順我？)，走難來到現在的公司，實在算不上忙，可惜人工是低了些，但計一計數，用時薪計，又好似差唔多。一早講過付出些代價來買返自己的時間回來，用來學新學問好，用來搵到些外快便更好，甚至用來呆坐浪費左佢都好過同人俾人收買人命。

總結，期間真係好hea，這一年多來。

嗯，又好像休息夠了，夠鐘起身打江山了。

你太善良

2009-11-16T03:41:00.000+08:00

升呢！決戰！馬拉松2010！

2009-10-28T14:31:00.000+08:00

之前一直沒有打算跑半馬，都係諗住跑10km就算，唔知點解有人話跑又會報。

跑半馬唔係跑10km咁可以係咁倚，咋咋帝帝間中練下跑就可以完成賽事。

首先，要搵下資料，睇下真長跑係點練先至啱，然後，就要搵返相關既工具幫手，keep track 住練習時既資料，再之後就要擬定練習計劃，同埋要認真練跑。

中間最令人頭痛既係，搵工具來keep track住跑步時既資料，跑既時間，跑左幾遠等等，另外就係練習路線。

工具方面，本來想搵隻polar或者sunnto之類既錶，但係有基本我想要既分脣都真係好很貴，並非我呢d過氣&落難偽富家子所能負擔。看到ipod sport kit，可以有一個sensor放係對nike 跑鞋度，ipod就可以接收，開頭以為一定要用nike跑鞋，所以一直覺得唔好，後來發覺好多人原來都自己改裝自己對波鞋(?)，令到個sensor都可以放入對鞋度，最後都上apple store度買了來用。呢個solution已經係最便宜的了。

路線方面，本來一直跑大坑東運動場外圍，但係真係好鬼悶，所以就諗左一條近似半馬既其中一段，我由太子一直跑到荔枝角，再返轉頭到太子，點知原來咁樣一圈都只係7km左右，咁點夠跑？我計劃練習時最後階段會加埋回程時最後會跑出西九海濱長廊先再轉頭返太子，咁先至夠遠。

其實到左今日為止，尋晚跑果程係太子到長沙灣運動場，然後晌運動場入面跑track跑左11個圈再跑返太子，全程12km有多冇少，已經過左10km，keep住咁跑進度應該唔錯。

剛收到apple 送過來的sport kit，用埋可以更有系統咁練！

希望到跑時可以輕鬆完成全程半馬。

零七馬拉松
零七馬拉松(結果)

零八馬拉松
零八馬拉松(結果)

零九馬拉松
零九馬拉松(結果)

幸福小女人

2009-10-21T21:44:00.000+08:00

從前，有個人在今年雙十節那天要去飲喜酒。

不過點解呢個故事今日先至寫呢？

原因係，要切合返請飲果位寫blog習俗，最新果篇通常係寫緊半年前既時，充分地讓人有時光倒流十九幾年既感覺。

本來，一年內結婚既朋友眾多，就好像交通黑點的意外數字一樣(很多結了婚的人跟我說，他/她寧願遇上交通意外)，點解偏偏要開文寫佢呢？
嗯，各位讀者請看看呢篇文既tag，冇錯，久違了的燎原之友系列又同大家見面了！

被入選燎原之友系列既朋友，當然有佢獨特既地方，呢位朋友特別既地方就係，同佢傾計既過程中，你會感覺都你係100%正在揶揄緊佢，而且會還下口，唔會覺得悶。性格很師奶很小女人很孤寒得來又很有趣很過癮！

嗯...都未介紹佢個名....暂且叫佢做Ada姐啦...Ada姐是我與四爺跟澤少當年做暑期工時的同事，那時已經開始每天八小時以揶揄ada姐為樂。當然，我們也覺得ada姐也很開心，因為讓別人唔開心的事我們通常都不做或做很少。

ada姐呢份人應該很單細胞，很簡單，所以我覺得佢好開心，呢個亦都係我羨慕佢既地方。佢心地唔錯，冇機心，唔害人，至少冇害過我，當然...害我，唔係話要害就害到既。最讓我有深刻既一件事係，當年我因為某女孩子令我相當唔開心，而當年冇咁多可以傾計既異性朋友，我唯一諗到既就係ada姐，咁我咪約佢出來食餐飯傾過計，原來約ada姐都唔係話約就約，結果係我話餐飯我請，咁佢先至肯出來聽我發瘟。你睇下，佢幾好心地，又樂於助人，而且為人真誠，直腸直肚，直拉接comment：「我覺得你係俾人玩囉！」真係成個人醒左一半。能夠晌我仲讀緊書既時代請食飯而我無其他目的既女仔真係冇囉，只有ada姐得。

嗱，讚左幾百字都算係咁，其實唔只架，當日我同澤少去飲，搭lift時我預先吩咐澤少：「今日佢結婚，寸少佢一日。」我對朋友都算唔錯卦。

本來有張相想post出來架，係去飲時張菜譜，想post張相但show佢個樣出來又唔係咁好，但係打格呀，又冇意思，因為成張相既精髓就係兩口子舉頭望住d食物名稱！唉，都係留返自己間中唔開心時攞出來笑下算了！

ada姐果日結左婚返到屋企仲msn我，話唔好意思，因為果晚將我同澤少調來調去，其實我地都唔係咁介意(可能只係我唔介意)，反正原本果枱都冇靚女，再調都冇(我知道，調晒全場都唔應該會有)，咁我同佢講，我地冇所謂的，請我地食返餐飯事情可解決，跟住佢話要瞓喇喎。我體諒佢新婚返到去都唔大戰三百回都同我講唔好意思，咁今次就放過佢啦。我就是這麼爛好人。

好了，讚左成篇我都好攰，最後衷心希望ada姐一世都keep住咁頭腦簡單，知足常樂，做個幸福小女人，直到永遠，阿門。

悲劇結尾的愛情故事

2009-10-06T03:38:00.000+08:00

在facebook見到的，幾隻字可以讓我笑了。專程分享一下。

炒了的windows

2009-09-26T17:59:00.001+08:00

從前，有一個人，他的M$ Windows被掃毒軟件掃到有隻冇乜殺傷力的病毒。

由於佢本來係做IT既原故，佢就入safe mode scan左一次，完成後再開機。
一心諗住再平平安安安安心心咁用佢部電腦的，誰知道開起不能。

雖然身為所謂IT人，但係佢好鬼討厭裝過自己部機，不過要用的始終要整好，就免為其難動手做。不想做並非不能做，技術層面上，作為IT人仍是很熟手的，佢用左沒多久的時間，M$ Windows已經重裝好。

問題是，本應避免就算M$ Windows死掉也不會沒有了資料，所有的資料都儲在另外一個Partition，亦因為不明的原因，連那兩個partition都沒有了。簡單地說，就是自5月後他重裝過之後放在這部機的資料，都化為烏有，實在可喜可賀。

還好，他重要的資料都不會放在這部電腦，他亦不會有很重要的資料，又可能世上很多的別人認為所謂重要的他都覺得不太重要，無論如何，總之，他就是想來想去也想不起這部電腦儲過些什麼不見了不行的東西。

所以，他繼續過著他自己的生活。

後來，有一天，他猛然想起書展後有人send過一些o靚模的寫真集給他。收到了之後他還沒有看過，覺得很是懊悔，但他再想一想，如果收到了也沒看過，也不是十分重要。

所以，他還是繼續過著他自己的生活。

05：38

2009-09-21T06:02:00.000+08:00

上午05：38。

本應已經睡著的，其實半個多小時前已經醒了。然後一直不能入睡。

是因為天氣太熱？還是有其他莫名奇妙的原因。

有些感覺，很早已經察覺，但總是一直不去理會，一是害怕面對結果，又可能是自己想得太多。

兩年真的可能是一個期限，我一直試著去打破這個規則。

就是自己也覺得自己麻煩，明明事實上可能根本從頭到尾也沒有發生過，偏偏自以為已經經歷了很多。

到今時今日仍感到困擾，其實有沒有成長過？一方面說人家庸人自擾，其實自己也是庸人一個。扮什麼看破世情了？

唉，天氣這麼熱，究竟睡不睡啊你？都天光了。

桂正和

2009-09-17T12:05:00.004+08:00

上個月寫酒井法子，聯想起桂正和。

桂正和是酒井法子的歌迷，當年《電影少女》也找了酒井唱主題曲。說實在，酒井法子的名字，我的確是睇電影少女單行本後頁的專欄才認識的。

日本漫畫家中，桂正和是我欣賞的漫畫家之一。

論畫，線條簡潔，尤其擅長畫女孩子。這正正是我的死穴，所以我當年有參考過他畫的女孩以改善自己畫唔到女孩子的缺陷。

論題材故事，集戀愛科幻動作打鬥奇情搞笑然後加少少調味(鹽花)，娛樂性豐富之餘亦言之有物，不會流於鬧劇一場(其實這是見仁見智)。

最初接觸桂正和，是在小學的時候，晚上亞視會播動畫《飛翼人》(如果沒記錯當時亞視譯《夢戰士》)。那時《飛翼人》好像還是首先創下在晚上播動畫的先河。當時，我看動畫，不會知道作者是誰。

後來開始看《電影少女》《DNA2》《I"s》《Shadow Lady》《ZETMAN》。

桂正和漫畫中的主角通常都有一個共通點，就是感情上某個程度上比較懦弱，但總在緊要關頭挺身而出保護心愛的女角，而真正愛的女角又通常不是故事開首暗戀的那一個(I"s除外)。這一種設正不知是否針對某個年紀層的少男計算過的。

總括來說，桂正和漫畫兼顧了商業原素之餘而故事仍能感動讀者，加上畫面養眼，適量鹽花。是其中一個令我間中會翻看的漫畫。

恐嚇

2009-09-10T15:01:00.002+08:00

http://liuyuen4.blogspot.com/2008/09/google-chrome.html <--- 呢一篇，係我2008年9月初post的。

原來係9月尾，出現過一堆留言，留言其實只有一個，不過重複地出現，即係「炸」，但又唔係好炸.....好快就scroll到落盡頭，令我好生失望。

感覺上，留言有少許恐嚇成份，不幸地，隔了一年，我才看到。真係死左都唔知咩事！

你好！！！！！！！！！！！！！！

请你不要将与你无关的人的名字写在网上，既然在中国内地工作，就要遵守中国的法治，希望你尽快将别人的名字删除，我们将保留法律权利，谢谢。

中国人

留言所講既野，我完全唔明。
- 與我無關的人的名字，究竟係邊個呢？同我無關我又做乜會寫在網上呢？
- 網上係指咩呢？係咪呢個BLOG呢？
- 在中國內地工作？當時我乜都無撈喎.....

我只聯想到前珠海分公司的事情，我晌上面又好似無結怨，又沒有什麼不滿，更加無寫出來...
恐嚇我，只會讓我更加想爆料！

中國人恐嚇中國人....靠~~~
都唔緊要，咁你都要講清楚D吖...

唉...中國人，有時做野就係咁沒頭沒腦什麼的...幾時先真正超英趕美？

小貓咇咇

2009-09-04T15:48:00.003+08:00

話說廖老師唔知幾時開始成日都話要搵多隻貓仔返來陪下虎bi...

最後，大概六月中既時候，就接左一隻B返屋企了。

呢隻B本來已經被改名，但係因為被批很娘，所以我又再同佢改一個。(而好娘果個名，我唔記得左了)
佢返到來屋企已經唔驚，好活潑好百厭，仲跑得好快。既然你跑得咁快，就叫你做咇咇啦！
咇咇貓，哈哈！

咇咇熱愛攝影，一攞部機出來就望住個鏡頭！
咇咇熱愛睇電影，成日坐正晌個電影前面...D人一郁仲會撲佢。其實我很擔心，因為屋企部電視係我供的，連冇嘢做果段日子都唔例外，一部同我共患難的電視機，花左爛左壞左點算？
咇泌熱愛我部電腦，記住只係我部電腦...成日坐晌我個MON前面，MOUSE CUSOR去到邊會跟到邊！然後會撲，同樣我也很擔心！另外佢太喜歡坐上我NOTEBOOK個KEYBOARD上面，賴死唔走。

咇咇和虎BI會讓我精神些開心些，其中一個原因係，我叫佢地個名，佢地會好用力咁回應你。

其實，我對人的要求也不過如此。

鏡之水月

2009-08-09T02:29:00.000+08:00

最近新聞又傳來酒井法子的消息。

對於酒井法子，我對於她的認識只限於鏡之水月和碧綠色的兔子呢兩首歌...同埋讀書時代好多同學仔鍾意佢，我淨係知佢長得挺可愛，只此而已。

新聞話佢失蹤我係有點驚訝，再來係佢被警方通緝，是因為跟毒品有關，對此我係很驚訝，畢竟我對佢既認識只限於佢生得幾靚幾可愛。而我當然很膚淺地認為幾靚幾可愛係唔會同吸毒聯想在一起。

唔知點解最近咁多有關毒品既新聞。毒品問題照計唔係今日先咁嚴重，根本一直都在。

再上路

2009-08-07T00:54:00.002+08:00

正式出道已經足八年，轉到現在是第三份工，慚愧地，職位及論薪水，居然打回原狀，實在是代表作。

薪金與能力如果真的掛勾的話，我應該係唔死都冇用。

自從上一份工遇到天下間第一位認為我由頭到尾都係一條廢柴死蠢無忍用既上司之後，我不停地檢討自己。究竟，我是否徹頭徹尾a piece of useless wood呢？um....我自問雖然唔係好叻，但係未至於一點用處也沒有吧。

我諗，近年來係諸多不順，都條氣都唔順，但係，呢一個亦有可能係上天俾我一個唔好唔知自己做緊乜咁就一世既機會，嗯....唯有係咁諗住先啦。

然而做足八年，到依家居然要出返畢業後果陣既薪水，咁，呢八年係咪白做白過呢？咁....基本上，死都話唔係啦。

第一份工，我打左七年，由最初做打雜，從內部工作到對外工作都有，然後最後做了一個有經驗既打雜，中間學既soft skill好多，從內部既人到對外無論係客定係合作伙伴抑或係vendor，都打過交道，學左好多唔同既溝通方式。總括來講，晌呢間公司，基本功都係晌呢度訓練出來，雖然工作崗位很含糊，但係無論拳腳或兵器都可以耍兩招就是了。咁，其實很多謝有呢一個工作環境俾我可以學到d功夫仔。

到我第二份工，嗯，簡單d講，就係一個練金鐘罩，鐵布衫，橫練十三太保既地方了，論工作，對我來講係簡單，但係有人好唔滿意，唔話過我唔安落，我由被人鬧得唔順氣到最後刀槍不入，金鐘罩罩門得返3毫米，防禦力達SS Class，短短半年可以補救返我之前七年唔記得學同練既野，咁係一件好有價值既事。

到依家呢份工，工作唔難，主要係冇乜人理野，如果唔係最近要搬office，都真係應該算好嘆。今次完完全全打雜feel，搞得掂d麻煩人令佢地唔好出聲，咁就天下太平的了。問題係，人工超低。所以，呢度應該係辟穀，練飛昇既地方。

說真的，我覺得呢一份工其實有繼續做的價值，主要係上司唔麻煩，我可以做自己野，所以如果我用一d空閒既時間搵返唔見左個一半人工，咁可能仲好過之前，至少我會搵d自己想試下既野來做。

就當呢一個係一個自由發揮既地方，咁可以擺脫之前個腦被人框死的毛病。

是月休息？

2009-07-20T02:02:00.003+08:00

原來今日已經係七月廿日，而我今個月居然一篇blog文都沒有寫過。

唔只blog文少寫，其實近來我連說話也比平時少很多，原本已經係少說話。

如果你發覺，我見到你地時唔係咁出聲，千祈唔好以為我唔開心(雖然有時會，不過通常唔會有人知)，又唔好以為你地有問題，更加唔會以為我有問題，因為呢個係正常的現象。
至於因為乜野會唔多講野，我諗係因為我近來個腦不停咁諗點樣令我收入可以回復以前一樣。

而實在，我有很多個題目想寫下：
- 換了工作後的生活
- 小貓咇咇
- NAS的harddisk壞左
- 近來睇過既戲
- 其他濕濕碎碎的.....

論忙碌程度，現在的生活其實唔算得上很忙很忙，不過突然咁耐都唔寫一篇，睇來係有d原因，看來又要好好了解下自己諗緊乜。

壞人

2009-07-12T02:36:00.001+08:00

未聽過呢位歌手，都唔錯。

右腳的痛，高手的路。

2009-06-19T22:59:00.004+08:00

近呢幾個星期，右腳係前所未有咁痛，痛到行路行到Mark哥咁，令到果d成日想扮發哥既老青年非常之羨慕。(總是想起發哥食叉燒飯盒同埋李子雄丟d錢落地叫發哥攞去食lunch呢兩幕。)

因為突然咁痛，又唔知原因，咁咪係咁諗呢一排做過d乜會搞成咁，結果真係冇做過d乜野會整傷...
跟住諗下諗下，其實又好似係痛左好耐，只不過，對於肉體上既普通程度痛楚，我好多年前開始已經無視化。

對於突然痛到行路要跛下跛下，我心諗：
1. 三十一二歲就搞到咁，再老d點算呢？
2. 我仲可唔可以跑步呢？
3. 我仲可唔可以出side kick呢？
4. turning kick，back kick，front kick呢？
5. 我仲可唔可以用cut down呢？
6. 我仲可唔可以使出大飛四百四呢？
7. 我仲可唔可以使出中門噹噹踢來拆掉那些狗公的祠堂呢？
8. 我仲可唔可以使出噹噹加碎膝複腳二連撃來拆掉那些狗公中既XO的祠堂再摧毀其移動能力，以免它們再四圍害人呢？

看看，如果跛左，唔可以再伸張正義(及行使私刑)，大家話，影響係幾咁大呢？我就係越諗越覺得後果何其嚴重。

因為很擔心，而且人總有較弱既時候，咁我就在facebook個status度寫左「點先可以令隻右腳有番力同埋唔痛？」雖然建設性回應例如「試下自廢左腳，咁隻右腳會明顯有力好多，另外左腳o既痛亦會蓋過右腳o既痛,保証見效！」不過在我決定好究竟用咩方法自廢左腳之前，師兄就問我痛既詳情。

最後竟然發現我既徵狀師兄都曾經遇過，然後我回想一直以來我隻腳果d問題例如雖然行得走得踢得跳得，但係莫名其妙地容易攰，咁我就可以確定師兄講既野就係我遇到既問題，聽左解決方法之後即刻放心，而且呢幾日又突然冇咁痛，真係好。師兄仲話原來師父都係咁，嘩，根據我一直以來既思考法，會定義呢一樣野為「天下間所有高手的必經階段」，嗯，無錯，我應該已經差不多踏入高手的領域，噢~威啊！

MBIT TEST再做

2009-06-17T01:39:00.004+08:00

繼九型人格再做，因為睇見brownie做mbit test，我又再重做一次，因為又係兩年前做過 -> 上次的結果。

MBTI 職業性格測試

分析：您的性格類型是「INFP」( 哲學家 )

理想主義者，忠於自己的價值觀及自己所重視的人。外在的生活與內在的價值觀配合，有好奇心，很快看到事情的可能與否，能夠加速對理念的實踐。試圖瞭解別人、協助別人發展潛能。

適應力強，有彈性；如果和他們的價值觀沒有牴觸，往往能包容他人。 INFP把內在的和諧視為高於其他一切。他們敏感、理想化、忠誠，對於個人價值具有一種強烈的榮譽感。他們個人信仰堅定，有為自認為有價值的事業獻身的精神。

INFP型的人對於已知事物之外的可能性很感興趣，精力集中於他們的夢想和想像。他們思維開闊、有好奇心和洞察力，常常具有出色的長遠眼光。在日常事務中，他們通常靈活多變、具有忍耐力和適應性，但是他們非常堅定地對待內心的忠誠，為自己設定了事實上幾乎是不可能的標準。

INFP型的人具有許多使他們忙碌的理想和忠誠。他們十分堅定地完成自己所選擇的事情，他們往往承擔得太多，但不管怎樣總要完成每件事。雖然對外部世界他們顯得冷淡緘默，但INFP型的人很關心內在。他們富有同情心、理解力，對於別人的情感很敏感。除了他們的價值觀受到威脅外，他們總是避免衝突，沒有興趣強迫或支配別人。INFP型的人常常喜歡通過書寫而不是口頭來表達自己的感情(所以唔多打電話...)。當INFP型的人勸說別人相信他們的想法的重要性時，可能是最有說服力的。

INFP很少顯露強烈的感情，常常顯得沉默而冷靜(實在係唔多講野)。然而，一旦他們與你認識了，就會變得熱情友好，但往往會避免浮淺的交往(酒肉朋友的確唔多)。他們珍視那些花費時間去思考目標與價值的人。

您適合的領域有：創作性、藝術類、教育研究、諮詢類等

您適合的職業有：

心理學家
心理輔導和咨詢人員
人力資源管理
翻譯
大學教師（人文學科）
社會工作者
圖書管理員
服裝設計師
編輯
網站設計師
團隊建設顧問
藝術指導
記者
口筆譯人員
娛樂業人士
建築師
社科類研究人員
教育顧問
各類藝術家
插圖畫家
詩人
小說家

冇資訊科技類，證明入錯行啦...反而我好多做緊或能夠做既都on the list 喎....

同兩年前一樣，係「INFP」，總括來講都形容得好近磅！

蘿蔔仔

2009-06-13T02:53:00.003+08:00

有朋友問什麼是蘿蔔仔，嗯~~這就是蘿蔔仔了！carrot oil~~~

包裝寫住：可加速古銅膚色的效果之餘，亦有效保護皮膚免受灼傷，亦可提供滋潤及保護皮膚令色澤持久。

幾勁呀！

本來，我都唔知道世界有支咁既產品，多謝介紹這個的朋友。睇下支野，又係一件歷史文物，原來，又是幾年前的事了。

下水禮

2009-06-10T02:17:00.003+08:00

地球天氣反常，五六月已經熱爆，魚始終要濕下水，如果唔係會死。

出門口時陽光普照，還提自己要帶支蘿蔔仔搽，等可以曬黑同時唔會曬傷。
點知落車時已經烏雲敝日。可能難得出海落水但係都只係棍仔團，連個天都戥我地灰。

今年唔可以成日落水了，因為窮。當了半天富家子，元氣立即大傷。
所以當日我落水便唔想上水，霸住來玩。
唔知係好彩定唔好彩，當日風太大，水唔平，唔可以做好用氣力既跳wake動作，咁改為練180，360呢d平時少做既野，用少d力，如果唔係呢幾日唔使旨意扎扎跳~~

果日一個人入去食午飯，試左想試既生菜墨魚肉，食落唔知點解覺得同食開果d魚肉冇分別，定係平時果d都有少少墨魚肉呢？唔考究了，反正都ok就可以了，另外見佢有一隻叫皇后多士既野，話係失傳美食，唔知係咩又叫來試，原來係兩片奶油多夾埋好似飛碟咁整，唔明有幾特別又唔明係咪我從來未聽過而今日有人識整就當係曾經失傳，算啦，一向我都好多野唔明。

仲有....當日去果一程行去旺角坐車，途中見到....
原來陳先生係識九陰白骨爪的~~~

(設計對白) 陳：用九陰白骨爪重點係唔剪指甲~~~

再見不再見(四)

2009-06-01T15:27:00.005+08:00

寫《再見不再見》呢幾篇其間，無可避免地又會再將呢三十幾年來既人和事重播一次，我replay過幾次之後，很早已決定係寫四篇的了，而今次，唔會再喋喋不休咁講我同d朋友係點點奇奇怪怪地相處，因為長大左之後已經唔會二仔底咁死跟住一個朋友來玩，又唔會傳紙仔咁懶係浪漫，亦唔會借頭借路日日打電話俾人煩住晒，唔會寫冇內容淨係寫對唔住既道歉信。呢d野我依家睇返會覺得自己細個果陣係多麼的硬膠，我接受唔到一個讀過書受過教育既上進青年仲會做呢d野。

除左因為冇咁多硬膠野寫出來俾人笑之外，仲有就係近呢數年所發生既人同事都太過近期了，而有d朋友間唔屎都可能會黎呢度睇下我呢個賤種死得未或都死左未，我寫出來可能有人又會很不快，實在因為我晌blog度寫野令有些朋友好唔開心好不快亦都唔係未發生過，而本來修好既關係亦都突然又破裂過，老老實實，其實令朋友火光的都係一d舊文，某年某日早在修好前的好一段日子我已經冇咁大怨氣，不過朋友會睇d舊野我亦無話可說，又老老實實，只係寫幾篇或幾句野已經令朋友同我斷絕來往我又係咪太過睇得起自己？究竟當日朋友因乜而嬲其實我真係斷估冇痛苦，而實在因為乜野原因亦至今仍然係一個迷。

無論如何，後來我寫野已經收左好多手，講野講得好客氣，唉，其實真係唔多爽快囉。

講返正題，即係講返再見定唔再見呢個話題。晌我replay我呢咁多年，綜觀我呢半生，我唔單止同那些朋友沒有再見面，其實連講再見都好少，呢度講既「再見」，係講緊大家都意識到離開大家生活圈子果一隻。

好多時候，我真係唔知原來果一次見面，真係最後一次，好多野就係咁無聲無色地無疾而終，連感覺到淒美既機會都唔俾你。而且，一旦唔見就真係以後都冇再見，就好似四爺講既生死不相往還。而好一些我沒寫出來既「個案」，都係咁，呢個亦都係我決定唔逐一寫出來既原因，以免重覆自己，悶親大家。

至於有大量不明不白地結束的關係既原因，我真係諗唔到。而其實呢個情況係咪好普遍，我又冇研究過，唔係好清楚。

不過活左咁多年之後，我學到既係，趁著大家還未用完彼此之間的緣份時，就好好地相處。我不知道不知又在那一天，大家會因為各式各樣的原因或不需要原因，再也不會再見，分隔兩地天各一方甚至陰陽相隔(當然講緊係我陰對方陽，我這個短命種)。所以，大家真係很少看到我發朋友脾氣，惡言相向之類。(當然很多時候唔覺意或者控制唔到自己恥笑左朋友而不自知係另計)

認真地說，今日大家能做朋友同學同事情侶等各式各樣的關係都是修來的緣份，無論如何我都十分珍惜。緣起緣滅，只希望有一天緣份盡時，沒有遺憾便可以了。

楓

2009-06-01T02:33:00.001+08:00

很久沒有，在月頭月尾，播歌了。

隨寫18

2009-05-24T04:17:00.003+08:00

1. 這陣子，心情其實真的很糟。

2. 但又不知道實實在在是為了什麼。

3. 我想過我真的可能是病，而且是週期性的。

4. 但我由生理到心理都是男生。男生應該沒有週期性的問題。

5. 按理應該是要開心的，因為已逃離工作得不大高興的地方。

6. 是擔心末來嗎？也不是，而且已找到新工作，據說環境挺不錯，只是薪水跟現在水平差太遠。

7. 那是經濟問題？也應該不是，雖然薪水水平差得遠，但現在的工作應該不太忙，也是發展其他方面的機會，當然追回薪金距離要很努力，也要看看機會。

8. 基本上就是工作上一大轉變，而且覺得是正面的轉變。

9. 有些計劃也做了些準備工夫，要的就是找找機會。

10. 那究竟那方面出了問題？

11. 不知道，只是那一種感覺又出現了。

12. 最近總是想到《安靜》的兩句歌詞。

13. 對著其他人的時候，表現得很正常也很開朗。

14. 因為越來越分裂？

15. 其實那種感覺很熟悉，但很難形容，雖然很深刻。

16. 一種讓我很想後退的感覺。

17. 要聽一下《後退》嗎？

18. 這叫做能醫不自醫。

分手總要在雨天

2009-05-23T12:33:00.003+08:00

經過左七個月既相處，最後終於結束這場關係。

認識不久便發覺大家其實並不很相處得來，常常被有故或無故地被責，總讓我很反感，畢竟我自尊心比我表現出來的高很多很多。

我很努力去維繫這段關係，對於很多的指責，我也是先檢討後改善，但儘管我多麼的努力，但還是沒有滿意，後來，我也放棄了，我只會盡責任做好自己，不滿意我也沒辦法，而且大家已經很坦誠地溝通過。

那天終於按捺不住，向我提出分手，那一刻的心情，真的興奮得難以形容。等了兩個月的過渡期，終於可以走了。還好早已經沒有打算發展長遠的關係，走的時候，只拿回一共水杯。剩下的還有一件東西，一盒吃剩的香口膠，我不打算拿回，留下好了。

每一段關係，都沒有回頭的餘地，不過以後大家還是朋友在街上碰見我會打招呼的，畢竟大家都是好來好去和平地分手，而且大家不是十冤九仇，不共戴天。

走的時候，大家都滿臉笑容握手說再見，分手分得沒有依依不捨，歡天喜地，似乎大家都鬆了一口氣。

天在下著雨，但我看到的是明日的晴天。好了，我會找到更好的，希望大家亦是。

再見不再見(三)

2009-05-23T01:52:00.000+08:00

《再見不再見》的系列我知道其實沒有甚麼人看(根本這個BLOG從來就沒甚麼人看)，而這篇跟上一篇隔了二十日才刊出(還被評為呃POST)，不過我其實還會寫的，還想好了寫到甚麼年代。只是這篇其實已經是預先寫好，等到5月23日才登出來。

是為了紀念這位舊同學，她的生日，5月23日。

關於這段跟這位同學的事，其實早在04年已經寫過了 -第三個一百八十度的遺憾(上)

當年二年級為什麼會跟這位同學特別好，回想起來我當時的選擇機制實在簡單得可以。
就係上回講到當時剛剛開學，發覺好似唔見左D野咁，意識到曾經有個人對我來說都有一個位置的，而依家唔見左，好自然就感到缺失。為左填補呢一個缺失，有一天行樓梯上課室時，我就由我隔離果位女同學開始，順序咁向後Scan，直至搵到一位「嗯，就係你了」的人。唔駛Scan好耐，scan到第二個就係了。而咁巧合，返課室時，佢就坐我後面，好自然，我一有時間同埋冇老師晌度時，我就不停的搵佢傾計，而唔可以傾計時，唔怕，我唔知點解會有好多紙仔寫字條，寫既多數係約佢小息去玩。

只係約佢一個人實在太著迹，所以我同時都會約多幾個女同學一齊的，而坐我側邊四周圍的，都是女同學，而且佢地都幾可愛的，實在相當方便。就係咁，果一年我係跟果位女同學是相當密切，而且每天必定借頭借路即使寫好左家課冊都會打電話去佢屋企同佢對一次我有冇抄漏。

當然，好景不常加好景不長是我自小已經要面對既野，之後發生既事可以睇返我04年寫果篇，小學畢業後我已經廿幾年沒有再見她。初中年代我還有寄生日咭聖誕咭給她(嗯，我有請她寫紀念冊，不過也是找同學轉交給她，她寫了地址。) 而從那時開始，我認識了一個諺語，就是「如泥牛入海」。我唔知蠢事我做了多久，總之就是不短就是了。

畢竟，我不算很聰明。

再見？不再見？這生都不會再見的吧。

祝不知在哪兒的她，生日快樂，生活幸福愉快。

九型人格再做

2009-05-04T02:18:00.002+08:00

再做一次九型人格分析！

當年分析的結果

九型人格分析
第四型	藝術型、浪漫者、自我型、憑感覺者 14%
第五型	智慧型、觀察者、思想型、理性分析者、思考型 14%
第九型	和平型、和平者、和諧型、維持和諧者 14%
第七型	快樂主義型、豐富型、活躍型、創造可能者、享樂型 13%
第二型	助人者、全愛型、助人型、成就他人者、博愛型 13%
第六型	忠誠型、忠誠型、尋找安全者、謹慎型 9%
第一型	完美主義者、完美型、改革者、改進型、秩序大使 9%
第三型	成就者、事業型、成就型、實踐型 9%
第八型	領袖型、能力型、挑戰者、保護者、權威型 7%

我的九型人格分析？

同當年比較，有些型格排後左...例如助人型和忠誠型，然後第五型同第七型跑前左....
我一三八型繼續排得後...不過睇百分比...其實都有9%7%，睇起來我個人各類人格其實都好平均，咁其實係咪即係冇性格？

再見不再見(二)

2009-05-03T02:21:00.002+08:00

繼幼稚園後，升小學了~~~

小學時代：小一時其實唔知點解，唔覺有跟同學一起相處玩耍的印象，跟幼稚園時一樣我只記得一個同學的名字，又是不知道為何會記得，我甚至沒有跟她說過一句說話，記得可能只因為班上排隊時，她站我旁邊，而她很幸運地，成為我第一個長期拖著手的女孩子，拖著手上課室是老師要求的，當年唔識野，仲覺得老師搵我地笨，依家想搵隻女仔手拖下其實好花心思，唔知呢D係咪叫折墜。

呢位同學，雖然我拖左佢成個學期，但係我從來冇同佢講過半句說話，當然「再見」都冇講過，咁當然係冇再見，而且係升小二已經冇再見。冇錯，就係晌我矇查查之下，呢一個同學就唔見左。
同埋，唔好意思......我仲係升小二後，發覺好似唔見左D野咁，我先至意識到曾經有個人對我來說都有一個位置的。

唉，當年小小年紀已經突顯到人類天生既劣根性：有既時候唔知珍惜，冇左先知重要。

由於小學都讀左六年，我怕寫寫下又好長，松山兄又會妒忌我長，所以小學篇都係拆開來寫！

「再見」

再見不再見(一)

2009-04-26T02:04:00.004+08:00

看了，《再見不再見》第三度公演。

故事透過一段友誼的發展，探討現代人的遺忘與思念。

你其實遺忘了，但也在思念。

遺忘，因為在逃避。

思念，原來你很珍惜。

一生中，你跟多少人說過再見？又有多少人會再見？又有多少人之後也沒再見？

突然，很有興趣尋找自己的回憶。

由我有印象的記憶開始。

幼稚園時代：對於幼稚園，我只記得兩個名字，兩位同學的名字。
我其實忘記了我讀了多少年幼稚園，好像是兩年，又好像是三年，在澳門讀書，因為某些原因，我經常缺課。

我天生是一個不擅交際的人，我想我是這樣。所以幼稚園的時候，我每一個學期，只會認識一個朋友/同學。除了那個朋友/同學，我基本不認識其他人。我其實不知道我認識那兩位同學的過程，但是當時我跟她們應該是很好朋友，因為，一回到學校，我們便在一起，直至放學，除非，那天我缺課。

我想，我本性是很專一的。我同一時間，只會專會一致地對著一個人。
其實，我記得我是沒有跟她們說再見，一位同學在學期最後一天走了後，應該就轉校了，因為下一個學期我便沒有再見到她。另一位同學，在學期最後一天後，放過了暑假，我便回港讀小一。最後分別時，我沒有說再見。

那個時期的我，應該對「再見」，是沒有概念的。我不知道，原來有一天，我們已經沒有機會再見面，而且，我小時候根本連時間的概念都沒有的，我根本不知道甚麼時候要返學，甚麼時候不用返學，然後原來我會升小一。無辦法，我小時候活得很混顎，是比其他小朋友蠢很多的。
當然，我後來一直也沒有再重遇那兩位女同學，現在應該見到也不認得，但我一直記得她們的名字。

只不過在發牢騷

2009-04-20T00:31:00.002+08:00

我一直，都希望安頓家人，讓母親即使退休後，生活即使不算有很好的享受，也至少有安身的地方，讓她畫畫，收幾個學生過過日晨。對於家中的所有決定，只要沒有太大的問題，我也很支持的。我希望有一天，家中安定下來，我便可以發展自己心目中想做的事，顯然，這還有很遠的路要走，甚至，我發覺我連自己也照顧不到。

即管當自己還未盡全力做好身邊的所有事吧。我要竭盡我的所有，渡過現在的難關。

我很想有人能明白我。

作為一個成年男人，而且是家中長子，獨立地處理自己的事並且照顧家中的人和身邊的所有人理所當然。早兩天看了人家的blog，有一句說話看了我才了解那天為什麼做拒絕母親的提議：

"我覺得做男人既，就算真係遇到d咩委屈呀、挫折呀，都唔會希望由個阿媽幫自己出頭"

何況，本來我就有自己的方法.....

遇到問題我亳不掩飾地道出自己的境況，已經是我交出了自專心的做法。雖然反應是預期之內，但仍是感覺很差。

本來，這些是不應在這兒說出，而且我一向是覺得不值得因為一些現實問題而讓自己不愉快，因為我總覺得這些只是一些小問題，不算難解決。

當然不是人人好像我這般想。

只是些私事。打擾了，各位。

辭職事件簿

2009-04-16T02:33:00.003+08:00

上個月既年假果幾日其實仲有D節目可以寫下，不過呢度一向喜愛插敍法，打尖。

話說我放假其間多口在PLURK講過話可能放完假之後返到公司唔駛撈，誰知道一語之籤，難怪幾年前有位同學常叫我做「烏鴉」，即係古惑仔入面張耀揚做果個角色，我果然係有一把威力無窮既烏鴉咀，YEAH~

25/3 - 放完假，要返工了~~

27/3 - 近放工時間發生了一件事，經理叫我下星期遞辭職信俾佢，我又有型又冷靜地答：好呀！
不過唔夠兩分鐘佢又話HOLD住先，唔好SEND住。(成件事仲有其他章節，可能再寫一篇詳講，睇心情。)

30/3 - 過左個WEEKEND，佢臨放工搵我坐低傾，最後我同意遞辭職信俾佢。

31/3 - 好快咁PRINT左封辭職信出來俾佢。

好多朋友可能覺得我呢個動作好衝動或者好不智，嗯...呢樣野唔係單一事件可以令我做出呢一個決定，反而我好做已經預計到有呢一日既發生，所以，其實我一直都在找工作轉工，甚至計劃轉行。

我寫呢篇之前，翻睇過我由十月開始返工後寫既BLOG，回想返呢半年來既工作情況，大概可以總結為以下幾點：

- 我對呢一份工既工作時間，工作量，工作性質，難度和範圍，都沒有甚麼意見，甚至，很滿意。

- 我上司在十一月頭開始對我有點不滿，我很早就察覺，然後大家也有坐下來討論，我自己也先檢討自己，他開頭對我的指責有：
1. 有時很大意，有D野冇留意到；
2. 唔記得D幾時幾日發生過D咩，有咩人講過D乜；
3. 有D名稱講錯左，例如GROUP EMAIL ADDRESS同EMAIL GROUP ADDRESS係唔同既野來的；
4. 做事方法或者先後次序有問題；
5. 對事件有太武斷既判斷，都冇試清楚就好肯定咁下定論；
6. 仲有其他濕濕碎碎的，不過主要係以上五點。

- 對於他的指責，有D我覺得加強注意一下都好應該：
1. 開頭我的確覺得有D野冇事就算，冇特別注意，尤其我覺得做IN HOUSE唔需要做到呢一種一絲不苟既程度，不過佢要求到咁認真，我都覺得對做野習慣有幫助，呢一方面我好樂意修改一下自己既認真程度。
例如我每CHECK一樣野都會將數據記得清清楚楚，包括SERVER上面剩幾多位，某D FILE 既FILE SIZE有幾大...好老實講，我唔會覺得呢D野記左有乜幫助，記住左只係佢問到時我唔駛再去個SERVER度睇(佢真係會問架)，以前我見到呢一類數據知道未到危險位就算的了...

2. 呢個真係要成日拎住本記事簿，好似落口供咁，我諗個作用係隨時翻人舊賬或者防止被人翻舊賬。我唔知咩應該記咩唔應該記，畢竟我對「重要」既定義同佢地唔同，所以後來佢問到一D我覺得一D都唔重要既野，而我真係唔記得果D，佢都會怪我點解唔記底佢，呢D位我當然無言以對，而心入面都會問佢又記唔記得。呢D位我真係無能為力。

3. 名稱呢個佢都明白好多野可能即使講錯左，大家都會明白個意思，但係有分別就是有分別，對是對，錯的錯，OK，我覺得呢D位要執正D，唔可以苟且。我後來都CHECK的好小心冇錯先寫先講。

4. 做事方法呢D我真係只會跟直覺或經驗來做，如果佢冇一D好清楚既指引。後來我俾佢話到都唔會亂來，問清楚佢先做，不過，最煩係問佢佢會嫌我煩，話我唔諗唔變通，唔問佢就有機會話我亂來。後來我都真係唔問...不過每做一個動作都諗定個解釋預備佢問我點解，雖然好多時做一件事有好多方法而果D方法點揀其實都真係冇乜所謂...

5. 太武斷呢樣野，我後來都覺得要試清楚D先好肯定D答案，所以D野都會再三假設再測試，反而我後來覺得佢做troubleshooting時好憑佢自己既經驗，咁咪即係武斷地判斷左件事，so far...大家都其實冇估計錯架喎。

總括來說，有D野我覺得有道理或者對自己做野習慣有好處我都改左，但係幾個月來，佢都仲係好多野不滿，而大家坐低落來傾都不下數次。

我既立場係，我會盡量理解佢既質素要求，我會跟佢標準做好D，但係如果大家對工作要求既分野仲係咁大，即係我俾左力落去做，而佢都仲覺得差得遠，咁即係大家唔夾做野，咁都係算罷啦。有一兩次我講完呢段野，都係話唔係趕我走，叫我唔好誤會。我心諗，佢其實係咪真係想我走，我都係咁做野架啦，依家係佢覺得我做唔到去佢要求果個位置，咁樣都好平常，調返轉，如果我係Manager，下面既人唔達標，我都唔會留佢，純粹管理上既決定，有乜所謂？

個問題係，要我做到點先滿意？而我都叫有進步，佢都話睇到，但係每日照鬧...我就算差，我都唔覺得差到咁！
中途我係有懷疑過自己既工作能力係咪真係咁差的，但係我又真係唔覺得。我後來都做過D自療，等自己唔好冇左信心。你知啦，如果自己都覺得自己好差，冇左信心，咁好難救架啦。

後來佢連俾信我話我知我過左試用都再同我講話仲未滿意我，話再會觀察我一段時間，如果都係唔滿意，都係會勸說我自己辭職，我當時覺得，如果我咁都唔滿意，咁應該一世都唔滿意架啦，所以我一早就有心理準備，同開始搵工。不過，未搵到就發生事件，唔夠佢快。

同佢做野咁耐，唯一同佢諗法相同既係，我地都用拍拖來形容，唔夾，咪分手囉！
係呀，而且我仲係唔會去考究誰是誰非，唔考究原因，仲好爽爽快快，絶不拖拖拉拉。

拉倒呢樣野，我在行。

大芬油畫村

2009-04-14T01:19:00.006+08:00

話說上個月24號，係我請左一個星期假既最後一日，趁著我仲有一日空閒，而咁巧合地我已經完成左手頭上個幅油畫，即係話...又要買畫布...之前聽講話深圳有個地方賣油畫材料工具好平，咁上網search左一輪搵到資料之後，就於當日下晝出發...

果個地方叫大芬村，晌布吉附近，出左羅湖火車站據說係有巴士坐既，本來我最近由一個偽富家子降級為「真‧死窮鬼」後，理應係坐巴士既，但係我真係等左成廿九幾分鐘都等唔到有車，心情真係好無奈。就係咁，我就帶著無奈截左架的士了.....

大約廿分鐘車程，見到呢隻大手，就知道到左了~~
落車之後入村，好快我就搵左有一間賣畫布既，問左價錢，嚇左一跳，爽快地落ORDER，因為要一個鐘先整好，所以我就四圍咁參觀下。

基本上成條村都係畫廊，畫室，賣工具材料既店舖。賣油畫的，雖然只係畫行貨，但係都算唔錯架喎，至少快同埋抄得似。我覺得，如果晌呢度日日畫行貨，畫半年，至少技巧會係幾何級地進步的。

村內有部份有特色建築物外牆畫。

仲有個藝術館，開緊個畫展，D畫...有D唔錯...有D我唔識欣賞。

仲有一間叫燎原畫廊....我影左張相...俾入面既員工叫我唔好影...可惡，居然見到佢地老闆都唔認得，仲唔俾佢影相！

一個鐘後，去返我落ORDER既舖頭，見佢仲未整好晒，我就揀左其他野，包括筆，顏色之類既野，之後搞掂晒，就走人返香港了。

呢一疊就係買返來既畫布，20"X24"布連框價值RMB10/塊，我一共買左10塊，我一年畫唔到三幅畫，呢度夠畫三年有多了。香港買同尺寸同質料畫布，承恵60元，仲係已經去D平既地方買仲打左折俾你。你話我問價時係咪嚇左一跳？所以我都係扮諗左一陣就落order了...
連埋車馬既錢除返開都係上面買平D...不過要自己搬10塊畫布都幾重...下次都係問埋有冇其他人一齊買，然後搵運輸送落來！
不過呢D都應該係好多年後既事了，哈哈哈！

經理的金句

2009-04-09T19:58:00.004+08:00

本部門經理亦即係我上司，雖然我只係跟左佢做野半年不足，但係已經學到唔少金句，咪以為呢D說話冇乜特別，佢問既時候我都真係打左個突...好歹我出晒名好鎮定(有D人覺得我係反應遲鈍)

金句一 - 「你係咪想唔做呀?」

金句二 - 「我宜家唔係同你講笑！」

金句三 - 「我覺得你真係好遜色，用遜色黎形容已經好客氣！」

金句四 - 「你下個星期俾信我啦！」

繼數個月以來我收集左好值得記低既金句之後，今日又有一句新既~

金句五 - 「你依家係咪玩野呀？」

對於我呢一個講說話有時可以好簡潔既人，上述問題我都用五個字內既答案回應。回答時多數半秒內作答。

「唔係呀！」

「我都好認真！」

「多謝！」(呢個我冇講出來，只係晌心入面暗暗地無言感激。)

「好呀！」

今日果條問題：「唔係玩野！」

我以前成日諗...點解佢會問D咁既野？我自問態度合作有禮貌，呢間公司做咁耐我連茶水阿姐都冇串過何況呢個咁讓人尊敬和景仰既上司？

我最近都係用返之前睇我前任老細所得既結論：你係咩野人，就會以為人地都用你果種思考與行為模式來反應。

我上司個人咁串，就以為我既態度同佢一樣，所以意識上成日以為我串佢，所以佢先用說話來「反擊」我。
前任老闆精打細算，所以以為人地都同佢一樣算到盡，會攞晒佢著數，所以佢會更加盡，算到草都死光，寸草不生。

嗯，一定係咁！

Aunnal Leave

2009-03-25T01:06:00.003+08:00

話都冇咁快，五日年假就咁就晌三月尾前清晒，好似呢D連放既假，以前想請其實好大件事，先要搞掂公司D野，步署好晒先好申請，如果唔係俾老闆叉能廚到爆，面懞懞就費事啦...

今次有個所謂長假其實好意料之外，本身我知道呢間新公司係要三月尾前要清晒D假，而我呢一個早輪都唔知自己過左試用期既人，都估唔到原來我係有五日假咁多！咁多日本來應該去下旅行，但係......因為太多原因，呢一個假期係點都去唔到旅行的了~~~

第一，假期來得太突然......老實講，對於我來講...呢個唔會係理由，我係夾硬加多個PT...以我既生活狀況，基本上行開一二三四日，都應該冇人會察覺到，係呀，存在感實在係好低，唔會有人發覺唔見左我。
而我，去旅行旨在輕鬆遊樂，唔需要太多體貼既安排，呢一種既來之則安之既隨機性既生活習慣，好適用於我一個人既時間，同時，家人朋友係唔會見到我呢一種生活既......有其他人，我係唔會完全randomly做決定，因為對其他人來說，咁樣實在太過耐人尋味，或者可能覺得太刺激！
就係我呢D可能突然會去其他唔同地方過幾日而唔需要任何準備既人，「假期來得太突然」係無法成立的！另一個原因冇去旅行係因為...

第二，就係因為冇錢！呢個原因，真係可以令到呢一篇BLOG唔駛咁長氣來呃字數耍各位讀者的~~{本來有下文的，但係我睇完後......自己都接受唔到自己寫左D咁既野，所以刪左，算...}

講返其實我呢幾日有咩節目！我除左可以每日同周家小姐相聚到日上三竿之外，仲去左馬灣，睇左好多書，又去左深圳畫家村買左D好平既畫布，呢幾件事，都有可能出現於來緊既POST，以便我呃post之用！

謝謝！

明早又要返果一份雞肋工了~~好地獄。

Vector - 燎原火初版

2009-03-20T02:04:00.002+08:00

雖然其實唔駛用D咁硬膠既方法去畫呢餅野...但係我話過要踏入高手既門檻，好歹都要搵D野練下，雖然同原裝正版差好遠，不過都有個初型，畢竟畫完後對PATH呢樣野已經唔會再無從入手，再練多一段時間應該會進步，呢件野...再修改下就OK的了，修改既練習就當係第二課題！

要努力！

People You May Know

2009-03-17T02:02:00.002+08:00

不知道由很久的哪個時候開始，Facebook 開了一欄叫People You May Know的東東，會Show幾個我可能會識的人。對，可能會識，不過不知道為什麼，有一些人我知我是識佢的，不是點點就沒話說的那種，有的食過飯飲過茶，有的甚至算是一起長大；不過，我就是沒有ADD佢地，當然，佢地都冇ADD我。

我其實唔知自己點解會拎呢樣野出來講，但是心入面總覺得呢件事是一件感覺奇怪的事！

關於這團火

2009-03-16T01:38:00.003+08:00

這個圖案，是我畫的沒錯，也都不記得是什麼時候畫出來，然後放在BLOG，後來還放在MSN。

對於以一團火的圖案來代表燎原火這個混蛋，實在時正常不過的。

在創作的時候(對，真的是創作)，一直想要獨特，要型要耍帥，但是雖然火的形態也很千變萬化，但我當初畫來畫去就是很像叫大家小心山火，總是很不滿意。

後來某天我在某一本漫畫的封面，看到一個火的圖案，就參考了那個圖案畫了現在的一個，我畫的時候，或者後來，都沒有將這我看到的那一個，和我畫的這一個放在一起比較，我現在我不知我算是參考了有幾多成！不過我知道形態很像就是，因為我找了很多參考資料就是這個形態比較特別，比較型好讓我耍帥裝酷！倒是我將火舌的線條變化加複雜了是真的，其實咁有違我設計原則，我其實覺得簡單比較好。不過現在用了好幾年我還沒有改動這個圖案的意圖，我想我算是很滿意我這個圖案！

其實，我一直都覺得，雖然現在不像叫大家小心山火的，但我常常覺得很叱吒903....當然，我後來拿903的那團叱吒火來比較，我的火舌顯然多很多猛很多，但感覺上仍然很叱吒。

其實今日我拿這團火出來，是想重畫一次，但不是改設計...而是用向量軟件畫一次，還要用PATH的方式來畫，好讓我踏進電腦繪圖高手的門檻，雖然我不知道我會被這條門檻絆倒幾多次！
這團火，其實說複雜算不上，但就是火舌很有氣勢，讓我畫的時候很有挫敗感。
這個時勢，還是多些技能比較好，但也要找些自己興趣方面的來學！
多謝一位師兄的教導，讓我清楚了很多，我自己亦會努力練習才好！

希望，這團火很快能真正燒起來！

原色人格

2009-03-13T01:51:00.003+08:00

在別人的BLOG中看到這個，嗯...未見過，試做一下！

我的分析結果

【Me原色組合】
自覺橙色 + 潛質靛色 + 原生紅色

【堅強型】
堅強果敢，任何困難都願意花時間克服的人。
絕不會做危及安穩生活的冒險舉動！個性堅強勇敢，不輕易向困難低頭。為了克服眼前的困難，有時會運用一些『非常手段』。忍耐力比常人要高，一旦訂定目標，就有十足決心和毅力完成。

【堅強型‧Me原色組合色彩本質】

　。自覺橙色：正　向
　。潛質靛色：內在判斷
　。原生紅色：浪　漫

【堅強型的外顯行為】
生活安穩對他們來說是重要的，並非沒有理想，只是認為要捨棄安穩來達成理想，風險過大。
忠誠度高，當面臨選擇工作時，都會花很長的時間考慮。是可以信賴、傳承的夥伴，將已經建立好的事情交給他們打點，多半都能夠鉅細靡遺的處理妥當，屬於忠心耿耿的左右手型的角色。
正向思考，深具道德感；不輕易被困難打倒，往往有著愈挫愈勇的毅力。

【堅強型的潛意識】
會為自己設定階段性的目標，勇往直前，善用自己的能力，相信自己能夠達成設定的目標。對他們來說，經驗的累積很重要；很擅長運用過去經驗來處理正在發生的事情，通常都能夠圓滿的解決。
非常重視事情合理性，深信要解決問題必須找出問題的根源，快速地對症下藥，給人做事明快、有魄力的印象。
控制慾強，尤其在感情方面，有時會給人箝制很多的壓迫感。

【堅強型的靈能意識】
喜怒分明！很強調且重視自己的情緒；熱情而處處設想周到，擁有光明磊落且溫暖的心境；擅長以獨特的智慧和內在心靈的力量說服別人接受自己的觀點，能給予朋友心靈層面上的建議。
重視愛情，也百分之百相信靈魂伴侶的存在。當愛情發生時，會重色輕友。當心中認定自己所要的是怎樣的愛情後，任憑外面的花草多麼吸引都不會輕易的改變。
重視回歸內在的思考心靈的成長，在心靈受傷時，冥想和宗教力量是有療效的。希望自己的心靈及人生是多采多姿的，在適當的時間點提升心靈層次，他們認為這是人生中必經的階段。

笑

2009-03-11T01:49:00.003+08:00

家姐話，外甥仔成日自己無啦啦晌度笑。
嗯，真開心！

其實，我都會無啦啦自己晌度笑。
外甥仔應該係哈哈哈或者嘻嘻嘻咁笑，我呢，我係嘿嘿嘿咁笑。冷笑！

我呢，好多年前已經覺得，好多野，其實都係得啖笑~~

無論苦心經營乜都好，最後，都係得啖笑。

嘿嘿嘿~~

中環 - 真相大白

2009-03-09T03:09:00.003+08:00

上一篇，我POST了一張IFC既相，加一條九唔搭八既LINK，令到大家都唔係好明唔係好知我究竟想點。有D朋友話唔明，有D朋友唔明但係唔敢問，有D朋友扮明，有D朋友好耐冇來，有D朋友根本從來冇深究過我寫既野。以上既，我全都知道，全都理解；唔緊要，明既。

嗯...對於唔明唔知我上篇究竟做緊乜，係正常的。
嗯...咁我唯有...解釋一下，實情係...我近幾個月...每星期有兩晚都會在中環上課...有時抬頭望見D境，我會隨影(隨便地拍攝)一下，上一篇果一張，我影完後當時覺得好有氣氛，上星期我抄返相機D相落電腦度開來睇，發覺其實又冇乜料到...咁我咪入LIGHTROOM執一執，執完覺得唔好浪費，咪POST落個BLOG度，咁我又暫時諗唔到寫乜，咪求其搵D野加入去。

因為成件事係冇理由的，所以大家的而且確係唔會明的。

好，其實中環既相仲有D的，順便又POST下出來，不過真係好普通無睇頭不只，其實仲幾肉酸的...各位影相高手，見笑了。

立法局氣氛真係幾浪漫，可惜一諗到立法局入面D人就破壞晒D氣氛。

填海填得好出了...............

國際金融中心既地位...咪又係咁...自從見呢一座既落成後，貧富懸殊好似越來越嚴重。

至尊寶廣場果位至尊寶......連佢都睇唔住滙豐了。

另按：有朋友問國金天台係咪真係上得去，幾年前我有個學生話上得，而我亦聽好多人講係上得，不過我自己冇証實過呢件事。

中環

2009-03-04T02:35:00.002+08:00

明日前往IFC天台名額爆滿喎......。

舅父

2009-02-26T23:59:00.001+08:00

從今日起，我唔再淨係做人地大表哥。

我要做大舅父了！

外甥仔同大舅父生日只差兩天！

祝你健健康康，聽教聽話！

夕陽

2009-02-26T02:07:00.002+08:00

早兩三個月前，坐車時隨手拍下這張照片，每次看，都讓我想起自己幹的行業。嗚呼哀哉。

我很早已經想脫離這個職業，唔再做IT人，實在的，我也從來感覺不到自己是IT人，我除了會間中看看電腦雜誌，日常電腦有什麼問題我通常知道怎處理之外，我真的沒什麼熱情去深入研究，不像有些人會背HARDWARE既SPEC，會想很多古靈精怪既問題然後諗解決方案...對不起，所有電腦問題對我來說都是工作需要問題，有需要時才解決，是，這對某些人來說，叫做很被動，但我已經為了三餐而迫自己「主動」些。哈哈！講來講去，都係想講，我真係唔適合做IT人。

我都係鍾意畫畫寫字影相呢類野囉...都係去搵呢一類野做下啦...
但係冇讀過D有CERT既野，真係好難搞囉...唉，講來講去，都係兩頭唔到岸啦~~~

嗚呼哀哉。

三百六十六天

2009-02-22T01:47:00.001+08:00

已經三百六十六天了。

那天別過了後，就一直沒有再面見。

當作是你開的玩笑，想通，卻又再考倒我。

我的認真敗給黑色幽默。

人生就是不停的戰鬥

2009-02-17T01:45:00.002+08:00

九把刀說：人生就是不停的戰鬥！

嗯！很熱血！

雖然我其實並不想不停的戰鬥，偶爾還想停下來享受一下人生，奈何人生就是充滿著戰鬥，所以享受人生就即是享受戰鬥。

想讓自己在戰鬥過程覺得很享受很爽，別無他法─非勝不可。斷估，我唔覺得輸了還覺得很ENJOY~~除非精神有病。

為了讓自己日常工作能提起鬥心，我只好將這說話牢記心中。

說實的，工作上真係很不爽，我也不知為什麼！我知道我還有很多地方需要進步，有很多東西要學，但不我認為我已差勁到如此地步。工作這麼多年，從來都沒人給過我這種評價，是一直以來全部人都在包容我的不足，還是現在上司期望很高？不管了，反正我只要做好自己就好。

好歹我曾經為很多人作心理輔導，我每天都給自己輔導數次，才不會發神經。
不過真的很辛苦，感覺很孤獨，有孤軍作戰的感覺。

好在，燎原火說過：我這個人沒有什麼優點，只是命特別硬而已。

鬥命硬，共勉之。

再得下下籤

2009-02-15T23:27:00.002+08:00

上一篇決戰鳳凰山下集大結局提過，我通頂行完夜山，然後凍左三粒鐘，最後只係睇到好多雲，令人好生掃興，但係在咁累既身體狀況之下，我都繼續去維園拿馬拉松物品，回家之後仲冇狂訓而繼續下晝再出去活動，事關呢件事係好緊要......要跟廖老師去黃大仙解籤。

早在上鳳凰山果個星期六，一早就求左靈籤，不過就未去解，皆因廖老師慣左睇下係乜野籤先至去搵人解，好就唔駛解，唔好就去解下。
揀呢個咁疲勞時間去黃大仙解緊要在...
1. 過左果個星期之後，果d星期六日廖老師都唔會再得閒。
2. 我求得一支下籤，雖然另外兩支中上，但我近年實在係衰到陷入地底，廖老師覺得要全部都要解左佢...

支下籤係求自身，講講既野太古怪...以下係解籤人為我寫低既POINT：
一喜一悲勿提生日探親問病小心出入防傷手腳忌出行。
叫我紅白二事全部都唔好去，連生日都唔好提唔好搞(有乜好搞吖)，因為喜事我受唔起喎...一同喜事掛連上關係就會發生唔好既事...唔好出國小心出入...
基本上...今年即係叫我自閉...
不過，去年佢都話份工雖然冇乜作為...但係都唔好轉工，因為轉左都係咁差，但係我最後都冇理到，辭左職，搵左份新工。係呀，真係轉左都係咁...不過，咁點算唧...算啦！
所以，好多野，要做果陣時，要決定時，都係考慮當時既環境，解籤人既說話，參考而已...我成日諗，舊年如果唔轉工，唔通會好得過依家咩？可能係，可能唔係，點知...
我冇理由，今年自閉架，係咪？

講多一支...事業，係中上架喎...係批解係：
六月上運初時有些少阻滯但有貴人勿口密好人緣有朋友貴人有飲食開心。
話我呢份工好喎，唔駛轉，六月開始會好，雖然依家成日唔順，但之後會好...叫我多d同人講下野，一齊食飯飲茶灌水咁...
咁其實講得咁好咁多朋友貴人，我都可以解做...因為我成日搵朋友食飯飲野，又樂於助人，廣結善緣之下，六月得貴人朋友相助，轉到一份好工，工作有前途仲好對咀型，好適合本少爺長遠發展，一舉成名，從此以後一帆風順，可口可樂！
所以，真係唔知...

我覺得聽下呢D野OK的，不過我做人，都係覺得適當時候你就會作出適當決定，呢D野參考下，有時可以係一種支持你作某個決定既一個元素。但係唔應該阻礙我去做一個適當既決定。

依家，我唯一要做既，就係吸收多D而家工作上既野，改進自己，做好本份，有機會時先唔會錯失。

有關最近工作既野，又係另一個故事，好想講下，呻下。下回分解。

決戰鳳凰山(二 - 完)

2009-02-15T16:34:00.007+08:00

上回講到，經過三個小時既路程，終於都上到鳳凰山之顛，一廂情願以為可以安安樂樂等太陽伯伯躝出來，點知山上比想像中多人，而且仲開P，D電筒不停顏射本人，如果有個DJ晌度播歌捽碟及咆哮，我會以為我落左D。你睇我影張靈異照，幾咁迷幻......一定係有人晌呢個P場賣迷幻藥...

晌個D場...唔係，晌山上好寂寞咁呆等左兩小時四十五分鐘，見到D迷幻青年男女開始清醒返...開始SET返D架生影日出，可惜，是日多雲。剩係睇佢地個背影都感覺到佢地既無奈。其實，我感覺唔到佢地有幾無奈，我只係自己覺得有少少無奈。

不過既然無日出，唯有影下D雲，風無相，雲無常，千辛萬苦之下無得影日出的確係令人感到人生既無常。雖然只係得雲影，不過晌山上咁高影，角度層次都同地面望既好唔同！係，我只可以咁樣開解一下自己。
我影左好多張雲，係SET定左腳架，大概一分鐘影二張左右，所以連起來可以睇到D雲既移動，但係始終天灰灰，加上我攝影技巧實在係LIMITED COMPANY，D相可觀性並不高...唯獨，我喜歡呢張，個天出現個2字！2字，就好似說明左我條命咁...無論我幾咁努力做得最好，對人有幾好，永遠，地位都唔會係坐正，唔會係第一果個。經過咁多年，經歷咁多人，我差不多已經接受同習慣左咁。

影左十至十五分鐘，就落山了，上山容易落山難，落山其實真係仲累過上山，我成日都覺得自己會「鐘」落山，咁就真係......一了百了...但係，最後我都平安咁落到山！
落山中途見到有耶穌光現像，又急急拿相機，急急咁影，又因為真係太急，我體力又到左極限，影得真係唔好！不過，算啦。

落到山，姐夫及他的同事，晌山腳等我地(佢地上左一半就落返去)，出返東涌，食完早餐，就搭車閃了。
我冇即時返屋企，我出左維園攞馬拉松既參賽號碼之類既野先返屋企！仲要只係瞓左一個鐘就又有地方要去了，不過呢個又係另一個故事了，搵日都會寫一寫呢個故事。

就係咁，就完成左登上鳳凰山呢一件挑戰了。今次影唔到日出，究竟仲會唔會上多一次呢？都係遲D先算啦。

決戰渣打馬拉松2009

2009-02-11T01:15:00.003+08:00

晌繼續寫決戰鳳凰山之前，先來個插敍法，打尖寫決戰馬拉松先！

去年，去跑之前個晚冇訓到，同二公子消滅完D恐怖份子就換衫出去了。今年，冇消滅恐怖份子喇，不過係連線玩UNO，我仲(被批評為)好賤格咁羸左幾舖，但係我都冇好囂張咁大叫大嚷，因為玩玩下我年中時既痛症又發作。咁晌出發之前...我都仲可以訓近一個鐘...我以為訓一陣會唔痛，當然呢D又係我一廂情願既想法。

不過經過大半年來間歇性發作，發作起來每次都死去活來，雖然次次面青口唇白，手腳冰冷，同埋覺得與死神很親近，但係我每次居然都在數小時後繼續好好做人，仲更加談笑風生，實在自己都吹自己唔脹(咁係當然的)~~所以，我冇理到我有幾痛，我都係出左門口去參加。

我呢D其實唔係咁跑得既人，今年當然繼續跑10KM。帶痛之下，我速度好似冇乜慢到，跑跑下仲冇咁痛，前面依然有D大姐大哥唔夠兩公里就開始踱步，可能...佢地人生仲有大把時間，所以可以「慢」步人生跑，我呢D命不久矣既人渣，冇乜時間剩，只有搏命跑。

可能舊年寫DBS學生阻住本少爺既發財路，今年唔見佢地聯群結隊組成一字長蛇陣了，寫BLOG威力真係大，實在可喜可賀！

我跑到終點，計過，應該係一個鐘左右，仲以為會快過舊年少少，但係今日出左成績喇，我係以個人時間一個鐘一分鐘廿二秒完成，性別名次係1793，總名次係2116。比舊年慢左5秒，唉...可能因為我中間甩左腳帶，用左10零秒來綁鞋帶...不過名次好似跌左好多，舊年明明係1000頭的...可能呢D就係跑馬拉松有如逆水行舟，不進則退。

決戰鳳凰山(一)

2009-02-01T22:59:00.004+08:00

年初二時，一家人在祖母家時，姐夫提起的鳳凰山影日出之行，昨天最終決定成行。

跟二公子及朋友們吃過宵夜(他們的晚飯)及糖水後，我十二點半前已抵達東涌，一點零五分已在伯公坳開始上山。

同行的有姐夫和他兩個同事，二姑姐一家三人，和我。

起程不久，姐夫之同事不太舒服，結果二姑姐一家和我先走，本身路程是三公里，路牌指示路程約二小時多，但其實山高路斜，難度是中高的(我覺得)，我們慢行加常休息，剛好三小時上到山頂，即零晨四點。其實當時我已經好累！

上山時天氣還不錯，我仲看見滿天星斗，不過我一上到山頂，拿出相機的時候，就已經好多雲，看不到了！不過有一刻能看到咁多星星本身已經好賞心悅目，可惜，浪漫的事情只能一個人欣賞。

鳳凰山頂好多人，而且越臨近日出時間，就越來越多人，離天光仲有兩三小時，本來想恰一會，但實在太嘈，同埋很多電筒顏射過來，讓我訓唔到，相當可惡！

冇錯，就係有好多人，好嘈，仲食杯麵，晌上面氣溫得十度八度或更低的情況下，格外可惡！

由於我實在太累，寫住咁多先！

己丑

2009-01-28T02:27:00.002+08:00

踏入己丑年。

慣常沒有SMS祝誰或誰新年快樂之類...當然電話也不會打...也不沒有在FACEBOOK的STATUS寫，MSN也沒有...是不是太冷淡？但我每年如是。

不過在這兒還是會祝大家新一年事事順境，身體健康，開開心心。

年卅晚最後也完成所有家裡的工作。

年初一早上去了看「捱病的ANTIE」(崖上的波兒)，宮崎駿的動畫基本上都是必看的！發覺近年的作品都沒有那些打打殺殺鬥來鬥去的，哈爾移動城堡都還有些心地唔好的魔法師...今次個個都根本係好人一個。

全片都看得很舒服，畫面很美，每個角色都很開心！

劇情嘛，基本上是一套HAPPY ENDING的人魚公主，全劇沒有驚心動魄的場面，但一點也不悶。角色們心地都很好，尤其表達主角的感情很簡單直接但真摰。主角這種純真的感情，現在真的連五歲小孩也未必找得到。也不知為何，現在的小子那麼精於計算？

看完戲回家，已經來了很多親朋戚友，很熱鬧，也很吵，小孩子嘛...我見過很多小孩，但真的很少見那些會靜靜的，除了我們三姊弟小時候......其實，是不是我們比較不正常？

年廿八

2009-01-25T02:24:00.002+08:00

年廿八，我以為有得放早，不過原來呢間公司唔興的。係喎，早前D聖誕大除夕，都冇。滿以為有既野其實都係冇的，呢一個滿以為，顯然又係我太天真所致。

因為家姐過來，所以放左工就返屋企食團年飯。

舊同時們本身約去飲野，但係後來龍哥伉儷同二公子及VICKI約去行花市，本來都唔知點...不過飲野果度居然仲早過行花市，而且我唔想飲咁多，所以就先飲一轉坐一陣，就過花市。

飲野果度有久違了既RYAN，仲有海之子，新年前能見一見他們真係好開心架~~不過真係好快就要走，惟有下次再GATHERING啦~~

行花市，主要係想行走D霉運。

想來，呢一年真係完全折墮，做咁多年人，最仆街最折墮都真係算係今年，好彩寫呢篇BLOG時，仲有唔夠廿四小時就會過。
今年諸事不順，先在工作上完全失利，再得罪了不少人，做甚麼衰甚麼，十分經典。
二公子話佢今年衰到貼地，我話我衰過貼地，衰到陷入地下...
我諗返...黃大仙確係相當靈！好既靈唔靈我唔知，不過醜既真係靈到我自己都覺得好醜！

VICKI話行花市可以行走D衰運，仲會過俾人。我覺得，佢講得好黑心！不過，我又好鍾意！看來，我開始有做出一番成就既條件了！

原來年廿八果又，係1月23日！哈哈哈！1.23去行花市，咁橋既？

搬屋日

2009-01-19T12:04:00.003+08:00

終於，都搬返出九龍。

過程總算順利。

不過都出現左d好令人擔心既野，虎bi。

搬屋公司臨來之前，大家已經發覺唔見左虎bi。

基本上，全屋如果冇開門冇開窗，佢只有一個儲物室去匿，儲物室擺住d紙箱，基本上冇乜虛位俾佢走去d窿窿度...但係果朝睇過果d佢匿到既地方都唔見，咁我地就要出門口搵佢...後來，我都係覺得佢仲晌屋入面，就決定將儲物室D箱搬出來...而虎BI又真係晌一個冇人會信佢入到去既窿入面。

所以...唔好再話虎BI肥了。

過到新屋，佢繼續悶悶不樂咁匿晌佢個竇度唔出來...到半夜先肯再出來參觀新居！咁細膽，真係好羞家！

晴天

2009-01-17T02:53:00.000+08:00

我上緊果個課程果位TUTOR早兩日問：覺唔覺最近D空氣好左？

原來都關金融海潚事...

金融海潚...珠三角執左幾萬間廠...D廠唔開工，廢氣即刻少左...唔駛藍天計劃都有返個藍天。

講開...香港經濟其實個BASE都算係咁...雖然好多行業都只係PRODUCE虛幻，但係都冇好似冰島咁成個國家破產咁滯...所以香港制度算好健全。

講呢D我其實唔識講...無謂獻醜，聽歌算....

一首咁灰既「晴天」，姐卵真係好野。

隨寫 16-01-2009

2009-01-16T14:00:00.000+08:00

最近少了寫blog，因為真係好多野做...

- 過多三日又要搬屋了，基本上由上星期五搬運公司俾左紙箱我地開始，一有時間我就會pack箱。

- 晌執緊野間屋立立亂既情況下，舉行了最後一燒。有些舊同事...係第一次亦都係最後一次去我間屋...

- 好彩呢份工唔算太忙，如果唔係一定好似前年咁死火...(嗯...仲晌返工時間寫blog...)

- 執屋時發覺有d物件無論如何都係唔會丟的...

- 上網search搬屋checklist，原來..來來去去都係同一份...

- 跟家姐講checklist，佢話駛乜checklist...呢個我同意...因為我地屋企人做野一向都心裡有數，應變能力又高...。我發覺出來做野咁耐，學得最多就係乜鬼都整份checklist...好似好有planning咁喎...

- 又再講出來做野咁耐，真係搬office同搬屋都搬左唔少次，基本上係一至兩年一次...前公司唔係香港搬就珠海搬，一係就擴大office...自己屋企就已搬兩次，今次係第三次...早年...我成日諗如果搬得專業d，幫人搬office唔知有冇得做...不過市場又好似好細咁喎...事實上我覺得我有潛質做relocation expert。上次同家姐講...佢唓我..

- 早兩個星期見到細我廿幾年既小表弟，我見親佢都會問長問短，因為佢講野太有趣而亦因為我平日生活太悶所致。我問佢學校有冇靚女，佢話有個超級靚，我又問佢咁你有冇諗住追佢，佢話等18歲先...我話，等到18歲就俾人搶左架喇...我又問...咁除左佢仲有冇其他靚女，佢話有，仲係晌佢個排行榜頭三甲內...我問佢個排行榜有幾多人，佢話30幾個，係佢班入面人數減一個，我問點解減一個，佢話果位同學太樣衰，排除在榜外！細路真有趣！

- 呢排既天氣，終於似番冬天。而我真係有凍既感覺。

希望大家保重身子！

二零零九，計謀始動。

2009-01-05T00:57:00.003+08:00

送走「驚心動魄，二零零八」，踏入二零零九。

我新年願望唔會係世界和平，呢個世界每一刻每一秒都有人祝願世界和平，但係世界都仲係一D都唔和平，唔駛講到世界咁遠，你依家睇下你100呎範圍以內，可以已經有好多小型戰爭發生緊。與其祝世界和平，不如先同身邊既人建立和諧D既關係先。

所以，我唔再扮偉大，要個世界點點點，我都係自私D，搞掂自己D野先，我諗，我自己好，先至有資格插手其他人甚至個社區，社會，國家，地球，太陽系，銀河系以至全宇宙(係咪宏觀過頭呢?)...既野：

1. 可以安排到時間做適量運動，呢樣昨年情況已有好大改善，今年要KEEP住之餘，再令自己健康D！

2. 保持充足休息，自從轉左新工後，因為要返好早而我又決心改左遲返工呢個習慣，所以我早左些少訓同埋KEEP到早起身，呢個會KEEP住，另外，原來我一直睡眠質素好差，因為有人話我知原來有發夢就即係個腦冇休息，咁我好似晚晚都有發夢，咁就即係好差喎，我唔知點樣可以令自己唔發夢，不過，「訓得好」都當住係今年其中一個目標先啦。

3. 節流，由於我一直以來實在太大洗，冇辦法啦，骨子裏始終都係偽富家子，對錢既概念好薄弱...不過今時唔同往日，屋企環境有改變，而昨年既環境亦令自己意識到唔可以咁樣，所以今年洗錢既態度會有改變，真係要慳D洗囉，不過唔代表我再扮唔到富家子，我要我洗既每一分每一毫都要有相當既價值甚至超出本身價值，唔可以洗左錢但人地仲以為我CHEAP。

4. 開源，淨係節流係唔可以既，我仲應該諗多D方法去擴大收係來源，依家除左正職仲有教畫，教畫果度應該仲可以搵多D錢，另外之前構思既野可以具體做D野，呢一方面只要正職穩定下來，唔會再惹太多麻煩咁就可以開始了。

5. 早日有幸同淫詹飲茶，講起話我既願望都係同好多男人一樣要媾盡個世界D女，點知佢一句就鬧我：「好心你咪扮野啦！其實你心裡面都係追求一份真摰既愛情，唔好晌我面前扮浪子啦！」淫詹一句踼爆實在過份，我話佢佢咁話我，真係好悲囉，佢話係好慘架，扮壞人扮唔到俾人話其實真係仲慘過做壞事俾人指責喎...

6. 又係淫詹，佢話睇左幾年燎原誌到今時今日仲會睇到我講D陳年往事，仲要遊走虛幻同現實之間，有時唔係好明，同埋真係睇到火滾喎...我都明既，又真係好悶既，所以今年開始我希望我唔會再寫果陣時既野，而其實我亦真係冇理由要再寫。而我，又諗其實都應該俾多D新元素入黎，我暫時都係諗到，晌度寫情色篇...即係寫咸故，以回應同埋滿足好似淫詹呢一類忠實長期讀者既訴求。

7. 最後我都希望有野唔駛做，老細又吹我唔脹啦。

嗯，寫住七個先啦，照舊我寫既野都係吹水同認真之間，以上咁多樣野有D我會認真做，有D我都唔知點做。睇完算啦，我唔想激親大家，嘿嘿~~

燎原誌